ប្រទេស ៥២ លើពិភពលោកកំពុងរឹតត្បិតចំពោះអ្នកដំណើរមកពីកូរ៉េខាងត្បូង

ទិន្នន័យរបស់ក្រសួងការបរទេសកូរ៉េខាងត្បូងបានបង្ហាញនៅថ្ងៃសុក្រនេះថា ប្រទេសច្រើនជាង ៥០ លើពិភពលោកកំពុងរឹតត្បិតអ្នកដំណើរពីប្រទេសកូរ៉េខាងត្បូងទៅកាន់ប្រទេសខ្លួនដោយបានហាមឃាត់យ៉ាងតឹងរឹងលើពលរដ្ឋប្រទេសនេះ។

ក្នុងប៉ុន្មានសប្តាហ៍កន្លងមកនេះករណីឆ្លងក្នុងប្រទេសកូរ៉េខាងត្បូងបានកើនឡើងជាង ២០០០ករណី ដែលវាបានបណ្ដាលឲ្យប្រទេសមួយចំនួននៃពិភពលោកធ្វើការហាមប្រាមនិងរឹតត្បិតចំពោះជនជាតិកូរ៉េខាងត្បូង និងជនបរទេសផ្សេងទៀតដែលបានមកលេងក្នុងបណ្ដាប្រទេសនៅអាស៊ី។ ក្រៅពីនោះបណ្តាប្រទេសអ៊ឺរ៉ុបមួយចំនួនដូចជាប្រទេស Bosnia-Herzegovina ប្រទេស Serbia ប្រទេស Iceland និងប្រទេស Croatia ក៏បានចាប់ផ្តើមរឹតបន្តឹងចំពោះជនជាតិកូរ៉េដោយបានដាក់ពួកគេឲ្យនៅដាច់ដោយឡែកពេលពួកគេចូលក្នុងបណ្ដាប្រទេសទាំងនេះ។ បណ្តាប្រទេសទាំងនេះក៏បានបន្ថែមការរឹតត្បិតអ្នកដំណើរមកពីប្រទេសចិន ជប៉ុន សិង្ហបុរី និងអ៊ីតាលីដែលជាកន្លែងផ្ទុះឡើងខ្លាំងនៃវីរុស។

គេហទំព័ររបស់ក្រសួងការបរទេសបង្ហាញថា ប្រទេសចិនមានខេត្តចំនួន ៥ ដែលដាក់ដំណើរការដាច់ដោយឡែកពីគ្នាសម្រាប់អ្នកដំណើរអន្តរជាតិទាំងអស់ ឬអ្នកធ្វើដំណើរមកពីប្រទេសកូរ៉េខាងត្បូង និងប្រទេសជប៉ុន។ ប៉ុន្តែបញ្ជីនេះទំនងជានឹងកើនឡើងខណៈដែលរដ្ឋាភិបាលខេត្តជាច្រើនបាននឹងកំពុងអនុវត្តវិធានការស្រដៀងគ្នានេះដែរ។

គិតមកត្រឹមថ្ងៃសុក្រនេះប្រទេសកូរ៉េខាងត្បូងបានបន្ថែមចំនួនអ្នកឆ្លង ២៥៦ ករណីថ្មីដែលនាំឲ្យអ្នកឆ្លងសរុបឡើងដល់ ២ ០២២ នាក់ និងមានអ្នកស្លាប់ ១៣ នាក់។ ភាគច្រើននៃករណីដែលបានបញ្ជាក់គឺនៅក្នុងក្រុង Daegu និងខេត្ត Gyeongsang ភាគខាងជើងនៃប្រទេស៕