អ្នកចូលនិវត្តន៍អាហ្សង់ទីន ប៉ះទង្គិចជាមួយនគរបាលអំឡុងតវ៉ាប្រឆាំងការប្រើសិទ្ធិវ៉េតូកំណែទម្រង់ ប្រាក់សោធននិវត្តន៍

អ្នកចូលនិវត្តន៍ច្រើននាក់ បានប៉ះទង្គិចជាមួយនគរបាលបង្ក្រាបកុបកម្ម ក្នុងអំឡុងការតវ៉ាមួយ ដែលបានធ្វើឡើងនៅទីក្រុង Buenos Aires កាលពីថ្ងៃពុធ ប្រឆាំងទៅនឹងការប្រើសិទ្ធិវ៉េតូរបស់ប្រធានាធិបតី លោក Javier Milei លើកំណែទម្រង់សោធននិវត្តន៍ ដែលនឹងបង្កើនប្រាក់សោធននិវត្តន៍របស់ពួកគេ ក្នុងចំណោមអត្ថប្រយោជន៍ផ្សេងៗទៀត។

នគរបាលបង្ក្រាបកុប្បកម្ម បានរារាំងក្រុមអ្នកតវ៉ានៅជិតអគារសភាជាតិ ខណៈក្រុមអ្នកចូលនិវត្តន៍ បានរុញច្រាន និងវាយទម្លាយខែលការពាររបស់នគរបាល។

មនុស្សជាច្រើន បានស្រែកពាក្យស្លោក និងកាន់ស្លាកសញ្ញាសរសេរថា «កុំបង្កបញ្ហាដល់មនុស្សចាស់» ដោយទាមទារសិទ្ធិនៃការចូលនិវត្តន៍របស់ពួកគេ។

ការចេញផ្សាយនៅលើសារព័ត៌មានផ្លូវការរបស់ប្រទេស បាននិយាយថា លោក Milei កាលពីថ្ងៃចន្ទ ទី២ ខែកញ្ញា បានប្រើសិទ្ធវ៉េតូលើកំណែទម្រង់ប្រាក់សោធននិវត្តន៍ ដែលត្រូវបានអនុម័តដោយសភាកាលពីខែមុន ដោយលោកបាននិយាយថា វិធានការនេះនឹងធ្វើឲ្យប៉ះពាល់ដល់គណនេយ្យរបស់រដ្ឋ។

លោក Milei បានចូលកាន់តំណែងកាលពីខែធ្នូ និងបានអនុវត្តវិធានការរឹតត្បិតថវិកាតឹងរ៉ឹង ជាផ្នែកមួយនៃការប៉ុនប៉ងដើម្បីទប់ស្កាត់អតិផរណាមានតួលេខបីខ្ទង់ ទោះបីជាមានការកើនឡើងភាពក្រីក្រ នៅក្នុងប្រទេសអាមេរិកខាងត្បូងមួយនេះក៏ដោយ។

សមាជិកសភា បានអនុម័តយ៉ាងច្រើនលើសលប់នូវកំណែទម្រង់ដែលនឹងដំឡើងប្រាក់សោធននិវត្តន៍ស្របតាមអតិផរណា។ លោកប្រធានាធិបតី ធ្លាប់បាននិយាយថា លោកនឹងប្រើសិទ្ធិវ៉េតូ ដោយបានបន្ថែមភាពប្រេះឆាជាមួយសភាគ្រប់គ្រងដោយគណបក្សប្រឆាំង។