ក្រសួងធនធានទឹកនឹងផ្ទេរចេញមុខងារ និងភារកិច្ចមួយចំនួនដែលជាន់គ្នា ដើម្បីបង្កើនប្រសិទ្ធភាពការងារ

ក្រសួងធនធានទឹក និងឧតុនិយម ប្រកាសថា ក្រសួងនឹងធ្វើការទម្លាក់ចុះ ផ្ទេរចេញមុខងារ និង​ភារកិច្ច​ខ្លះ ដែលជាន់គ្នា និងពុំសូវសមស្របទៅនឹងសមត្ថកិច្ចរបស់ក្រសួង។ នេះជាការ​លើក​ឡើង​របស់​ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ក្នុងឱកាសសិក្ខាសាលា ពី​ការ​«ពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួងធនធានទឹក និងឧតុនិយម»។

នាព្រឹកថ្ងៃទី ៦ ខែមករា ឆ្នាំ ២០២៤នេះ ក្រសួងមុខងារសាធារណៈក្រោមវត្តមាន ឯកឧត្តម ឧប​នាយករដ្ឋ​មន្ត្រី ហ៊ុន ម៉ានី និងក្រសួងធានធានទឹក និងឧតុនិយម ក្រោមវត្តមានឯកឧត្តមរដ្ឋមន្ត្រី ថោ ជេដ្ឋា បានរៀបចំសិក្ខាសាលាស្ដីពី «ពិនិត្យឡើងវិញ និងការវិភាគមុខងារ និងរចនាសម្ព័ន្ធ​ក្រសួង​ធន​ធានទឹក និងឧតុនិយម»។

ក្នុងឱកាសសិក្ខាសាលានេះ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បា​ន​លើក​ឡើងថា “បន្ទាប់ពីដំណើរការពិនិត្យ និងវិភាគនេះ ក្រសួងធនធានទឹក និងឧតុនិយម បាន​រក​ឃើញ និងសម្រេចថា មុខងារ និងភារកិច្ចខ្លះត្រូវទម្លាក់ចុះ និងផ្ទេរចេញ ដោយសារការជាន់គ្នា និង​ពុំ​សូវសមស្របទៅនឹងសមត្ថកិច្ចរបស់ក្រសួង និងវិស័យ ដោយឡែក​មុខងារ​ខ្វះ​ខាត​មួយ​ចំនួន​ត្រូវ​បំពេញ​មកវិញ និងពង្រឹងបន្ថែម ដើម្បីប្រសិទ្ធភាពការងារ និងស្ថាប័ន។”

ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ក៏បានលើក​ឡើង​ដែរ​ថា​ក្រសួង​បាន​ពិនិត្យ និ​ងធ្វើបច្ចុប្បន្នភាពទិន្នន័យមន្ត្រីរាជការ ពិនិត្យឡើងវិញ និងការវិភាគលើមុខងារ តួនាទី ភារកិច្ច និងរចនាសម្ព័ន្ធ និងការត្រួតពិនិត្យវត្តមានមន្ត្រីរាជការ ដែលតម្រូវ​ឱ្យ​មន្ត្រីរា​ជ​ការ​ត្រូវ​មាន​វត្តមាន និងចុះហត្ថលេខាជាប្រចាំថ្ងៃ។

ជាមូលដ្ឋាន ក្រសួងបានសំយោគធាតុចូល និងជាពុទ្ធិបន្ថែមក្នុងការពិនិត្យកែសម្រួលមុខងារ និង​រចនា​សម្ព័ន្ធឱ្យកាន់តែប្រសើរ មុតស្រួច និងពេញលេញ ទាំងបច្ចេកទេស ទាំងគតិយុត្ត ស្រប​តាម​បរិបទ នៃ​ការវិវត្តរបស់សង្គម និងធម្មជាតិ។”

ពាក់ព័ន្ធនឹងការវិភាគមុខងារតាមក្រសួងស្ថាប័ននេះ ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រី​ក្រសួងមុខងារសាធារណៈ ធ្លាប់បានអះអាងថា ការធ្វើវិភាគមុខងារក្រសួងស្ថាប័ន ពុំ​មែន​ជា​ការ​ដាក់សម្ពាធដល់មន្ត្រីរាជការ ពុំមែនជាការធ្វើឱ្យខាតបង់ប្រយោជន៍មន្ត្រីរាជការ ហើយ​ក៏​មិន​មែន​ជា​ការ​វះកាត់មន្ត្រីរាជការនោះដែរ។ ផ្ទុយទៅវិញការធ្វើការវិភាគមុខងារ ផ្ដល់ជាអត្ថប្រយោជន៍​ដល់​មន្ត្រី​រាជការ ក៏ដូចជាក្រសួងស្ថាប័ន និងឈានទៅ​ធ្វើ​ឱ្យ​ប្រព័ន្ធ​រដ្ឋបាល​សាធារណៈ​កាន់​តែ​ប្រសើរ​។

គួររម្លឹកដែរថា សិក្ខាសាលានេះ ជាការបន្តជួបជាមួយក្រសួង ស្ថាប័ន ដើម្បីផ្តល់​ជូន​វឌ្ឍន​ភាព​ការងារ និងការពង្រីកវិសាលភាពព័ត៌មាន ស្តីពីការអនុវត្តការងារ និងដំណាក់​កាល​នានា​នៃ​ការ​ពិនិត្យ​ឡើង​វិញ និងការវិភាគមុខងារ និងរចនាសម្ព័ន្ធ ដល់ថ្នាក់ដឹកនាំ និងមន្ត្រីរាជការ​ស៊ីវិល​តាម​បណ្តា​ក្រសួង ស្ថាប័ននានា បានជ្រាបបន្ថែម និងដើម្បីពង្រឹងកិច្ច​សហប្រតិបត្តិការ នៃ​ភាព​ប្រទាក់​ក្រឡា​គ្នា​បានកាន់តែល្អប្រសើរ៕ អត្ថបទ៖ គឹម ហុក