មន្ដ្រីជាន់ខ្ពស់កីឡាជឺជីតស៊ូថា ការឈ្នះមេដាយមាស មឿនលីម សុបញ្ញា លើទឹកដីអាមេរិកជាសញ្ញាណដ៏ល្អ

កីឡាករជឺជីតស៊ូជម្រើសជាតិកម្ពុជា មឿនលីម សុបញ្ញា បានឈ្នះមេដាយមាស ក្នុងការប្រកួត Jiu-Jitsu World League California X នៅសហរដ្ឋអាមេរិក កាលពីចុងសប្ដាហ៍កន្លងទៅ ខណៈមន្ដ្រីជាន់ខ្ពស់សហព័ន្ធកីឡាជឺជីតស៊ូកម្ពុជា បានចាត់ទុកជ័យជម្នះនេះ គឺជាសញ្ញាណដ៏ល្អ សម្រាប់ការបោះជំរុំហ្វឹកហាត់នៅទីនោះ។

នេះគឺជាការប្រកួតលក្ខណៈអន្ដរជាតិលើកដំបូង បន្ទាប់ពី មឿនលីម សុបញ្ញា បានចេញទៅហ្វឹកហាត់រយៈពេល ២៥ថ្ងៃ ក្នុងបេសកកម្មបោះជំរុំហ្វឹកហាត់រយៈពេល ៣ខែរបស់ខ្លួន នៅរដ្ឋកាលីហ្វ័រញ៉ា សហរដ្ឋអាមេរិក ក្រោមការសម្របសម្រួល និងរៀបចំរបស់សហព័ន្ធ និងទទួលបានការឧបត្ថម្ភគាំទ្រពីលោក ទូច សុភ័ក្រ និងភរិយា។

ចំពោះការប្រកួតក្នុងកម្មវិធី Jiu-Jitsu World League California X នេះដែរ បញ្ញា បានប្រកួតលើវិញ្ញាសា Gi ឯកត្តជនបុរស កម្រិតខ្សែខៀវ ប្រភេទទម្ងន់ក្រោម ៨២.៥គីឡូក្រាម  ដែលមានបេក្ខភាពចុះឈ្មោះចូលរួមប្រកួតចំនួន ២២នាក់ ។ ជាលទ្ធផល បញ្ញា ធ្វើបានយ៉ាងល្អ ដោយដណ្ដើមបានមេដាយមាស បន្ទាប់ពីឈ្នះ ៤ប្រកួតជាប់គ្នា ក្នុងនោះបានផ្ដួលដៃគូឲ្យចុះចាញ់ ៣ប្រកួតឯណោះ

លោក Jasper Paas អនុប្រធានសហព័ន្ធ និងជាគ្រូបង្វឹកក្រុមកីឡាជឺជីតស៊ូជម្រើសជាតិកម្ពុជា បានចាត់ទុកនេះគឺជាជ័យជម្នះដ៏អស្ចារ្យ សម្រាប់ មឿនលីម សុបញ្ញា ដែលសម្រេចបាននូវសមិទ្ធផលគួរឲ្យភ្ញាក់ផ្អើល ដូចអ្វីដែលសហព័ន្ធជឿជាក់លើរូបគេ ។ នេះគឺជាមូលហេតុ ដែលសហព័ន្ធបានបញ្ជូនរូបគេទៅបោះជំរុំហ្វឹកហាត់ ៣ខែនៅអាមេរិក ហើយជ័យជម្នះនេះ បានបង្ហាញឲ្យឃើញពីភាពរីកចម្រើនយ៉ាងឆាប់រហ័សរបស់ បញ្ញា ដើម្បីត្រៀមការប្រកួតធំៗជាច្រើន ក្នុងឆ្នាំ២០២៥ ពិសេសស៊ីហ្គេម លើកទី៣៣ នៅថៃ នាចុងឆ្នាំនេះ។

គួរដឹងថា មឿនលីម សុបញ្ញា បានចេញទៅបោះជំរុំហ្វឹកហាត់ នៅមជ្ឈមណ្ឌល Art of Jiu-Jitsu គឺជាកន្លែងប្រមូលផ្ដុំដោយគ្រូបង្វឹកលំដាប់ពិភពលោក ដែលបានបង្កើតនូវអត្តពលិកជើងឯកពិភពលោក និងគ្រូបង្វឹកជាច្រើន ក្នុងនោះក៏មានវត្តមានវីរកីឡាការិនីឆ្នើមកម្ពុជា ខាន់ ចេសា ជាដើម ដែលមានមូលដ្ឋាននៅរដ្ឋកាលីហ្វ័រញ៉ា សហរដ្ឋអាមេរិក ។ បញ្ញា បានចាកចេញពីកម្ពុជា កាលពីពាក់កណ្ដាលខែមករា ហើយគ្រោងនឹងត្រឡប់មកមាតុភូមិវិញ នៅមុនពិធីបុណ្យចូលឆ្នាំថ្មីប្រពៃណីជាតិខ្មែរ នាខែមេសាខាងមុខ៕ អត្ថបទ លី ឈុនឡា