លោកជំទាវឱវណ្ណឌីនជំរុញដល់ថ្នាក់ដឹកនាំមន្ទីរចុះពង្រឹងមន្ត្រីសុខាភិបាលតាមមណ្ឌល សុខភាពអោយបង្កើនសមត្ថភាពនិងគុណធម៏បំរើការព្យាបាលជំងឺជូនពលរដ្ឋក្នុងឥរិយាបទទន់ភ្លន់

ស្វាយរៀង ៖ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល បានជំរុញដល់មន្ត្រីថ្នាក់ដឹកនាំមន្ទីរ និងរដ្ឋបាលមូលដ្ឋានក្នុងខេត្តត្រូវចុះធ្វើការពង្រឹងគុណភាពសមត្ថភាពមន្ត្រីសុខាភិបាល ដែលបម្រើការងារនៅតាមមណ្ឌលសុខភាព រួមនិងការរៀបចំបំពាក់ឧបករណ៍ ពិសេសអប់រំមន្ត្រីទាំងនោះ អោយរៀបចំប្រើប្រាស់ឥរិយាបថ និងធ្វើជាគ្រូពេទ្យដែលមានគុណធម៌ក្នុងកិច្ចការពិនិត្យនិងព្យាបាលជំងឺពលរដ្ឋឲ្យបានសមរម្យ។

ការថ្លែងនិងមានប្រសាសន៍របស់មន្ត្រីជាន់ខ្ពស់ក្រសួងសុខាភិបាលបែបនេះបានធ្វើឡើងក្នុងឱកាសលោកជំទាវអញ្ជើញចូលរួមក្នុងកិច្ចប្រជុំស្ដីពីការជំរុញការអនុវត្តផែនការឆ្នាំ២០២៥ លើការងារជំរុញបង្កើនការថែទាំសុខភាពបឋមនិងការកែលម្អគុណភាពសេវាមណ្ឌលសុខភាពក្នុងខេត្តស្វាយរៀង ថ្ងៃទី២១ ខែកុម្ភៈឆ្នាំ២០២៥ ដោយមានការអញ្ជើញចូលរួមពី ឯកឧត្តមប៉េង ពោធិសា អភិបាលខេត្ត មន្ត្រីថ្នាក់ដឹកនាំមន្ទីរអង្គភាពពាក់ព័ន្ធ លោក លោកស្រី ជាអភិបាល អភិបាលរងស្រុក ក្រុង មន្ត្រីសុខាភិបាល នៅតាមមណ្ឌលសុខភាព និងលោក លោកស្រី ជាមេឃុំ ចៅសង្កាត់ប្រមាណជាង៣០០នាក់ផងដែរ។

ក្នុងនាមឯកឧត្តមរដ្ឋមន្ត្រីក្រសួងសុខាភិបាល លោកជំទាវរដ្ឋលេខាធិការ បានសម្ដែងអបអរសាទរចំពោះមន្ត្រីថ្នាក់ដឹកនាំមន្ទីរ និងមន្ត្រីសុខាភិបាល ដែលបម្រើការងារនៅតាមមន្ទីរពេទ្យ ពិសេសនៅតាមមណ្ឌលសុខភាពកន្លងមកបានរួមអនុវត្តពិនិត្យនិងព្យាបាលជំងឺជូនពលរដ្ឋក្នុងស្មារតីទទួលខុស ចំពោះមុខជំនាញវិជ្ជាជីវៈប្រកបដោយឥរិយាបទទន់ភ្លន់ធ្វើឲ្យមណ្ឌលសុខភាពក៏ដូចជាមន្ទីរពេទ្យត្រូវបានពលរដ្ឋគាំទ្រពីគ្រប់មជ្ឈដ្ឋានដែលជាកត្តាបង្កើនជំនឿពលរដ្ឋមកលើការដឹកនាំរបស់រាជរដ្ឋាភិបាលផងដែរ។

ទន្ទឹមនិងនោះដែរក្នុងនាមរដ្ឋមន្ត្រីក្រសួងសុខាភិបាលលោកជំទាវឱ វណ្ណឌីន ក៏បានស្នើដល់រដ្ឋបាលខេត្ត ស្រុក ក្រុង ឃុំ សង្កាត់ បន្តសហការជាមួយនឹងមន្ត្រីសុខាភិបាលនៅតាមមណ្ឌលសុខភាពឃុំ សង្កាត់ចុះធ្វើការអប់រំ ដឹកនាំពលរដ្ឋ ធ្វើអនាម័យបរិស្ថានឲ្យបានញឹកញាប់ពិសេសពន្យល់ពីរបៀបរបបការរស់នៅហូបចុកដល់ពលរដ្ឋដើម្បីបញ្ជៀសជំងឺដង្កាត់ផ្សេងៗ ទន្ទ្រានមកលើរាងកាយ  ខណៈវិទ្យាសាស្ត្របច្ចុប្បន្នមានការរីកចម្រើនលើគ្រប់វិស័យពិសេសវិស័យកសិកម្ម ដាំដុះដោយប្រើប្រាស់ជីនិងថ្នាំពុលកសិកម្ម ដើម្បីបង្កើនផលិតផលសម្រាប់បម្រើការហូបចុកនិងបម្រើទីផ្សារដែលជាកត្តានាំឲ្យមនុស្សហូបចុកកើតជំងឺគ្រប់ប្រភេទនាបច្ចុប្បន្ននេះ។ ដោយ ៖ ភា សារិទ្ធ