លោក Trump ថាខ្លួនយល់ពីមូលហេតុនៃជំហរប្រឆាំងរបស់រុស្ស៊ី លើសមាជិកភាព NATO អ៊ុយក្រែន

ប្រធានាធិបតីជាប់ឆ្នោតអាមេរិក លោក ដូណាល់ ត្រាំ បានលើកឡើងកាលពីថ្ងៃអង្គារ (០៧ មករា) ថា លោកយល់អំពីមូលហេតុដែលរុស្ស៊ី ប្រកាន់ជំហរថា អ៊ុយក្រែន មិនគួរជាផ្នែកនៃអង្គការណាតូ (NATO) ហើយថាលោកនឹងមិនជួបជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន នោះទេ មុនពេលចូលកាន់តំណែង។

ថ្លែងនៅក្នុងសន្និសីទសារព័ត៌មាននៅរដ្ឋ Florida លោក ត្រាំ ក៏បានស្តីបន្ទោសប្រធានាធិបតីបក្សប្រជាធិបតេយ្យដែលកំពុងអស់អាណត្តិ គឺលោក ចូ បៃដិន ចំពោះការចោទប្រកាន់ថាបានផ្លាស់ប្តូរជំហររបស់សហរដ្ឋអាមេរិក លើសមាជិកភាពអង្គការណាតូ សម្រាប់អ៊ុយក្រែន។

លោក ត្រាំ និយាយថា “រុស្ស៊ី បាននិយាយយូរឆ្នាំមកហើយ មុនពេលការបញ្ជាក់របស់លោក ពូទីន ទៅទៀតថា មិនត្រូវឱ្យណាតូពាក់ព័ន្ធនឹងអ៊ុយក្រែនទេ ប៉ុន្តែក្រោយមក លោក បៃដិន ាទី្រុងគីវ គួរតែចូលរួមជាមួយណាតូ។ ពេលនេះមានអ្នកឈរនៅមាត់ទ្វារផ្ទះរុស្ស៊ីហើយ ដូច្នេះយើងអាចយល់បានថាហេតុអ្វីបានជាទីក្រុងមូស្គូ ប្រឆាំងដាច់ខាតចំពោះសមាជិកភាពណាតូ របស់អ៊ុយក្រែន”។

បណ្ដាសមាជិកនៃអង្គការសន្ធិសញ្ញាអាត្លង់ទិកខាងជើង ឬហៅថា ណាតូ បានបង្ហាញការគាំទ្រជាផ្លូវការចំពោះការចូលជាសមាជិករបស់អ៊ុយក្រែន ចាប់តាំងពីកិច្ចប្រជុំកំពូល Bucharest ឆ្នាំ២០០៨ មក ហើយរដ្ឋបាលលោក បៃដិន ក៏បន្តគាំទ្រដល់ការចូលជាសមាជិកនោះ បើទោះបីជាអ៊ុយក្រែន មិនដែលត្រូវបានអញ្ជើញក៏ដោយ។

មន្រ្តីជំនិត និងសម្ព័ន្ធមិត្តរបស់លោក ត្រាំ ជាទូទៅប្រឆាំងនឹងសមាជិកភាពណាតូ សម្រាប់អ៊ុយក្រែន ដោយមើលឃើញថានោះជាការបង្កហេតុដែលមិនចាំបាច់ចំពោះទីក្រុងមូស្គូ។ ជាមួយគ្នានេះដែរ ថ្នាក់ដឹកនាំអ៊ុយក្រែន បានជំរុញយ៉ាងខ្លាំងក្លាចំពោះការអញ្ជើញរបស់សម្ព័ន្ធយោធាណាតូ ដោយនិយាយថា វាជាគន្លឹះក្នុងការទប់ស្កាត់រុស្ស៊ី៕