ពលរដ្ឋចាស់ក្មេងកាន់តែច្រើននាំគា្ន ទទួលសេវាសុខាភិបាល តាមរយៈប្រើប្រាស់បណ្ណ ប.ស.ស

បច្ចុប្បន្ននៅតាមមូលដ្ឋានសុខាភិបាលនានា គឺមានពលរដ្ឋចាស់ក្មេងនានាកាន់តែច្រើន បាននាំគ្នាប្រើប្រាស់បណ្ណ ប.ស.ស សម្រាប់ការទទួលបាននូវសេវាពិគ្រោះ ពិនិត្យ ថែទាំ ព្យាបាលជំងឺនៅតាមមន្ទីរពេទ្យ រដ្ឋ ឯកជន ហើយពលរដ្ឋនានានោះ បានថ្លែងការពេញចិត្តខ្លាំង​ចំពោះរាជរដ្ឋាភិបាលកម្ពុជា​ បានអនុវត្តកម្មវិធីនយោបាយកែទម្រង់ ផ្តល់ឱកាសឲ្យពលរដ្ឋ​ចាស់ក្មេងនានាប្រើប្រាស់បណ្ណ ប.ស.ស ថែទាំសុខភាពនេះ។

បណ្តាពលរដ្ឋ នៅខេត្តកណ្តាល បានថ្លែងប្រាប់BTV នៅថ្ងៃទី២០ ខែមីនានេះថា បច្ចុប្បន្នពលរដ្ឋទាំងអស់គ្នា មានការពេញចិត្តខ្លាំង ចំពោះរាជរដ្ឋាភិបាលកម្ពុជា ដែលបានអនុវត្តកម្មវិធីនយោបាយកែទម្រង់ ​និងបានផ្តល់ឱកាសឲ្យមន្ត្រីរាជការ កងកម្លាំងប្រដាប់​អាវុធ កម្មករ និយោកជិកនានា ​ជាពិសេសផ្តល់ឱកាសឲ្យពលរដ្ឋប្រកបរបរសេដ្ឋកិច្ចក្រៅប្រព័ន្ធ អាជីវករលក់ដូរខ្នាតតូចធំនានា ​អាចបង់វិភាគទានដើម្បីទទួលបានបណ្ណ ប.ស.ស សម្រាប់ទទួល​បានសេវាពិនិត្យ ព្យាបាលជំងឺ នៅតាម មន្ទីរពេទ្យ រដ្ឋ ​និងឯកជននានាដោយមិនមានការគិតថ្លៃ និងមានការចំណិញច្រើន។

បើតាមមន្ត្រី ប.ស.ស នៃមន្ទីរពេទ្យជ័យជំនះ ខេត្តកណ្តាល ថ្លែងថា បច្ចុប្បន្ន ពីមួយថ្ងៃទៅមួយថ្ងៃ នៅក្នុងមន្ទីរពេទ្យជ័យជំនះ ក៏ដូចនៅតាមមូលដ្ឋានសុខាភិបាលនានាទៀតដែរ គឺមានពលរដ្ឋ​ភាគច្រើន​លើសលុប ប្រើប្រាស់បណ្ណ ប.ស.ស មកពិនិត្យ ​ព្យាបាលជំងឺ និងផ្តល់​ទទួលថ្នាំ​ព្យាបាល​ជំងឺ ដោយមិនបាច់បង់ថវិកា ខណៈ គ្រប់មន្ត្រីសុខាភិបាល និងមន្ត្រីផ្តល់សេវាបណ្ណ ប.ស.ស នានា គឺបានកំពុងខិតខំផ្តល់សេវាឲ្យមានគុណភាព ផ្តល់ភាពទាក់ទាញ ដើម្បីជំរុញឲ្យពលរដ្ឋ​ងាកមកប្រើប្រាស់​សេវាបណ្ណ ប.ស.សឲ្យបានច្រើនថែមទៀត។

សូមបញ្ជាក់ថា បច្ចុប្បន្ន សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បាននិងកំពុងអនុវត្តកម្មវិធីនយោបាយកែទម្រង់ ​និងជំរុញការអនុវត្តកម្មវិធីផ្តល់សេវាបេឡាជាតិ​សន្តិសុខសង្គម ប.ស.ស ក្របដណ្តប់លើកម្មករ និយោជិក និងពលរដ្ឋអ្នកប្រកបរបរសេដ្ឋកិច្ច​ក្រៅប្រព័ន្ធនានា​ឲ្យបានទូលំទូលាយ ​និងជំរុញផ្តល់សេវាប្រកបតម្លាភាព ធ្វើយ៉ាងណា មិនឲ្យ​មានរើសអើងឲ្យសោះចំពោះអ្នកប្រើប្រាស់ បណ្ណ ប.ស.ស។

តាមរយៈរបាយការណ៍ ​បេឡាជាតិសន្តិសុខសង្គម ប.ស.ស បានឲ្យដឹងថា គិតមកត្រឹមសប្តាហ៍ទី៣ ខែមីនា ឆ្នាំ២០២៥នេះ បេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាល​វិជ្ជាជីវៈមាន​សមាជិកសរុប ចំនួន ២លាន ៨សែននាក់ ស្រី ១លាន ៥៤ម៉ឺននាក់ ក្នុងនោះមន្រ្តី​សាធារណៈ​ប្រមាណ ៥០ម៉ឺននាក់ កម្មករនិយោជិតក្នុងវិស័យឯកជនជិត ១លាន៦សែនលាននាក់ បុគ្គលស្វ័យ​និយោជន៍មានចំនួន ៥៣ម៉ឺននាក់ និងអ្នកក្នុងបន្ទុកសមាជិក ប.ស.ស. ចំនួន ១៧ម៉ឺននាក់ ថែមទៀត។

គិតចាប់ពីការអនុវត្តរបប​សន្តិសុខសង្គម មកដល់ពេលនេះ សមាជិក ប.ស.ស. បានចូលប្រើប្រាស់​សេវានៅមូលដ្ឋានសុខាភិបាលជិត២៤លានដង និងបើគិតក្នុងរយៈពេលជិត៣ខែ ​ដើមឆ្នាំ២០២៥ មានសមាជិក ប្រើប្រាស់សេវាប្រមាណ ​១,៥លានដង នៅតាមមូលដ្ឋានសុខាភិបាលទាំងរដ្ឋ និងឯកជន ទូទាំងប្រទេស៕ អត្ថបទ ស៊ុម សុខជា