ជំនួបព្រះខ័នរាជ ប៉ះ Madura បានពង្រីកច្រកចូលជាង ២០ និងលក្ខខណ្ឌងាយៗសម្រាប់អ្នកទស្សនា

ព្រះខ័នរាជស្វាយរៀង នឹងបន្ដបើកទ្វារពហុកីឡដ្ឋានជាតិមរតកតេជោ ទទួលក្រុមខ្លាំងឥណ្ឌូនេស៊ី Madura United ក្នុងវគ្គ ៤ក្រុមចុងក្រោយ នៃជើងឯកក្លិបបាល់ទាត់កម្រិតទី៣ ទ្វីបអាស៊ី AFC Challenge League 2024/2025 នាយប់ថ្ងៃទី១០ ខែមេសា ឆ្នាំ២០២៥ ស្របពេលក្រុមការងារពាក់ព័ន្ធ បាននឹងកំពុងរៀបចំច្រកទ្វារចូលទស្សនា និងសម្រួលលក្ខខណ្ឌជាច្រើន ដើម្បីផ្ដល់ភាពងាយស្រួលដល់ទស្សនិកជនចូលរួមទស្សនាការប្រកួតដ៏ធំនេះ។

យោងតាមការជូនដំណឹងរបស់ក្លិបកំពុងឈរកំពូលតារាង នៃលីគកំពូលកម្ពុជា កាលពីល្ងាចថ្ងៃអង្គារកន្លងទៅ ក្លិបបានបង្ហាញអំពីបច្ចុប្បន្នភាពនៃច្រកឆែកសំបុត្រ និងស្កេនសំបុត្រចំនួន ២៤ក្រុក ព្រមទាំងបើកច្រកទ្វារចូលវិមាននៃពហុកីឡដ្ឋានជាតិមរតកតេជោចំនួន ២៣ ពិសេសគឺមិនត្រូវឲ្យមានការប្ដូរសំបុត្រទៀតឡើយ ដោយអ្នកទិញសំបុត្រ គ្រាន់តែបង្ហាញ QR Code សម្រាប់ស្កេនចូលតែម្ដង ។ សម្រាប់ប្រភេទសំបុត្រ  E-Ticket ពេលចាប់ឆ្នោត ក្រុមការងារបានព្រីនឈ្មោះនិងលេខទំនាក់ទំនងរបស់ទស្សនិកជន ដាក់ចូលធុងឆ្នោតរួចរាល់ ដើម្បីធ្វើការចាប់រង្វាន់ម៉ូតូ Honda Beat ចំនួន ៥គ្រឿងទៀតផង។

គួរដឹងថា ក្រុម Madura United បានធ្វើដំណើរមកដល់កម្ពុជា កាលពីល្ងាចថ្ងៃទី៨ ខែមេសា ដើម្បីត្រៀមលក្ខណៈជួបក្រុមម្ចាស់ផ្ទះព្រះខ័នរាជស្វាយរៀង ក្នុងជើងទី១ នៃវគ្គ ៤ក្រុមចុងក្រោយ សម្រាប់ពានរង្វាន់កម្រិតទី៣ ប្រចាំទ្វីបអាស៊ី នាវេលាម៉ោង ៧យប់ថ្ងៃទី១០ ខែមេសាស្អែក នៅពហុកីឡដ្ឋានជាតិមរតកតេជោ មុនជំនួបកាត់សេចក្ដីជើងទី២ នៅទឹកដីក្រុមខ្លាំងរបស់ឥណ្ឌូនេស៊ីវិញម្ដង នាថ្ងៃទី១៧ ខែមេសា ឆ្នាំ២០២៥ ខាងមុខ ។ ដូច្នេះក្រុមព្រះខ័នរាជស្វាយរៀង នឹងពុំបានសម្រាកក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរឆ្នាំនេះឡើយ ដោយពួកគេត្រូវបន្ដបេសកកម្មទៅប្រកួតក្រៅប្រទេស ដើម្បីប្រជែងកៅអីវគ្គផ្ដាច់ព្រ័ត្រ AFC Challenge League 2024/2025៕ អត្ថបទ លី ឈុនឡា