នាយឧត្តមសេនីយ៍ ទៀ សីហា បន្តចុះពិនិត្យតំបន់ប្រវត្តិសាស្ត្រយោធាភ្នំប្រាក់៥១៩ ខេត្តបន្ទាយមានជ័យ

បន្ទាយមានជ័យ ៖ ក្រោយចុះត្រួតពិនិត្យតំបន់ប្រវត្តិសាស្រ្តយោធាជាច្រើនកន្លែង ចុះសួរសុខទុក្ខ និងសំណេះសំណាលជាយោធិននៅតាមអង្គភាព និងតាមក្រវ៉ាត់ព្រំដែនរវាងកម្ពុជា និងថៃ ស្ថិតនៅលើទឹកដីបាត់ដំបង និងខេត្តប៉ៃលិននោះ នៅថ្ងៃទី៦ ខែមីនា ឆ្នាំ២០២៥នេះ នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជាបានបន្តដំណើរចុះសាកសួរសុខ និងពិនិត្យមើលទីតាំងតំបន់ប្រវត្តិសាស្រ្តយោធាតេជោភ្នំប្រាក់៥១៩ ថ្មពួក ស្ថិតនៅក្នុង ស្រុកថ្មពួកខេត្តបន្ទាយមានជ័យ។

សូមបញ្ជាក់ថា បច្ចុប្បន្នទីតាំងតំបន់ប្រវត្តិសាស្ត្រយោធាតេជោភ្នំប្រាក់ ៥១៩ ថ្មពួកបានគ្រប់គ្រង និង ថែរក្សាដោយការិយាល័យអភិវឌ្ឍយោធភូមិភាគទី៥។ នៅតំបន់ប្រវត្តិសាស្រ្តយោធាតេជោភ្នំបា្រក់ គឺ ជាទីតាំងយុទ្ធសាស្រ្តដ៏សំខាន់តាំងពីពេលមុនៗ ក៏ដូចជាទៅថ្ងៃអនាគតដែលទីតាំងនេះនៅជាប់ព្រំដែន ហើយតឹកតាងប្រវត្តិសាស្ត្រដែលបានបន្សល់ទុកនៅទីនេះមាន៖ទីតាំងផ្ទះរបស់លោក សូរ ហុង និង សាលានយោបាយ ដែលអតីតកម្លាំងកម្ពុជាប្រជាធិបតេយ្យធ្លាប់បង្រៀននៅទីនេះ ហើយក្រៅពីនេះមានផ្ទះរបស់ ប៉ុល ពត និងមានរោងទីតាំងកែ ឆ្នៃគ្រាប់ – លេណដ្ឋានសំខាន់ៗជាចំណុចខ្ពស់ ហើយនៅខាងក្រោមគឺមានស្រះទឹកដែលបានជីក និងស្រះធម្មជាតិនៅ អាងក្តឹបថ្ម-ជាស្រះធំ ។

តំបន់ប្រវត្តិសាស្រ្តយោធាតេជោភ្នំបា្រក់ ៥១៩ ថ្មពួក  ពីអតីតកាលកន្លែងនេះគឺមូលដ្ឋានដែលមានប្រវត្តិយ៉ាងច្រើនបំផុតទាំងយុទ្ធនាការ និងការប្រយុទ្ធ ចាប់តាំងពីទសវត្ស ៨០ រហូតជាកន្លែងទីតាំងជួបជុំ និងប្រជុំជាច្រើន ហើយជាកន្លែងដែលមានប្រវត្តិតាំងពីឆ្នាំ១៩៧៩។ ទីតាំងភ្នំប្រាក់នេះក៏ជាទីតាំងរបស់ កងពល ៥១៩ ដែលពីអតីតកាល មានកម្មាភិបាលធំៗជាច្រើន របស់កម្លាំង កម្ពុជាប្រជាធិបតេយ្យ បានចេញពីទីនេះ និងបំបែកទៅជាអង្គភាព កងពលដទៃទៀត ហើយជាកន្លែងដែលមានការប្រជុំ បំពាក់បំប៉ន  ផ្តល់ផែនការសឹក ពីមេដឹកនាំធំៗ ជាពិសេស ប៉ុល ពត – នួន ជា។ ទីតាំងប្រវត្តិសាស្រ្តយោធាតេជោភ្នំប្រាក់ ស្ថិតនៅជិតព្រំដែន ដែលបាន រួមចំណែក ក្នុងកិច្ចការ ការពារ អធិបតេយ្យ- បូរណភាពទឹកដីផងដែរ៕​

អត្ថបទ ៖ បាន ចក់​