អង្គការក្រៅស្រុកនិងសហការជាមួយក្រសួងកិច្ចការនារី ចូលរួមលើកកម្ពស់ភាពអង់អាចស្រ្តី និងក្មេងស្រី

ភ្នំពេញ ៖ អង្គការក្រៅរដ្ឋាភិបាលមួយ ចង់សហការជាមួយក្រសួងកិច្ចការនារី លើគម្រោងអនុវត្តសកម្មភាពមួយចំនួន លើការចូលរួម ចំណែកលើកកម្ពស់ភាពអង់អាចស្រ្តី និងក្មេងស្រី ស្របតាមគោលនយោបាយរបស់រាជរដ្ឋាភិបាលកម្ពុជា។

​លោកជំទាវកិត្តិបណ្ឌិត អ៉ឺង កន្ថាផាវី រដ្ឋមន្ត្រីក្រសួងកិច្ចការនារី នៅក្នុងជំនួបសម្ដែងការគួរសម និងពិភាក្សាការងារ លើការ បង្កើនភាពអង់អាចស្រ្តី និងក្មេងស្រី ក៏ដូចជាពិនិត្យលទ្ធភាពក្នុងការបង្កើនកិច្ចសហការរវាងអង្គការ Formation et Progrès-Cambodge និងក្រសួងកិច្ចការនារី ក្នុងនោះលោកជំទាវកិត្តិបណ្ឌិត បានគូសបញ្ជាក់ពីបេសកកម្ម និងកិច្ចការជាអាទិភាពរបស់ក្រសួង កិច្ចការនារី ក្នុងនាមជាសេនាធិការជូនរាជរដ្ឋាភិបាល លើការលើកកម្ពស់សមភាពយេនឌ័រ និងបង្កើនភាពអង់អាចស្រ្តី និងក្មេងស្រីនៅ កម្ពុជា ដែលកន្លងមក កិច្ចការនេះសម្រេចបាននូវវឌ្ឍនភាព និងសមិទ្ធផលគួរឱ្យកត់សម្គាល់។

ជាការឆ្លើយតប, លោក François Schnoebelen ប្រធានអង្គការ Formation et Progrès-Cambodge (សៀមរាប) បានសម្តែងនូវអំណរគុណ និងកោតសរសើរក្រសួងកិច្ចការនារី ដែលបានបំពេញបេសកកម្មរបស់ខ្លួនប្រកបដោយលទ្ធផលជាផ្លែផ្កា ចំណែកក្នុងជំនួបនេះ លោកក៏មានបំណងសហការជាមួយក្រសួង ដើម្បីអនុវត្តសកម្មភាពមួយចំនួន ដើម្បីចូលរួមចំណែកក្នុងការលើក កម្ពស់ស្ថានភាពស្រ្តី និងក្មេងស្រី ស្របតាមគោលនយោបាយរបស់រាជរដ្ឋាភិបាល។ លោកបានជម្រាបជូនថា អង្គការមានសាលា បដិសណ្ឋារកិច្ច និងទេសចរណ៍ ប៉ូលឌុយប្រ៊ូល ដែលជាសាលាមួយមានស្តង់ដារ និងមានកម្មវិធីសិក្សាប្រកបដោយគុណភាព និង ប្រកួតប្រជែងខ្ពស់ ចំពោះនិស្សិតដែលបញ្ចប់ការសិក្សានៅសាលានោះ តែងត្រូវបានបញ្ជូនទៅធ្វើកម្មសិក្សាទាំងក្នុងនៅក្រៅប្រទេស ដើម្បីរៀនសូត្រ ដកស្រង់បទពិសោធន៍ ជាក់ស្តែងលើមុខជំនាញដែលពួកគេបានសិក្សា។

ជាងនេះទៀត លោក François Schnoebelen ក៏បានជម្រាបជូនលោកជំទាវកិត្តិបណ្ឌិតរដ្ឋមន្រ្តី អំពីគម្រោងនៃការរៀបចំ វេទិកាបង្កើនភាពអង់អាចស្រ្តី និងក្មេងស្រី នៅខេត្តសៀមរាប ដែលគ្រោងនឹងប្រព្រឹត្តទៅនៅអំឡុងខែឧសភា ឆ្នាំ២០២៥ ឬចុងឆ្នាំនេះ ហើយលោកមានបំណងស្នើសុំកិច្ចសហការពីក្រសួងកិច្ចការនារី ដើម្បីរៀបចំវេទិកានេះ ក្នុងគោលដៅជំរុញលើកកម្ពស់ស្រ្តី និងក្មេងស្រី ឱ្យបានយល់ឱ្យកាន់តែទូលាយ សម្រាប់ជាមូលដ្ឋានគ្រឹះដល់ពួកគាត់។

លោកជំទាវកិត្តិបណ្ឌិត អ៉ឺង កន្ថាផាវី បានកោតសរសើរចំពោះសកម្មភាពរបស់អង្គការ Formation et Progrès-Cambodge ក្នុងនោះក្រសួងគាំទ្រលើគំនិតផ្តួចផ្តើមក្នុងការរៀបចំវេទិកាពង្រឹងភាពអង់អាចស្រ្តី និងក្មេងស្រីនេះ និងសុំឱ្យអ្នកបច្ចេកទេសរវាងភាគី ទាំងពីរពិភាក្សាលម្អិត លើដំណើរការនៃការរៀបចំកិច្ចការនេះឱ្យបានស៊ីជម្រៅ និងគ្រប់ជ្រុងជ្រោយ៕

អត្ថបទ៖ សុន រ៉ាឌី