ណាហ្គា ប៉ះមហាផ្ទៃ កាត់សេចក្ដីក្រុមឡើងវគ្គ ១/៤ ខណៈត្បូងឃ្មុំ ជួប ISI ក្នុងជើងទី១ នៃពានសម្ដេចតេជោ-ថ្នាក់ជាតិ

ក្រុមណាហ្គាវើលដ៏ នឹងត្រូវបើកទ្វារកីឡដ្ឋានខេត្តកំពង់ស្ពឺ ទទួលសមាគមកីឡាបាល់ទាត់ក្រសួងមហាផ្ទៃវិញម្ដង ដើម្បីកាត់សេចក្ដីរកក្រុមឈ្នះឡើងវគ្គ ៨ក្រុមចុងក្រោយ នៃពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១៨ (ថ្នាក់ជាតិ) ឆ្នាំ២០២៤/២៥ នាល្ងាចថ្ងៃទី១២ ខែកុម្ភៈ ឆ្នាំ២០២៥ ស្របពេលក្រុមជើងឯកថ្នាក់ខេត្ត មន្ទីរអប់រំ យុវជន និងកីឡា ខេត្តត្បូងឃ្មុំ ត្រូវជួបក្រុម ISI ដង្កោសែនជ័យ ក្នុងជើងទី១ លើទឹកដីរបស់ខ្លួន ។

សម្រាប់ក្រុមណាហ្គាវើលដ៏ កំពុងមានប្រៀប ក្នុងការប្រជែងកៅអីវគ្គបន្ដ តែក៏មិនទាន់សង្ឃឹមខ្ពស់ពេកដែរ ដ្បិតជើងទី១ អតីតក្រុមជើងឯកឆ្នាំ២០១៣ ណាហ្គាវើលដ៏ បានយកឈ្នះអតីតក្រុមជើងឯកឆ្នាំ២០១៤ ក្រសួងមហាផ្ទៃ ១-០ ប៉ុណ្ណោះ នៅកីឡដ្ឋាន អេអាយអេ ខេអឹមអេចផាក ។ ដូច្នេះជំនួបជើងទី២ ស្អែកនេះ នឹងក្លាយជាការប្រកួតដ៏តានតឹង សម្រាប់ក្រុមទាំងពីរ ដែលទាមទារជ័យជម្នះរៀងខ្លួន ដើម្បីក្ដោបឱកាសដណ្ដើមកៅអីវគ្គ ៨ក្រុមចុងក្រោយ ។

ក្រឡេកទៅចាប់អារម្មណ៍ក្រុមជើងឯកពានរង្វាន់សម្ដេចតេជោ-ថ្នាក់ខេត្ត មន្ទីរអប់រំ យុវជន និងកីឡា ខេត្តត្បូងឃ្មុំ វិញ នឹងត្រូវជួបក្រុមភ្ញៀវ ISI ដង្កោសែនជ័យ ក្នុងជើងទី១ ។ ការប្រកួតនេះ ក៏កំពុងស្ថិតក្នុងការចាប់អារម្មណ៍របស់អ្នកគាំទ្រដូចគ្នា បន្ទាប់ពីត្បូងឃ្មុំ ធ្វើបានយ៉ាងល្អ ក្នុងការប្រកួតថ្នាក់ខេត្តកន្លងមក ។ ដូច្នេះការជួបក្រុមកំពុងឈរលេខ៧ ក្នុងលីគ ស្អែកនេះ អាចជាឱកាសមួយ សម្រាប់ពួកគេ បើកទំព័រប្រវត្តិសាស្ដ្រដណ្ដើមកៅអីវគ្គ ៨ក្រុមចុងក្រោយនៃពានសម្ដេចតេជោ-ថ្នាក់ជាតិ ។ ចំពោះជំនួបជើងទី២ រវាងក្រុមទាំងពីរ គឺគ្រោងធ្វើឡើងនាថ្ងៃទី១៩ ខែកុម្ភៈ នៅទឹកដីក្រុមដំរីជ័យវិញម្ដង ។

គួរដឹងថា សម្រាប់ជំនួបរវាងក្រុមណាហ្គាវើលដ៏ និងក្រសួងមហាផ្ទៃ ក្រុមឈ្នះ នឹងត្រូវឡើងទៅជួបក្រុមភ្នំពេញក្រោន ក្នុងវគ្គ ៨ក្រុមចុងក្រោយ បន្ទាប់ពីក្រុមសិង្ហក្រហមនេះ បានទម្លាក់ក្រុមឈើតុំខេត្តពោធិ៍សាត់ ក្នុងវគ្គ ១៦ក្រុមចុងក្រោយ ។ រីឯក្រុមឈ្នះ ក្រោយជំនួប ២ជើង រវាងត្បូងឃ្មុំ និង ISI ដង្កោសជ័យ នឹងត្រូវឡើងទៅជួបក្រុមបឹងកេត នៅវគ្គ ១/៤ផ្ដាច់ព្រ័ត្រ បន្ទាប់ពីក្រុមនាគខៀវ បានយកឈ្នះក្រុមមន្ទីរអប់រំ យុវជន និងកីឡាខេត្តកំពង់ចាម ១៨-១ ក្នុងវគ្គ ១៦ក្រុមចុងក្រោយ កាលពីថ្មីៗ ៕ អត្ថបទ លី ឈុនឡា