អភិបាលក្រុងប៉ោយប៉ែត និងក្រុមការងារបរិច្ចាគធនធានផ្ទាល់ខ្លួន រួមចំណែកកសាងផ្លូវជូនពលរដ្ឋប្រើប្រាស់

បន្ទាយមានជ័យ៖ លោក គាត ហ៊ុល អភិបាលក្រុងប៉ោយប៉ែតខេត្តបន្ទាយមានជ័យ រួមទាំងក្រុមការងារ បានចំណាយថវិកាផ្ទាល់ខ្លួន ដើម្បីរួមចំណែកជាមួយរាជរដ្ឋាភិបាល បានជួយកសាងផ្លូវចំនួន៥ខ្សែ ប្រភេទផ្លូវក្រាលថ្មម៉ិច ជូនដល់បងប្អូនប្រជាពលរដ្ឋ រស់នៅចំណុចភូមិប្រជាធម្មលិច សង្កាត់ផ្សារកណ្តាលក្រុងប៉ោយប៉ែត ខេត្តបន្ទាយមានជ័យ ក្នុងមួយខ្សែៗមានប្រវែងជាង៣០០ម៉ែត្រ។

ក្នុងឱកាសចុះពិនិត្យផ្ទាល់ នៅថ្ងៃទី២០កុម្ភៈ ម្សិលមិញនេះ លោកអភិបាលក្រុងប៉ោយប៉ែត បានឲ្យដឹងថា ដើម្បីជាការឆ្លើយតប ក៏ដូចជាការសូមណូមពរពីប្រជាពលរដ្ឋ ដែលរស់នៅតំបន់នោះ កន្លងមកផ្លូវមានការលំបាកខ្លាំង នៅពេលរដូវវស្សាម្តងៗ ពិបាកក្នុងការធ្វើដំណើរលិចទឹក។

មើលឃើញពីបញ្ហាប្រឈមទាំងអស់នេះ ទើបលោកសម្រេចចិត្តចំណាយនូវថវិកាផ្ទាល់​ជាមួយនិង​ក្រុមការងារ​ដើម្បីជួយសម្រួលនូវទុក្ខលំបាក​របស់ពលរដ្ឋ ដើម្បីរួមចំណែក​ក្នុងការ​អភិវឌ្ឍ​ជាមួយ​រាជរដ្ឋាភិបាល ធ្វើឲ្យតំបន់នេះ ទទួលបានផ្លូវល្អប្រសើរ និងអាចធ្វើដំណើរបាន​ប្រកប​ដោយភាពងាយស្រួលផងដែរ។

សូមបញ្ជាក់ថា ផ្លូវក្រាលថ្មម៉ិចទាំង៥ខ្សែ ក្នុងមូលដ្ឋានភូមិប្រជាធម្មលិចនេះដែរ គឺ​តភ្ជាប់ពីផ្លូវបេតុង របស់រដ្ឋ ដែលមានស្រាប់ ដោយមួយខ្សែៗ​មាន​ប្រវែង​ជាង​៣០០ម៉ែត្រ​សរុបមានចំនួន​ជាង១៥០០ម៉ែត្រ​ផងដែរ៕ អត្ថបទ៖ ឃិន សារិទ្ធ