ស.ស.យ.ក ប្រកាសរៀបចំពានមិត្តភាពយុវជនអន្ដរក្រសួង លើកទី១០ ខណៈមន្ដ្រីពេញសិទ្ធិទើបអាចចូលរួមបាន

សហភាពសហព័ន្ធយុវជនកម្ពុជា(ស.ស.យ.ក) បានប្រកាសរៀបចំការប្រកួតបាល់ទាត់ពានរង្វាន់ «មិត្តភាពយុវជនអន្ដរក្រសួង-ស្ថាប័ន» លើកទី១០ ដែលគ្រោងប្រព្រឹត្តទៅ ពីថ្ងៃទី០២ ខែមីនា ដល់ថ្ងៃទី២៥ ខែឧសភា ឆ្នាំ២០២៥ ខាងមុខ នៅកីឡដ្ឋានកងយោធពលខេមរភូមិន្ទ(ស្ដាតចាស់) រាជធានីភ្នំពេញ ។

យោងតាមសេចក្ដីជូនដំណឹងចុះហត្ថលេខាដោយឯកឧត្តមឧបនាយករដ្ឋមន្ដ្រី ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានគណៈអចិន្ដ្រយ៍គណៈកម្មាធិការកណ្ដាល នៅថ្ងៃទី០៩ ខែមករា បានឲ្យដឹងថា ការចុះឈ្មោះចូលរួមប្រកួតព្រឹត្តិការណ៍ប្រចាំឆ្នាំនេះ ចាប់ផ្ដើមពីថ្ងៃជូនដំណឹង រហូតដល់ថ្ងៃទី៣១ ខែមករា ឆ្នាំ២០២៥ ខាងមុខ នៅអគារ The Kampus ។

ចំពោះលក្ខខណ្ឌកីឡាករមានសិទ្ធលេងបាន លុះត្រាតែមានលក្ខណៈសម្បត្តិ ដូចជា៖ ១-មន្ត្រីរាជការស៊ីវិល និងមានក្របខណ្ឌពេញសិទ្ធិ ។ ២-កីឡាករដែលទទួលបានការអនុញ្ញាតពីគណៈកម្មាធិការ ។ ៣-កីឡាករមានអាយុចាប់ពី ២៣ឆ្នាំឡើងទៅ ។ ៤- ត្រូវមានអត្តសញ្ញាណបណ្ណសញ្ជាតិខ្មែរ ឬលិខិតឆ្លងដែន និងបណ្ណសម្គាល់ការងារ ។ ៥-ត្រូវមានព្រះរាជក្រឹត្យ អនុក្រឹត្យ ប្រកាសតាំងស៊ប់ ឬឯកសារដែលមានតម្លៃស្មើ និង ៦-ចំពោះមេធាវី គឺត្រូវជាមេធាវីពេញសិទ្ធិ និងបានចុះឈ្មោះក្នុងបញ្ជីគណៈមេធាវីនៃព្រះរាជាណាចក្រកម្ពុជា ជាដើម ។

ចំពោះលក្ខខណ្ឌកីឡាករ មិនអាចចូលរួមប្រកួតបាន មានដូចជា៖ កីឡាករ ឬអតីតកីឡាករជម្រើសជាតិ និងអាជីពគ្រប់រូបភាព ព្រមទាំងមន្ត្រីជាប់កិច្ចសន្យា បុគ្គលិកអណ្តែត និងមន្ត្រីកម្មសិក្សា គឺមិនត្រូវបានអនុញ្ញាតឱ្យចូលរួមប្រកួត នោះឡើយ ។ សម្រាប់គ្រូបង្វឹក និងកីឡាករម្នាក់ គឺមានសិទ្ធលេង ឬដឹកនាំក្រុមបានតែ ១ក្រុមប៉ុណ្ណោះ ។ រាល់ការចុះឈ្មោះ ក្រុមនីមួយៗ ត្រូវបង់វិភាគទានចំនួន ១លាន ៥សែនរៀល សម្រាប់ទ្រទ្រង់ការប្រកួត ។

គួរដឹងថា ពានរង្វាន់មិត្តភាពយុវជនអន្ដរក្រសួង-ស្ថាប័ន ត្រូវបានរៀបចំឡើង ក្រោមគំនិតផ្ដួចផ្ដើមរបស់ឯកឧត្តមឧបនាយករដ្ឋមន្ដ្រី ហ៊ុន ម៉ានី ក្នុងគោលបំណងលើកកម្ពស់ស្មារតីសាមគ្គីភាព មិត្តភាព ពង្រឹង និងពង្រីកកិច្ចសហប្រតិបត្តិការរវាងយុវជនតាមក្រសួង-ស្ថាប័នរដ្ឋ ។ កាលពីឆ្នាំ២០២៤ ព្រឹត្តិការណ៍នេះ មានក្រុមតំណាងក្រសួង-ស្ថាប័នចំនួន ៣៤ក្រុមចូលរួម ខណៈក្រសួងអប់រំ យុវជន និងកីឡា បានគ្រងជើងឯក បន្ទាប់ពីយកឈ្នះក្រុមក្រសួងសុខាភិបាល ២-១ ក្នុងវគ្គផ្ដាច់ព្រ័ត្រ៕ អត្ថបទ លី ឈុនឡា