ក្នុងឆ្នាំ២០២៤ កម្លាំងតំបន់ប្រតិបត្តការសឹករងកំពង់ឆ្នាំង សម្រេចបានលទ្ធផលល្អប្រសើរតាមផែនការរបស់ថ្នាក់លើប្រគល់ជូន

កំពង់ឆ្នាំង៖ នៅទីបញ្ជាការដ្ឋានតំបន់ប្រតិបត្តិការសឹករងកំពង់ឆ្នាំង នាថ្ងៃទី២៧ ខែកុម្ភៈ ឆ្នាំ២០២៥ បានរៀបចំកិច្ចប្រជុំបូកសរុបលទ្ធផលការងារឆ្នាំ២០២៤ និងលើកទិសដៅអនុវត្តការងារឆ្នាំ២០២៥ ដែលមានការចូលរួមពីលោកឧត្តមសេនីយ៍ទោ ទិត្យ រចនា មេបញ្ជាការរង យោធភូមិភាគពិសេស, លោកឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង,លោកនាយសេនាធិការរង លោកវរសេនីយ៍ នាយ នាយរងការិយាល័យ ចំណុះ យោធភូមិភាគពិសេស លោក មេបញ្ជាការរង នាយសេនាធិការរង ព្រមទាំងនាយ-ពលទាហាន របស់តំបន់ប្រតិបត្តិការសឹករងកំពង់ឆ្នាំងជាច្រើនរូប ។

លោកឧត្តមសេនីយ៍ត្រី អ៊ុំ សុភា អោយដឹងថា៖ ការបំពេញភារកិច្ចនាឆ្នាំកន្លងមក រហូតមកដល់បច្ចុប្បន្ន កម្លាំងតំបន់ប្រតិបត្តការសឹករងកំពង់ឆ្នាំងសម្រេចបានលទ្ធផលល្អប្រសើរតាមផែនការរបស់ថ្នាក់លើ ដូចជា ការងារស្នូល ការងារបង្កបង្កើនផល ចិញ្ចឹមសត្វ ការងារមូលដ្ឋាន ការចុះជួយសង្គ្រោះប្រជាពលរដ្ឋដែលជួបគ្រោះមហន្តរាយផ្សេងៗ ជាពិសេស ការសហការបង្ក្រាបបទល្មើសនេសាទ នៅទូទាំងខេត្តកំពង់ឆ្នាំង ដែលអង្គភាពកំពុងប្រតិបត្តិការដូចភ្លៀងរលឹមជារៀងរាល់ថ្ងៃ ។

លោកឧត្តមសេនីយ៍ទោ ទិត្យ រចនា មេបញ្ជាការរង យោធភូមិភាគពិសេស បានថ្លែងកោតសរសើរដល់លោកឧត្តមសេនីយ៍ត្រី អ៊ុំ សុភា មេបញ្ជាការ និងកម្លាំងតំបន់ប្រតិបត្តិការសឹករងកំពង់ឆ្នាំងទាំងអស់ ដែលបានដឹកនាំអង្គភាព និងខិតខំបំពេញការងារដែលថ្នាក់លើប្រគល់ជូន អោយមានការរីកចម្រើន ទទួលលទ្ធផលផ្លែផ្កាគួរជាទីមោទនៈ និងទទួលបានការកោតសរសើរពីថ្នាក់ដឹកនាំគ្រប់ជាន់ថ្នាក់ ។ លទ្ធផលដែលអង្គភាពទទួលបាន គឺពិតជាការរួមចំណែកពីនាយទាហាន នាយទាហានរង និងពលទាហានទាំងអស់ នៅក្នុងតំបន់ប្រតិបត្តិការសឹករងកំពង់ឆ្នាំងទាំងមូល ដែលបានចូលរួមគិត រួមធ្វើ​ និងទទួលខុសត្រូវខ្ពស់ ដោយឈរលើផែនការការងារ របស់យោធភូមិភាគពិសេស ធ្វើឱ្យទីបញ្ជាការ ធានាបានគ្រប់ភារកិច្ចដែលថ្នាក់លើប្រគល់ជូន ដូចជាការងារហ្វឹកហ្វឺន ប្រមូលផ្តុំគ្រប់គ្រងកម្លាំង ជំរុញការងារបង្កបង្កើនផល ចិញ្ចឹមសត្វ ធានាជីវភាពកងទ័ព ហើយបានបញ្ជូនកម្លាំងចុះប្រតិបត្តិការជួយសង្រ្គោះប្រជាពលរដ្ឋ រងគ្រោះដោយធម្មជាតិ គ្រោះទឹកជំនន់ ខ្យល់កន្រ្តាក់ ជួយកសាង ជួសជុលលំនៅឋាន ជាពិសេស ការងារសហការបង្ក្រាបបទល្មើសនេសាទ នៅក្នុងភូមិសាស្ត្រខេត្តកំពង់ឆ្នាំង៕ កាំង ហុងវាស្នា