សម្ដេចតេជោ ហ៊ុន សែន ៖ ការជួយបំពេញឲ្យគ្នាទៅវិញទៅមកសម្រាប់អភិវឌ្ឍន៍ ក្នុងបរិការណ៍សកលបច្ចុប្បន្ន គឺពិតជាចាំបាច់

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា ការលើកកម្ពស់ ការជួយបំពេញឲ្យគ្នាទៅវិញទៅមក សម្រាប់អភិវឌ្ឍន៍ គឺពិតជាមានភាពចំបាច់មិនអាចខ្វះបាន ក្នុងបរិការណ៍សកលបច្ចុប្បន្ន។

ការលើកឡើងរបស់សម្ដេចតេជោ ហ៊ុន សែន បានធ្វើឡើងតាមរយៈសុន្ទរកថាតាមវីដេអូ សម្រាប់កិច្ចប្រជុំជាន់ខ្ពស់លើក ទី១ នៃវេទិកា ស្ដីពី សកម្មភាពសកលសម្រាប់ការអភិវឌ្ឍរួម ដែលបានផ្សព្វផ្សាយនៅព្រឹកថ្ងៃទី ១០ ខែកក្កដា ឆ្នាំ ២០២៣នេះ។

សម្ដេចតេជោ ហ៊ុន សែន​ បានថ្លែងថា ជាការពិតណាស់, នៅក្នុងបរិការណ៍សកលបច្ចុប្បន្នដែលមាននិន្នាការបែក ខ្ញែកទៅ ជាពហុប៉ូល, ការលើកកម្ពស់ការជួយបំពេញឲ្យគ្នាទៅវិញទៅមកសម្រាប់អភិវឌ្ឍន៍ ពិតជាមានភាពចំបាច់មិន អាចខ្វះ បាន តាមរយៈការដាក់ចេញនូវសកម្មភាពអនុវត្តជាក់ស្ដែង លើការអភិវឌ្ឍមូលធនមនុស្ស, ការកាត់បន្ថយ គម្លាត ឌីជីថល, ការពង្រឹងច្រវាក់ផ្គត់ផ្គង់ និងផលិតកម្មតំបន់ និងសកល, ការជំរុញការវិនិយោគដោយផ្ទាល់, ការសាង សង់ ហេដ្ឋារចនាសម្ព័ន្ធ, ការអភិវឌ្ឍវិស័យហិរញ្ញវត្ថុ និងការអភិវឌ្ឍសេដ្ឋកិច្ចបៃតង និងភាពធន់ទៅនឹងអាកាសធាតុ ព្រមទាំងការគាំទ្រផ្នែកហិរញ្ញប្បទាន ដើម្បីចូលរួមដោះស្រាយនូវបញ្ហាប្រឈម និងចាប់ឲ្យបាននូវកាលានុវត្តភាព នៅក្នុងប្រទេសនីមួយៗ។

ជាមួយគ្នានេះដែរ សម្ដេចតេជោ ហ៊ុន សែន យល់ថា ប្រទេសនាននៅលើពិភពលោក គប្បីគួរមានក្របខណ្ឌរួមមួយ ដែលគិតគូរលម្អិតអំពីយុទ្ធសាស្ត្រ និងយន្តការសហប្រតិបត្តិការ ជាពិសេសការរៀបចំផែនការ និងការផ្គត់ផ្គង់ ហិរញ្ញប្បទាន សម្រាប់គម្រោងអាទិភាពនានា សំដៅធានាឲ្យបាននូវប្រសិទ្ធភាព ក្នុងការអនុវត្តគំនិតផ្ដួចផ្ដើមទាំងនេះ៕

អត្ថបទពី៖ KTP