សម្ដេចធិបតី៖ ជំហររបស់កម្ពុជាប្ដឹងទៅតុលាការ ICJ មិនរាថយឡើយ ខណៈថៃស្នើសុំចរចាទ្វេភាគី

ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ពិធីបិទមហាសន្និបាតវិសាមញ្ញកាយរឹទ្ធិជាតិកម្ពុជា នៅថ្ងៃទី១៧ ខែមិថុនា ឆ្នាំ២០២៥នេះ សម្ដេចធិបតី ហ៊ុន ម៉ាណែត នាយករដ្ឋមន្រ្ដី បានបញ្ជាក់ជូនជនរួមជាតិជាថ្មីម្ដងទៀតថា ជំហររបស់កម្ពុជាប្ដឹងទៅតុលាការយុត្តិធម៌អន្តរជាតិ (ICJ) គឺមិនរាថយឡើយលើការដោះស្រាយវិវាទព្រំដែន នៅតំបន់ ប្រាសាទតាមាន់តូច, តាមាន់ធំ, តាក្របី និងតំបន់មុំបី ខណៈភាគីថៃស្នើសុំធ្វើការចរចាទ្វេភាគី។

សម្ដេចនាយករដ្ឋមន្រ្ដី មានប្រសាសន៍បញ្ជាក់ថា ដើម្បីដោះស្រាយបញ្ហាវិវាទព្រំដែន កម្ពុជា-ថៃ គឺត្រូវរកយន្តការដោះស្រាយពីភាគីទីបី គឺដឹកដៃគ្នាទៅតុលាការយុត្តិធម៌អន្តរជាតិ ICJ ពីព្រោះវិវាទនៅតំបន់ទាំងបួនខាងលើនេះ គឺមិនអាចដោះស្រាយជាទ្វេភាគីបានឡើយ។

សូមបញ្ជាក់ថា នៅថ្ងៃទី ១៦ មិថុនា ២០២៥ វេលាម៉ោង ១១:៣០នាទីព្រឹក នៅទីក្រុងឡាអេ (ត្រូវនឹងម៉ោង ៤:៣០នាទី ល្ងាច ម៉ោងនៅរាជធានីភ្នំពេញ) លិខិតផ្លូវការរបស់កម្ពុជា ប្ដឹងទៅកាន់តុលាការយុត្តិធម៌អន្តរជាតិ (ICJ) ដើម្បីជួយស្វែងរកដំណោះស្រាយបញ្ហាវិវាទព្រំដែននៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ត្រូវបានទូតកម្ពុជាប្រចាំប្រទេសហូឡង់ ប្រគល់ដោយផ្ទាល់ដៃជូនលោកក្រឡាបញ្ជី Philippe Gautier នៅតុលាការយុត្តិធម៌អន្តរជាតិ (ICJ)រួចហើយ៕ អត្ថបទ៖ វ៉ន ដារ៉ា