គ្រូ និងសិស្ស អំពាវនាវសាធារណជនចូលរួមកម្មវីធី TVET Day ដើម្បីស្វែងយល់សារៈសំខាន់វិស័យបណ្តុះបណ្តាលជំនាញ

នៅសល់តែ ៥ថ្ងៃទៀតប៉ុណ្ណោះ ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៩ (TVET Day) នឹងត្រូវរៀបចំឡើងនៅកោះពេជ្រ។ គ្រូ និងសិស្សវិស័យ ធីវ៉េត បានអំពាវនាវសាធារណជនទូទៅ ជាពិសេសសិស្ស និស្សិត និងអាណាព្យាបាល ចូលរួមឱ្យបានច្រើនកុះករនិងកុំបីខាន ដើម្បីស្វែងយល់អំពីសារៈសំខាន់នៃការអប់រំក្នុងវិស័យ ធីវ៉េត នេះ។

ឯកឩត្តម ជិន តារ៉ា នាយកវិទ្យាស្ថានជាតិបណ្តុះបណ្តាលបច្ចេកទេស (NTTI) បានមានប្រសាសន៍ថា គិតត្រឹមថ្ងៃទី១០ ខែមិថុនានេះ ទាំងគ្រូបណ្តុះបណ្តាល និងសិស្ស និស្សិត នៃវិទ្យាស្ថាន បានត្រៀមខ្លួនរួចរាល់ក្នុងការចូលរួមដាក់តាំងបង្ហាញស្នាដៃសិស្ស គំរូ និងសមិទ្ធផលជាច្រើនផ្សេងៗទៀត ក្នុងកម្មវិធីទិវាជាតិនាពេលខាងមុខនេះ។

ឯកឧត្តម បានបន្តថា វិស័យ​អប់រំ​បណ្ដុះបណ្ដាល​បច្ចេកទេស និង​វិជ្ជាជីវៈ ​ដែល​ហៅ​កាត់​ថា ធីវ៉េត នេះ បាន​ដើរតួនាទី​យ៉ាងសំខាន់​ក្នុង​ដំណើរការ​កំណែទម្រង់សេដ្ឋកិច្ច ដែលជា​តួអង្គ​ដើម្បី​ធានា​នូវ​ការផ្គត់ផ្គង់​កម្លាំង​ពលកម្ម​ជំនាញ និង​សមត្ថភាព​ខ្ពស់​ ឱ្យ​ឆ្លើយតប​តម្រូវការ​ឧស្សាហកម្ម។ ឯកឧត្តម បានបន្ថែមទៀតថា ធីវ៉េត ក៏ជាស្ពានចម្លងមួយដែលប្រែក្លាយកម្លាំងពលកម្មអតិពលកម្ម ឱ្យទៅជាធនធានជំនាញពិតប្រាកដ ឬអ្នកបច្ចេកទេស ដែលមានសក្តានុពលបំផុតសម្រាប់តម្រូវការទីផ្សារការងារដ៏សម្បូរបែប ទាំងពេលបច្ចុប្បន្ន និងទៅអនាគត។

ក្រុមនិស្សិត ដែលកំពុងរៀនជំនាញ ធីវ៉េត និងត្រៀមដាក់តាំងបង្ហាញស្នាដៃមួយចំនួនក្នុងទិវាជាតិនេះ បានបង្ហាញអារម្មណ៍សប្បាយរីករាយដែលមានឱកាសចូលរួមកម្មវីធីនេះ ជាពិសេសការដាក់តាំងបង្ហាញនូវស្នាដៃដែលបានខិតខំរៀនសូត្រនាពេលកន្លងមកនេះ។ ជាមួយនេះ ក្រុមនិស្សិត បានអំពាវនាវឱ្យយុវជន សិស្សានុសិស្ស និស្សិត មាតាបិតា អាណាព្យាបាល និងសាធារណជនទូទៅ ចូលរួមឱ្យបានច្រើនកុះករ ដើម្បីទទួលបានព័ត៌មានសំខាន់ៗ ចំណេះដឹងថ្មីៗ ឱកាសរៀន និងឱកាសទទួលបានការងារធ្វើជាដើម។

ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៩ នឹងត្រូវរៀបចំឡើងរយៈពេល ២ថ្ងៃ គឺថ្ងៃទី១៥ និង១៦ ខែមិថុនា ឆ្នាំ២០២៦ ក្រោមប្រធានបទ «TVET ផ្តល់ជំនាញ ការងារ និងប្រាក់ចំណូល» ក្នុងគោលបំណងដើម្បីបានបង្ហាញពីសារៈសំខាន់នៃការអប់រំបណ្តុះបណ្តាលបចេ្ចកទេស និងវិជ្ជាជីវៈ មិនមែនជាជម្រើសទីពីរនោះទេ ប៉ុន្តែគឺជាជម្រើសដ៏ចម្បងសម្រាប់យុវជនដែលចង់ជោគជ័យក្នុងជីវិត្តក្នុងរយៈពេលខ្លីមានចីរភាព បរិយាបន្ន និងភាពធន់។ ទិវាជាតិនេះ នឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ស្ថិតនៅមជ្ឈមណ្ឌលសន្និបាត និងពិព័រណ៍កោះពេជ្រ​៕

អត្ថបទ៖ ឈិត បូរ៉ាវី