វ៉ៅវ! រឿងចប់មិនប៉ុន្មានម៉ោង ហ្វេនៗមិនអស់ចិត្តសុំផលិតវគ្គ ២បន្ត 

ដូចដែលបានដឹងហើយថា ស្ថានីទូរទស្សន៍ បាយ័ន តែងតែនាំមកនូវរឿងភាគខ្មែរល្អជាច្រើនបន្តបន្ទាប់ ដើម្បីបំរើអារម្មណ៍ដល់ទស្សនិកជនរៀងរាល់សប្តាហ៍។

ជាក់ស្តែង នៅបច្ចុប្បន្ននេះរឿងភាគខ្មែរដែលកំពុងចាក់ផ្សាយលើកញ្ចក់ទូរទស្សន៍ បាយ័ន មានដូចជា រឿង «សង្គ្រាមបងប្អូន», រឿង «នាងជីវី», រឿង «ម្នាក់ក្នុងចំណោមមួយលាន» និងរឿង «ផ្ទះស៊ីជម្ពូ» ដែលទើបនឹងឃ្លាតឆ្ងាយពីចក្ខុ ពុកម៉ែ បងប្អូនមិនប៉ុនា្មនម៉ោងនេះ។

ក្នុងនោះយើងសង្កេតឃើញថា មានបងប្អូនទស្សនិកជនយ៉ាងច្រើនហាក់មិនទាន់អស់ចិត្ត ជាមួយសាច់រឿងផ្ទះស៊ីជម្ពូបើទោះបីវាចប់ដោយបរិបូរណ៍ហើយក្តី។ ហ្វេនៗក្នុងរឿងនេះ បាននាំគ្នាបញ្ចេញមតិស្នើឱ្យមានការផលិតវគ្គ២ជាបន្ត និងមិនចង់ឱ្យរឿងភាគខ្មែរនេះចប់ទាល់តែសោះ។

គួររម្លឹកផងដែលថារឿង ផ្ទះស៊ីជម្ពូ ស្ថិតក្រោមការផលិតពីផលិតកម្ម Sastra Film និងនិពន្ធសាច់រឿងដោយកញ្ញា​ ឈុន ដានីន ដឹកនាំសម្តែងដោយលោក ប៊ុន ចាន់ពេជ្រ។ ក្នុងនោះមានការចូលរួមពីតួអង្គសម្តែងសំខាន់ៗដូចជា កញ្ញា រចនា រាវ៉ាឌី កញ្ញា ឈុំ ចាន់ដរ៉ា លោក ខេ ស៊ីញ លោក លី ប៊ៀ និងសិល្បៈករជាច្រើនរូបទៀត។

ទោះបីរឿង ផ្ទះស៊ីជម្ពូ បានបញ្ចប់ហើយក្តី ខាងទូរទស្សន៍បាយ័នបានត្រៀមរឿង «សុំស្រលាញ់អតីតភរិយា» ដើម្បីចូលមកបំរើចក្ខុបងប្អូនទស្សនិកជនជាបន្តទៀត។ កុំភ្លេចរង់ចាំតាមដានទស្សនាទាំងអស់គ្នាណា៕

អត្ថបទដោយ៖ Ha Ti