លោកស្រី Harris និងលោក Trump សម្រុកចុះយុទ្ធនាការ ខណៈការជជែកដេញដោលកាន់តែជិត

លោកស្រី Kamala Harris និងលោក Donald Trump បានសម្រុកធ្វើយុទ្ធនាការជាថ្មីនៅសហរដ្ឋអាមេរិកកាលពីថ្ងៃពុធសប្ដាហ៍នេះ ខណៈការស្ទង់មតិថ្មីបង្ហាញថាការប្រកួតប្រជែងតំណែងកៅអីសេតវិមាននៅតែស្ថិតកំពុងក្ដៅគគុក មិនដល់មួយសប្តាហ៍មុនការជជែកដេញដោលដំបូងដ៏សំខាន់របស់បេក្ខជនប្រធានាធិបតី។

លោកស្រីអនុប្រធានាធិបតី Harris ដែលបានធ្វើឱ្យក្តីសង្ឃឹមរបស់គណបក្សប្រជាធិបតេយ្យរស់ឡើងវិញក្នុងរយៈពេលជាង ២ ខែរហូតដល់ការបោះឆ្នោតថ្ងៃទី ៥ ខែវិច្ឆិកា នឹងបង្ហាញការលើកលែងពន្ធដែលបានស្នើឡើងសម្រាប់អាជីវកម្មខ្នាតតូច ខណៈលោកស្រីបញ្ចេញគោលនយោបាយសេដ្ឋកិច្ចរបស់ខ្លួនក្នុងអំឡុងពេលដំណើរទស្សនកិច្ចទៅកាន់រដ្ឋ New Hampshire ។

ទន្ទឹមនឹងនេះដែរ លោក Trump បានចូលរួមក្នុងព្រឹត្តិការណ៍មួយដែលបានថតទុកនៅលើបណ្ដាញសារព័ត៌មាន Fox News នៅក្នុងរដ្ឋ Pennsylvania បន្ទាប់ពីអវត្តមានគួរឱ្យកត់សម្គាល់ដោយគណបក្សសាធារណរដ្ឋពីយុទ្ធនាការ នៅថ្ងៃទិវាពលកម្មសហរដ្ឋអាមេរិកចុងសប្តាហ៍ដែលត្រូវបានគេមើលឃើញថាជាការចាប់ផ្តើមនៃការប្រកួតប្រជែងដណ្ដើមប្រជាប្រិយភាពចុងក្រោយ។

គូប្រជែងធំៗទាំង២ កំពុងសម្រុកធ្វើយុទ្ធនាការនាទីចុងក្រោយ មុនពេលការជជែកដេញដោលប្រធានាធិបតីនៅថ្ងៃអង្គារសប្ដាហ៍ក្រោយ នៅពេលអ្នកបោះឆ្នោតអាមេរិករាប់លាននាក់នៅទីបំផុតនឹងមើលឃើញបេក្ខជនទាំង២ធ្វើសមរភូមិពាក្យសម្ដីទល់មុខគ្នាលើកដំបូងនៅលើកញ្ចក់ទូរទស្សន៍៕