សិក្ខាកាម៦០រូបក្នុងខេត្តពោធិ៍សាត់ ទទួលបានការបណ្ដុះបណ្ដាលជំនាញវិជ្ជាជីវៈឥតគិតថ្លៃ

វគ្គបណ្ដុះបណ្ដាលលើមុខជំនាញ Applied Looker Studio សេវាកម្មសណ្ឋាគារ និងផ្សាដែក ក្រោមកិច្ចសហប្រតិបត្តិការរវាងវិទ្យាស្ថានពហុបច្ចេកទេសខេត្តពោធិ៍សាត់ ជាមួយ​វិទ្យាស្ថាន​អភិវឌ្ឍន៍ជំនាញខេត្តត្រាតប្រទេសថៃ ដែលបានដំណើរការអស់រយៈពេល៥ ថ្ងៃកន្លងមកនេះ ត្រូវបានបិទបញ្ចប់ នៅសាលាខេត្តពោធិ៍សាត់ ក្រោមអធិបតីភាពលោក រុន សារី អភិបាលរងនៃគណៈអភិបាលខេត្ត និងលោកស្រី ព្រហ្មមង្គល វង្សប៊ុនហ្វូ នាយកវិទ្យាស្ថានអភិវឌ្ឍន៍ជំនាញខេត្តត្រាតប្រទេសថៃ។

តាមរបាយការណ៍របស់លោក ង៉ែត តាត នាយកវិទ្យាស្ថានពហុបច្ចេកទេសខេត្តពោធិ៍សាត់ បានឲ្យដឹងថា វគ្គបណ្ដុះបណ្ដាលរយៈពេល៥ថ្ងៃនេះ មានសិក្ខាកាមចំនួន៦០នាក់ ក្នុងនោះស្រី៣១នាក់។ ទោះបីការសិក្សាមានរយៈពេលខ្លីក៏ពិតមែន ប៉ុន្តែប្រកបដោយគុណភាព និងប្រសិទ្ធភាពខ្ពស់ ដោយសារវគ្គនេះមានឧបករណ៍សម្ភារៈគ្រប់គ្រាន់ មានការអនុវត្តន៍​ច្រើនជាងទ្រឹស្ដី ហើយលោកគ្រូអ្នកគ្រូរៀបចំផែនការបង្រៀន បែងចែងពេលវេលាច្បាស់លាស់ មានវិធីសាស្ត្រក្នុងការផ្ទេរចំណេះដឹងនិងចំណេះធ្វើ ដែលធ្វើឲ្យសិក្ខាកាមងាយយល់និងឆាប់ចេះ។

លោកបន្តទៀតថា ការធ្វើកិច្ចសហប្រតិបត្តិការរវាងកម្ពុជា ថៃ ពិសេសរវាងខេត្តពោធិ៍សាត់ និងខេត្តត្រាតនេះ ពិតជាបានទទួលនូវគុណប្រយោជន៍ធំធេង មិនត្រឹមតែវិស័យទេសចរណ៍​ប៉ុណ្ណោះទេ ប៉ុន្តែទទួលបាននូវផលប្រយោជន៍ លើវិស័យការងារ និងការបណ្ដុះបណ្ដាលវិជ្ជាជីវៈផងដែរ។

ថ្លែងក្នុងពិធីបិទវគ្គបណ្ដុះបណ្ដាលនេះ លោក រុន សារី អភិបាលរង តំណាងឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ មានប្រសាសន៍ថា មុខជំនាញវិជ្ជាជីវៈដែលវិទ្យាស្ថាន​ពហុបច្ចេកទេសខេត្តពោធិ៍សាត់ និងវិទ្យាស្ថានអភិវឌ្ឍន៍​មុខជំនាញខេត្តត្រាតប្រទេសថៃ បានលើកឡើងមកនេះ គឺសុទ្ធសឹងតែមុខជំនាញល្អៗ ដែលប្អូនៗក្មួយៗ​មានការចាប់អារម្មណ៍​ចង់រៀន មិនត្រឹមតែប៉ុណ្ណោះជាមុខជំនាញដែលមានតម្រូវការ​នៅលើទីផ្សារផងដែរ។

ក្នុងឱកាសនោះក៏មានការប្រគល់សញ្ញាបត្របញ្ជាក់ការសិក្សា ​ដល់សិក្ខាកាមទាំង៦០នាក់ និងជូនវត្ថុអនុស្សាវរីយឲ្យគ្នាទៅវិញទៅមកផងដែរ៕