អន្តរក្រសួងចុះត្រួតពិនិត្យ និងវាយតម្លៃការសាងសងផ្លូវក្រាលកៅស៊ូ១ខ្សែ នៅស្រុកគិរីវង់

តាកែវ៖ ឯកឧត្តមបណ្ឌិត ចាន់ ដារ៉ុង រដ្ឋលេខាធិការតំណាងលោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី១៨ ខែកុម្ភៈ ឆ្នាំ២០២៥នេះ បានដឹកនាំក្រុមការងារចុះត្រួតពិនិត្យ និងវាយតម្លៃលើការងារជួសជុលផ្លូវក្រាលកៅស៊ូពីរជាន់ (DBST) ចំនួន១ខ្សែ ប្រវែង ២ ០០០ម៉ែត្រ និងស្ថាបនាប្រឡាយបេតុងប្រវែង ២,០០០ម៉ែត្រ នៅឃុំព្រះបាទជាន់ជុំ និងឃុំព្រៃរំដេង ស្រុកគិរីវង់ ខេត្តតាកែវ ។

ការស្ថាបនា ផ្លូវខាងលើនេះ បន្ទាប់ពីទទួលបានគោលការណ៍ឯកភាពពីក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុរួចមក នាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ ក៏បានអនុវត្តការងារស្ថាបនាផ្លូវខាងលើនេះភ្លាម ដើម្បីចូលរួមចំណែក​ដល់​ការ​លំបាក​របស់​ប្រជា​ពលរដ្ឋ​ មានផ្លូវល្អសម្រាប់ធ្វើដំណើរ និងការរ​ក​ស៊ី​ទទួល​ទាន​ផ្សេងៗ ។

ឯកឧត្តមបណ្ឌិត ចាន់ ដារ៉ុង បានឱ្យដឹងថា ក្រសួងអភិវឌ្ឍន៍ជនបទ ក្នុង​នាម​ជា​សេនា​ធិការ​ផ្ទាល់​របស់​រាជ​រដ្ឋាភិបាលកម្ពុជា បាននិងកំពុងជំរុញការងារសាងសង់ ស្ដារឡើងវិញ កែលម្អ ពង្រីក ថែទាំ និងជួសជុលផ្លូវជនបទ ក្រាលកៅស៊ូពីរជាន់ ឬបេតុង ដើម្បី​បង្ក​ភាព​ងាយ​ស្រួល​ក្នុង​កា​រ​ធ្វើ​ដំណើរ​របស់ប្រជាពលរដ្ឋ កាត់បន្ថយពេលវេលា និងកាត់​បន្ថយ​ចំណាយ​លើ​ការ​ដឹក​ជញ្ជូន​កសិផល និងទំនិញផ្សេងៗនៅជនបទ។

ឯកឧត្តមបណ្ឌិតបានបន្តថា បញ្ហានេះ​ក្រសួង​បាន​នឹង​កំពុង​យក​ចិត្ត​ទុក​ដាក់​ខ្ពស់​លើ​ការ​ពង្រឹង​សមត្ថភាព​ជំនាញក្នុងគោលដៅ បង្កើន​គុណភាព និងធានាចីរភាពផ្លូវជនបទ ព្រោះនៅ​ជន​បទ​មាន​សារៈ​សំខាន់ ក្នុង​ការ​ជំរុញ​ដំណើរ​អន្តរកម្មផ្នែកសេដ្ឋកិច្ច និងសង្គម កិច្ចនៅជន​បទ​ជា​ពិសេស​ការ​​កាត់​បន្ថយ​គម្លាត​តំបន់​ជន​បទ និងទីក្រុងផងដែរ, ជាក់ស្តែងជុំវិញផ្លូវជនបទនេះ ក្រសួង​អភិវឌ្ឍន៍​ជនបទ បានកំពុងប្រែក្លាយ ផ្លូវ​ក្រាល​ក្រួសជាច្រើនខ្សែ ទៅជាផ្លូវក្រាលកៅស៊ូ ឬផ្លូវបេតុង សំដៅ​ធានា​បាន​ការ​ប្រើ​ប្រាស់​យូរ​អង្វែង ដើម្បីជំរុញដំណើរអន្តរកម្មផ្នែកសង្គម-សេដ្ឋកិច្ច និង​ការ​ផ្សារ​ភ្ជាប់សកម្មភាពធុរកិច្ចផ្សេងៗ រវាង​តំបន់ជនបទ និងទីប្រជុំជន ។

នាឱកាសនោះដែរ ឯកឧត្តមរដ្ឋលេខាធិការ និងគណៈកម្មការអន្តរក្រសួង បានជួប​សំណេះ​សំណាល​ជាមួយ​អាជ្ញាធរ និងប្រជាពលរដ្ឋ, ក្នុងនោះលោក​បាន​ពាំនាំ​នូវ​ប្រសាសន៍​ផ្តាំ​ផ្ញើ​សាកសួរ​សុខ​ទុក្ខ​ពី​សម្តេចតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងលោកជំទាវបណ្ឌិត ពេជ ចន្ទមុន្នី និងលោក ឆាយ ឫទ្ធិសែន រដ្ឋមន្ត្រី​ក្រសួង​អភិវឌ្ឍន៍​ជនបទ ដែលសម្តេចនិងលោកជំទាវបណ្ឌិត តែងតែគិតគូរពីសុខទុក្ខ និងការរស់​នៅ​របស់​ប្រជាពលរដ្ឋ៕ អត្ថបទ៖ បាន សុខរិទ្ធិ