អ្នកស្រីសាំង ភស្តា ប្រាប់ថាសម្តែងមួយរឿងនេះធ្វើឲ្យគាត់ខ្សោះខ្សល់តែម្តង

ប្រិយមិត្តប្រហែលជាបានស្គាល់ច្បាស់ហើយជាមួយនឹងតួអង្គ អ្នកស្រីធីតានៅក្នុង រឿង «អប្សរចិត្តខ្មៅ» ដែលកំពុងតែចាក់បញ្ចាំងនៅក្នុងស្ថានីយ៍ប៉ុស្តិទូរទស្សន៍ បាយ័ន។

ស្រាប់តួអង្គនេះផងដែរ គឺជាតួអង្គមួយដែលមានអត្តចរិត កាចឆ្នាស់ គ្មានបន្ធូរដៃដល់អ្នកណាសូម្បីតែប្តីរបស់ខ្លួន។ ​អ្នកស្រីសាំង ភស្តា បានបង្ហើបប្រាប់ក្រុមការងារបាយ័នថា «ជាទូរទៅអ្នកស្រីតែងតែសម្តែងជាតួអង្គស្លូត ច្រើនជាងតួកាច។ តែចំពោះរឿងនេះវិញ គឺកាចខ្លាំងតែមែនទែន ត្រូវកាចក៏កាច ត្រូវយំក៏យំ ពេលខ្លះក្នុងថ្ងៃតែមួយប្តូរបីបួនអារម្មណ៍ ធ្វើឲ្យអ្នកស្រីខ្សោះខ្យល់តែម្តងមួយរឿងនេះ» ។

ប៉ុន្តែ ទោះបីជាបុគ្គលិកលក្ខណៈរបស់តួអង្គដែលបានទទួលមានភាពលំបាកយ៉ាងណាក៏ដោយ ក៏អ្នកស្រីបានសម្តែងចេញមកយ៉ាងល្អពិតជាសក្តិសមជាសិល្បការីជើងចាស់មែន។ គួររំលឹកផងដែរថាអ្នកស្រីសាំង ភស្តា មានឈ្មោះបោះសម្លេងយ៉ាងខ្លាំងតាំងពីរឿង «ខ្មោចដើមចេកជ្វា» មកម្លេះ។ បើទោះបីជារម្លង មកជាច្រើនឆ្នាំហើយក្តីតែស្នាដៃក្នុងការសម្តែងរបស់អ្នកស្រីនៅតែខ្លាំងដដែល រហូតមានសិល្បករ សិល្បការីជំនាន់ក្រោយជាច្រើនរូបចាត់ទុកអ្នកស្រីគឺជា Idol ថែមទៀតផង។

នៅក្នុងខ្សែភាពយន្តប្រិយមិត្តឃើញថាអ្នកស្រីធីតា កាចឆ្នាស់ ជេរមិនសំចៃមាត់ តែនៅខាងក្រៅវិញអ្នកស្រីគឺជាមនុស្សរួសរាយ រាក់ទាក់ នឹងងាយស្រួលធ្វើការជាមួយបំផុត។ ជាក់ស្តែងការថតរឿងអប្សរចិត្តខ្មៅនេះ ចំពោះអារម្មណ៍របស់អ្នកស្រីផ្ទាល់វិញ «គឺអ្នកស្រីពិតជាមានអារម្មណ៍សប្បាយរីករាយ នឹងមានអារម្មណ៍ថាក្រុមការងារទាំងអស់ពិតជាស្រុះស្រួលគ្នាបានល្អ ធ្វើឲ្យការសម្តែងមានភាពរលូននឹកស្មានមិនដល់» ។ អ្នកស្រីក៏បានបង្ហាញពីអារម្មណ៍រំភើបយ៉ាងខ្លាំងបន្ទាប់ពីខ្សែរភាពយន្តភាគខ្មែរមួយនេះទទួលបានការគាំទ្រយ៉ាងខ្លាំងពីសំណាក់ទស្សនិកជន។

ជាចុងក្រោយ អ្នកស្រីក៏បានផ្តាំផ្ញើផងដែរថា «ជាចុងក្រោយនាងខ្ញុំសូមអរគុណដល់ទស្សនិកជនដែលបានគាំទ្រវិស័យភាពយន្តខ្មែរឡើងវិញ ព្រោះថាទាំងវិស័យភាពយន្ត របាំ ឬ វិស័យផ្សេងៗទៀតអាចរីកចម្រើនបានដោយសារអ្នកគាំទ្រ។ នាងខ្ញុំសង្គេតឃើញថាសន្ទុះនៃការគាំទ្រវិស័យភាពយន្តខ្មែរកំពុងតែមានការកើនឡើងវិញហើយ នាងខ្ញុំក៏សង្ឃឹមថាទស្សនិកជននៅតែបន្តរការគាំទ្រវិស័យភាពយន្តខ្មែរ ដើម្បីជាកម្លាំងចិត្តដល់ផលិតករ និង សិល្បករ សិក្បការីមានកម្លាំងចិត្តគិតរកអ្វីដែលថ្មីមកជូនទស្សនិកជន» ៕

អត្ថបទដោយ៖ កូនទន្សាយតូច

​