ក.ប.ប. ណែនាំពលរដ្ឋឲ្យជួយផ្តល់ព័ត៌មានឬដាក់ពាក្យបណ្តឹង ករណីឃើញថា​មានផលិតផល​ដែលបង្កផលប៉ះពាល់សុខភាព

អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) នៃ​ក្រសួង​ពាណិជ្ជកម្ម លើកឡើងថា ក្នុងករណី​ប្រជាពលរដ្ឋ​ឃើញ​មាន​ផលិត​ផល​ដែល​អាច​ប៉ះពាល់​បញ្ហា​សុខភាពដល់អ្នកទទួលទាន សូមផ្តល់ព័ត៌មាន ឬដាក់ពាក្យបណ្តឹង ឬតាម CCF Complain App មកកាន់អគ្គនាយកដ្ឋាន ក.ប.ប. ដោយផ្ទាល់ ដើម្បីចាត់វិធានការណ៍តាមច្បាប់។

ការលើកឡើងខាងលើនេះរបស់អគ្គនាយកដ្ឋាន ក.ប.ប. ធ្វើឡើងក្រោយមន្រ្តីជំនាញ នៃ​នាយកដ្ឋាន​មន្ទីរពិសោធន៍ នាយកដ្ឋានកិច្ចការបច្ចេកទេស និងសាខា ក.ប.ប. រាជធានីភ្នំពេញ បាន​សហកាជាមួយគណៈកម្មាធិការផ្សារអូឡាំពិក ធ្វើបទបង្ហាញ អំពីខ្លឹមសារប្រកាសលេខ១៩២ ព.ណ.អ.កបប ចុះថ្ងៃទី២ ខែកញ្ញា ឆ្នាំ២០២២ របស់ក្រសួងពាណិជ្ជកម្ម ស្តីពី​លក្ខ​ខណ្ឌ​តម្រូវ​នៃ​ការ​ដាក់​ស្លាកសញ្ញាសម្រាប់ផលិតផលគីមីប្រើប្រាស់តាមគេហដ្ឋាន ក្នុងគោលបំណងអប់រំ ផ្សព្វ​ផ្សាយ និងបញ្រ្ជៀបការយល់ដឹងដល់អាជីវករលក់ដូរក្នុងផ្សារចំនួន១៦រូប ដែល​ប្រកប​អាជីវកម្ម​ស្តុកទុក លក់ និងចែកចាយផលិតផលគីមី លក់ជ្រក់ ប្រហិត ខ្ញីហាន់ សណ្តែកបណ្តុះ លត នំបាញ់​ឌុក គ្រឿងសមុទ្រ ទាអាំង សាច់អាំងជាដើម ដើម្បីធានាបាននូវការការពារសុខុមាលភាព និង​ផលប្រយោជន៍អ្នកប្រើប្រាស់ កាលពីថ្ងៃទី១១ ខែកក្កដា ឆ្នាំ២០២៤កន្លងទៅ នៅ​ទីស្នាក់ការ​ផ្សារ​អូឡាំពិក។

នាឱកាសនោះ មន្ត្រីជំនាញក៏បានពន្យល់ អប់រំ ណែនាំ ដល់ក្រុមអាជីវករ អ្នកចែកចាយ លក់ដុំ លក់រាយ ត្រូវមានឯកសារពាក់ព័ន្ធច្បាស់លាស់ជាមុនសិន មុននឹងទទួលទិញយកមកលក់បន្ត ហើយ​កុំលាយបន្ថែមនូវសារធាតុគីមីហាមឃាត់ណាមួយ ដែលមិន​មាន​បទ​ប្បញ្ញត្តិ​បច្ចេក​ទេស​ទៅ​លើ​ផលិតផលម្ហូបអាហារ ដែលនាំឱ្យប៉ះពាល់ដល់សុខភាព សុវត្ថិភាពអ្នកប្រើប្រាស់ និង​បាន​បន្ត​ណែនាំ​ដល់ អាជីវករទាំងអស់ ឱ្យដាក់តាំងលក់ ផលិតផលទំនិញឱ្យត្រូវតាមលក្ខណៈ បច្ចេកទេស ដោយ​ញែកដាច់ចេញពីគ្នា រវាងផលិតផលប្រើប្រាស់ដែលជាសារធាតុគីមី និងទំនិញម្ហូបអាហារ និង​កា​រពិនិត្យមើលផលិតផលហួសកាលបរិច្ឆេទជាដើម។

ក.ប.ប. បានគូសបញ្ជាក់ថា ផលិតផលគីមីប្រើប្រាស់តាមគេហដ្ឋាន សំដៅដល់សារធាតុគីមី ឬ​ផលិត​ផល​គីមីដែលមានលក្ខណៈជាផលិតផលសម្រេច ដែលអាចបង្កគ្រោះថ្នាក់ដល់សុខភាព ហើយត្រូវបានប្រើប្រាស់ជាសារធាតុជំនួសសម្រាប់គោលបំណងផ្សេងៗនៃជីវភាពរស់នៅធម្មតា មាន​ដូចជា ការប្រើប្រាស់នៅតាមផ្ទះ រោងជាងប្រើប្រាស់ក្នុងសួន ឬកន្លែងផ្ត​ល់​សេវា​សាធារណៈ​ផ្សេងៗ​ទៀត៕

អត្ថបទ: BTV NEWS