រដ្ឋមន្រ្តីក្រសួងការពារជាតិឥណ្ឌូនេស៊ី៖ កងទ័ពកម្ពុជាគឺជាដៃគូរដ៏មានសារៈសំខាន់​របស់ឥណ្ឌូនេស៊ី

រដ្ឋមន្រ្តីក្រសួងការពារជាតិឥណ្ឌូនេស៊ី ឯកឧត្តម Sjafrie Sjamsoeddin បានអះអាងថា ឥណ្ឌូនេស៊ីនឹងបន្តកិច្ចសហប្រតិបត្តិការជាមួយកម្ពុជាឲ្យបានកាន់តែល្អប្រសើរបន្ថែមទៀតទៅថ្ងៃអនាគត ពីព្រោះកម្ពុជាគឺជាដៃគូរដ៏មានសារៈសំខាន់របស់ឥណ្ឌូណេស៊ី ហើយក្រសួងការពារជាតិឥណ្ឌូនេស៊ី ក៏នឹងបន្តបណ្តុះបណ្តាល និងឧបត្ថម្ភគាំទ្រដល់កងទ័ពពិសេសកម្ពុជាបន្ថែមទៀតផងដែរ។

ការអះអាងរបស់ប្រមុខការពារជាតិឥណ្ឌូនេស៊ីនេះ គឺបានធ្វើឡើងនៅក្នុងកិច្ចជំនួបទ្វេភាគីជាមួយ នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា ក្នុងឱកាសចូលរួមកិច្ចប្រជុំចង្អៀតរដ្ឋមន្ត្រីការពារជាតិអាស៊ាន (ADMM Retreat) នៅប៉េណាង ប្រទេសម៉ាឡេស៊ី នាថ្ងៃទី២៦ ខែ កុម្ភៈ ឆ្នាំ២០២៥នេះ។

ឯកឧត្តម Sjafrie Sjamsoeddin បានរំលឹកឡើងវិញអំពីកិច្ចសហប្រតិបត្តិការរវាងកងទ័ពទាំងពីរនាពេលកន្លងមកជាពិសេសរវាងកងទ័ពជាតិឥណ្ឌូនេស៊ី ជាមួយបញ្ជាការដ្ឋានទ័ពពិសេស កងទ័ពជើងគោកកម្ពុជា។ ដោយឯកឧត្តមបានបញ្ជាក់ថា ទំនាក់ទំនងរវាងកងទ័ពទាំងពីរ(កម្ពុជា-ឥណ្ឌូនេស៊ី) បាននាំនូវកិច្ចសហប្រតិបត្តិការយ៉ាងជិតស្និតរវាងប្រទេសទាំងពីរ ហើយឥណ្ឌូនេស៊ី នឹងបន្តកិច្ចសហប្រតិបត្តិការជាមួយកម្ពុជាអោយបានកាន់តែល្អប្រសើរទៅថ្ងៃអនាគត ពីព្រោះកម្ពុជាគឺជាដៃគូរដ៏មានសារៈសំខាន់របស់ឥណ្ឌូណេស៊ី។

ថ្លែងនៅក្នុងកិច្ចជំនួបនោះដែរនាយឧត្តមសេនីយ៍ ទៀ សីហា បានសម្តែងការអបអរសាទរ ចំពោះឯកឧត្តម Sjafrie Sjamsoeddin ដែលត្រូវតែងតាំងជារដ្ឋមន្ត្រីក្រសួងការពារជាតិឥណ្ឌូនេស៊ី ហើយឯកឧត្តមនាយឧត្តមសេនីយ៍ បានចាត់ទុកថា ឥណ្ឌូនេស៊ី បានដើរតួនាទីយ៉ាងសំខាន់ក្នុងការចូលរួមដោះស្រាយបញ្ហាប្រឈម និងការចូលរួមចំណែករក្សាសន្តិភាពនិង ស្ថិរភាពក្នុងតំបន់ផងដែរ។

ឯកឧត្តមនាយឧត្តមសេនីយ៍ ទៀ សីហា បានលើកឡើងអំពីកិច្ចសហប្រតិបត្តិការរវាងកងទ័ពទាំងពីរកម្ពុជា និងឥណ្ឌូនេស៊ី ដែលក្នុងរយៈពេលកន្លងមកឥណ្ឌូនេស៊ីបានជួយឧបត្ថមគាំទ្រដល់រាជរដ្ឋាភិបាល ក្រសួងការពារជាតិកម្ពុជា ក្នុងការហ្វឹកហ្វឺនដល់កម្លាំងកងទ័ពពិសេសកម្ពុជានាពេលកន្លងមក។

ឯកឧត្តម នាយឧត្តមសេនីយ៍ ទៀ សីហា បានបញ្ជាក់ថា កងទ័ពពិសេសកម្ពុជា បានដើរតួនាទីយ៉ាងសំខាន់ក្នុងការជួយដល់រាជរដ្ឋាភិបាលកម្ពុជា ដូចជាការជួយសង្គ្រោះប្រជាពលរដ្ឋចេញពីគ្រោះមហន្តរាយ និងបង្រ្កាបបទល្មើសបទល្មើសផ្សេងៗ។ ជាមួយគ្នានោះដែរ នាយឧត្តមសេនីយ៍ ទៀ សីហា ក៏បានស្នើសុំឥណ្ឌូនេស៊ីឲ្យបន្តជួយហ្វឹកហ្វឺនដល់កងទ័ពពិសេសកម្ពុជា ដើម្បីបង្កើនធនធានមនុស្សដល់កងយោធពលខេមរភូមិន្ទឲ្យបបានកាន់តែរឹងមាំ ហើយតាមរយៈសំណូមពររបស់នាយឧត្តមសេនីយ៍ ទៀ សីហា ប្រមុខការពារជាតិឥណ្ឌូនេស៊ី យល់ព្រមនឹងបន្តជួយឧបត្ថម្ភគាំទ្រដល់កងទ័ពពិសេសកម្ពុជាបន្តទៀត៕ អត្ថបទ៖ បាន ចក់