ពលរដ្ឋងាយរងគ្រោះ ១៥ឃុំ ចំនួន ១៥០គ្រួសារ ក្នុងស្រុកកំពង់សៀម ទទួល​បាន​អំណោយ​មនុស្សធម៌ពីសាខាកាកបាទក្រហមកម្ពុជាខេត្ត

នៅព្រឹកថ្ងៃព្រហស្បតិ៍ ៣រោច ខែអស្សុច ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី២៩ ខែតុលាឆ្នាំ២០២៦ ឯកឧត្តម អ៊ុន ចាន់ដា ប្រធានគណៈកម្មាធិការសាខា អមដំណើរដោយ ឯកឧត្តម លោកជំទាវ ថ្នាក់ដឹកនាំ លោក លោកស្រី សមាជិក សមាជិកាគណ:កម្មាធិការសាខា មន្ត្រីក្រុមប្រតិបត្តិសាខា រួមជាមួយ អនុសាខាស្រុក ក្រុមកាកបាទក្រហមឃុំ និង អ្នកស្ម័គ្រចិត្ត បានអញ្ជើញចុះជួបសំណេះសំណាល និង នាំយកអំណោយ របស់សាខាកាកបាទក្រហមកម្ពុជា ខេត្តកំពង់ចាម ជូនដល់ចាស់ជរាងាយរងគ្រោះ ខ្វះខាតជីវភាព ចំនួន ១៥០គ្រួសារ ដែល បានរៀបចំនៅក្នុង បរិវេណ សាលាស្រុកកំពង់សៀម ក្នុងឃុំអំពិល ស្រុកកំពង់សៀម។ ជនងាយរងគ្រោះទាំង១៥០គ្រួសារនោះ រួមមាន ចាស់ជរាគ្មានទីពឹង ៧៤ គ្រួសារ- ជនមានពិការភាព ២០គ្រួសារ- ស្ត្រីមេម៉ាយក្រីក្រ ០៩គ្រួសារ _ ទ័លលំបាក ៤៥គ្រួសារ និងអ្នកជំងឺរាំរៃ ០២គ្រួសារ។

ដោយភ្ជាប់ជាមួយក្តីកង្វល់ និង បណ្តាំផ្ញើសួរសុខទុក្ខ ពី ឯកឧត្តម សន្តិបណ្ឌិត នេត សាវឿន ប្រធានកិត្តិយសសាខា ពិសេស ពី សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាក្រហមកម្ពុជា ជូនដល់លោកតា លោកយាយ បងប្អូនជនរួមជាតិ ទាំងអស់ ដោយក្តីនឹករលឹក និងអាណិតអាសូរជាទីបំផុត នោះ , ឯកឧត្តម អ៊ុន ចាន់ដា ប្រធានគណ:កម្មាធិការសាខា បានសំណូមពរដល់បងប្អូនប្រជាពលរដ្ឋទាំងអស់ ពិសេសលោកតា លោកយាយចាស់ៗ ក្នុងស្ថានភាពដែលអាកាសធាតុមានការប្រែប្រួល សូមយកចិត្តទុកដាក់ ក្នុងការថែទាំសុខភាព សុវត្ថិភាពផ្ទាល់ខ្លួន ហើយកត្តាដែលសំខាន់នោះ គឺ ត្រូវប្រកាន់ខ្ជាប់នូវអនាម័យ រស់នៅស្អាត ហូបស្អាត ផឹកស្អាត , ពិសារអាហារដែលចម្អិនឆ្អិនល្អ ឲ្យបានខ្ជាប់ខ្ជួន ដើម្បី ពង្រឹងភាពស៊ាំបុគ្គល និង សហគមន៍ ។

អំណោយមនុស្សធម៌ ដែលបានផ្តល់ជូនលោកតា លោកយាយ បងប្អូន ជនងាយរងគ្រោះ ទាំង ១៥០ គ្រួសារ , ក្នុង ១ គ្រួសារ ទទួលបាន៖ – អង្ករ ២៥ គ.ក្រ , ទឹកត្រី ១យួរ, មីជាតិ ១កេស, ទឹកស៊ីអ៊ីវ ១យួរ, ត្រីខ ១០ កំប៉ុង , ឃីត ១កញ្ចប់ និង ថវិកា ៥០,០០០ រៀល៕