ផ្លូវលំក្រាលគ្រួសក្រហម៣ខ្សែ និងលូប្រអប់ធំៗក្នុងស្រុកសាមគ្គីមានជ័យ ផ្តល់​អត្ថ​ប្រយោជន៍​ច្រើន​ដល់​ជីវភាព​រស់​នៅ​របស់​ប្រជាពលរដ្ឋ

កំពង់ឆ្នាំង៖ ផ្លូវលំក្រាលគ្រួសក្រហម៣ខ្សែ និងលូប្រអប់ចំនួន៣ ស្ថិតក្នុងស្រុកសាមគ្គីមានជ័យ ខេត្តកំពង់ឆ្នាំង បានផ្តល់ប្រយោជន៍យ៉ាងច្រើនដល់ជីវភាពរស់នៅរបស់ប្រជាពលរដ្ឋ ក្នុង​ការ​ដឹក​កសិផល​ពី​ស្រែទៅ​ផ្ទះ ការទៅមកមណ្ឌលសុខភាព សិស្សសាលាទៅមកសាលារៀន និង​កម្មករ​កម្មការនី​ធ្វើដំណើរទៅធ្វើការជាដើម។ នៅព្រឹកថ្ងៃទី០៥ ខែកញ្ញា ឆ្នាំ២០២៥នេះ អន្តរក្រសួង​បាន​ចុះ​ពិនិត្យ និងវាយតម្លៃលើការថែទាំខួបផ្លូវចំនួន៣ខ្សែនេះ និងដឹកនាំក្រុមការងារពីឯកឧត្តម ចាន់ ដារ៉ុង រដ្ឋលេខាធិការ សមាជឹកគណៈកម្មាការលទ្ធកម្ម ក្រសួងអភិវឌ្ឍន៍ជនបទ។

ប្រជាពលរដ្ឋរស់នៅ និងកំពុងប្រើប្រាស់ផ្លូវទាំង៣ខ្សែក្នុងស្រុកសាមគ្គីមានជ័យ ខេត្តកំពង់ឆ្នាំង បាន​បង្ហាញ​ពីការសប្បាយចិត្ត ក្រោយបានឃើញរាជរដ្ឋាភិបាលកម្ពុជា ក្រោមការដឹក​នាំ​របស់​សម្តេច​ធិបតី ហ៊ុន ម៉ាណែត នាយករដ្ឋមន្ត្រី បានដឹងសុខទុក្ខប្រជាពលរដ្ឋនៅតាមមូលដ្ឋាន តាម​រយៈ​ក្រសួង​អភិវឌ្ឍន៍ជនបទ បានកសាងផ្លូវ និងបានថែទាំខួបជា​ប្រចាំមិ​ន​អោយ​ផ្លូវ​ក្រាល​គ្រួស​ក្រហ​ម​ទាំង៣ខ្សែ និងលូប្រអប់៣កន្លែងនេះ មិនអោយខូចខាតនោះឡើយ។ ក្រោយពី​ទទួល​បាន​ផ្លូវ​ទាំង​៣ខ្សែ និងលូប្រអប់នេះ ប្រជាពលរដ្ឋ​ទាំង​អស់​បាន​អរគុណ​ថ្នាក់​ដឹកនាំ​ដែល​បាន​ប្រែក្លាយ​ផ្លូវ​៣​ខ្សែនេះ​ពីផ្លូវរទេះមកជាផ្លូវក្រាលគ្រួសក្រហម និងបានកសាងលូប្រអប់​យ៉ាងស្អាត​សំរាប់​ប្រជា​ពលរដ្ឋប្រើប្រាស់ជាប្រយោជន៍ដ៏សំខាន់ សំរាប់បង្កើនជីវភាព​រស់​នៅ​ក្នុង​គ្រួសារ​បាន​មួយ​កម្រឹត​ទៀត ជាពិសេសបានកាត់បន្ថយនូវការចំណាយថវិកាធ្វើដំណើរក្នុងគ្រួសារផងដែរ៕ កាំង ហុងវាស្នា