អាកាសចរណ៍ស៊ីវិល៖ ក្រុមហ៊ុនទួកគីចាប់អារម្មណ៍បណ្តាក់ទុនវិនិយោគវិស័យអាកាសចរណ៍នៅកម្ពុជា

ភ្នំពេញ ៖ ក្នុងឱកាសអញ្ញើញត្រួតពិនិត្យដំណើរសាងសង់ព្រលានយន្តហោះថ្មី នៅក្រុងតាខ្មៅ មន្រ្តីជាន់ខ្ពស់នៃលេខាធិការដ្ឋានអាកាសចរស៊ីវិល បានបង្ហើបឱ្យដឹងថា មកដល់ពេលនេះ មានក្រុមហ៊ុនទួកគី បានបង្ហាញការចាប់អារម្មណ៍ក្នុងការបណ្តាក់ទុនវិនិយោគលើវិស័យអាកាសចរណ៍នៅព្រះរាជាណាចក្រកម្ពុជា។

​ឯកឧត្តម សយ សុខាន់ រដ្ឋលេខាធិការនៃលេខាធិការដ្ឋានអាកាសចរស៊ីវិល និងជាប្រធានគណៈកម្មការសម្របសម្រួលដឹកនាំសាងសង់ និងប្រតិបត្តិការណ៍អាកាសយានដ្ឋានអន្តរជាតិតេជោ នាព្រឹកថ្ងៃទី២៨ ខែកុម្ភៈ ឆ្នាំ២០២៥នេះ បានមានប្រសាសន៍ថា ពេលបច្ចុប្បន្ននេះ ក្រុមហ៊ុនដែលបាននិងកំពុងប្រតិបត្តិការនៅព្រលានយន្តហោះចាស់ នឹងត្រូវប្តូរមកអាកាសយានដ្ឋានអន្តរជាតិតេជោទាំងអស់ ដោយមិនមានក្រុមហ៊ុនណាមួយអវត្តមាននោះឡើយ។ ឯកឧត្តម បានបន្តថា ស្របពេលជាមួយគ្នានេះដែរ ក៏មានក្រុមហ៊ុនបរទេសថ្មីៗទៀតតាមរយៈស្ថានទូត ក៏ដូចជាតាមរយៈភ្នាក់ងារក្រុមហ៊ុននានាបានទាក់ទងដើម្បីបំពេញលក្ខខណ្ឌ និងបែបបទក្នុងការបើកប្រតិបត្តិការនៅអាកាសយានដ្ឋានថ្មីនេះផងដែរ។

ឯកឧត្តម សយ សុខាន់ បានបញ្ជាក់ថា ក្រុមហ៊ុនចាស់ត្រៀមផ្ទេរពីព្រលានយន្តហោះចាស់មកព្រលានយន្តហោះថ្មី ឯអ្នកថ្មី ក៏ត្រៀមចាប់ផ្តើមមកដែរ ដោយក្នុងនោះមានក្រុមហ៊ុនទួកគីដែលមានការចាប់អារម្មណ៍លើវិស័យអាកាសចរណ៍នេះ ប៉ុន្តែទាក់ទងនឹងចំនួនក្រុមហ៊ុនថ្មីប៉ុន្មាន ឯកឧត្តម មិនទាន់មានព័ត៌មានលំអិតនៅឡើយទេ។

គិតមកដល់ពេលនេះ អាកាសយានដ្ឋានអន្តរជាតិតេជោក្រុងតាខ្មៅ សម្រេចការសាងសង់ ប្រមាណជាង ៩៤% នឹងគ្រោងដាក់ឲ្យដំណើរការជាផ្លូវការនៅខែកក្កដា ខាងមុខនេះ ក្រោមអធិបតីភាពដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។ ព្រលានយន្តហោះថ្មីនេះ សាងសង់ឡើងលើផ្ទៃដីជាង ២ ៦០០ហិចតា ជាព្រលានយន្តហោះលំដាប់ F4 ដែលអាចធ្វើអោយយន្តខ្នាតធំចុះចតបានដូចជា ប្រភេទ Airbus A380 និងប្រភេទ Boeing 747 និងអាចទទួលអ្នកដំណើរបានរហូតដល់ ១៣លាននាក់ ក្នុង១ឆ្នាំ ក្នុងដំណាក់កាលទី១៕

អត្ថបទ៖ ឈិត បូរ៉ាវី