“ម៉ែស្អាត” ខ្សែរឿងជីវិតចាក់ដោតក្ដីស្រលាញ់របស់ម្ដាយអ្នកក្រ

រឿង “ម៉ែស្អាត” ជាខ្សែភាពយន្តជីវិតរបស់ស្ថានីយទូរទស្សន៍បាយ័នសហការជាមួយផលិតកម្មសាស្រ្តាហ្វីម(Sastra film) កំពុងពេញនិយមពីសំណាក់ទស្សនិកជន និងមានការចាប់អារម្មណ៍តាមដានទស្សនាយ៉ាងច្រើនកុះករពីគ្រប់ទិសទី។ ភាពយន្តនេះ មានប្រជាប្រិយភាពពីសំណាក់ប្រិយមិត្តគ្រប់ស្រទាប់វ័យដោយមានការកោតសរសើរនូវសាច់រឿង និងខ្លឹមសារអប់រំចាក់ដោតពីជីវិតពិតនៃសង្គមបច្ចុប្បន្នផងដែរ។

រឿង “ម៉ែស្អាត” ត្រូវបានផលិតឡើងដើម្បីឆ្លើយតបទៅនឹងការសំណូមពរពីបណ្ដាអ្នកគាំទ្រយ៉ាងច្រើនដោយបានផ្ញើសារសុំឲ្យថតរឿងដែលទាក់ទងនឹងក្ដីស្រឡាញ់របស់ឪពុកម្ដាយ។  នេះបើតាមអ្នកដឹកនាំរឿង លោក សួង ប្រុសប្រាថ្នា បាននិយាយ។ អ្នកដឹកនាំរឿង “ម៉ែស្អាត” រូបនេះក៏បានបន្ថែមថា ម្យ៉ាងទៀតក្រុមការងារបានតាមដានសារព័ត៌មានជាច្រើនទាក់ទងនឹងការសម្រាលទារក ហើយបានបោះបង់ក្មេងចោលនៅតាមធុងសំរាម។ លោកឲ្យដឹងទៀតថា ហេតុដូចនេះក្រុមការងារក៏សម្រេចផលិតរឿង “ម៉ែស្អាត” ដើម្បីជាការផ្ញើសារទៅដល់អ្នកទស្សនាឲ្យបានជ្រួតជ្រាបពីក្ដីស្រឡាញ់និងការលះបង់របស់ឪពុកម្ដាយចំពោះកូន បើទោះបីពួកគាត់ក្លាយជាអ្វីក៏ដោយ។

រឿង “ម៉ែស្អាត” កំពុងចាក់ផ្សាយលើកញ្ចក់ទូរទស្សន៍បាយ័ន រៀងរាល់ថ្ងៃព្រហស្បតិ៍-សុក្រ វេលាម៉ោង ៩ ដល់ ម៉ោង ១០ យប់។