ឯកឧត្តម អ៉ឹម ឈុនលឹម៖ វិមានរដ្ឋធម្មនុញ្ញ ជាមិត្តរូបរស់នៃឧត្តមគតិ និងការធ្វើពលីកម្មរបស់ឥស្សរជនស្នេហាជាតិ

ភ្នំពេញ៖ នៅថ្ងៃទី៧ ខែមីនា ឆ្នាំ២០២៥ ឯកឧត្តមកិត្តិនីតិកោសលបណ្ឌិត អ៉ឹម ឈុនលឹម ប្រធានក្រុមប្រឹក្សាធម្មនុញ្ញ និងសមាជិកក្រុមប្រឹក្សាធម្មនុញ្ញ បានអញ្ជើញក្នុងពិធីបំពាក់គ្រឿងឥស្សរិយយសជូនក្រុមការងារសាងសង់វិមានរដ្ឋធម្មនុញ្ញ។

នាឱកាសនោះ ឯកឧត្តម ប្រធានក្រុមប្រឹក្សាធម្មនុញ្ញ បានបង្ហាញសេចក្តីសោមនស្សរីករាយ និងមោទនភាពប្រកបដោយមនោសញ្ចេតនាស្រលាញ់រាប់អានដ៏ជ្រាលជ្រៅ ដោយបានរៀបចំពិធីជួបជុំគ្នាពេលនេះ ដើម្បីសម្តែងនូវអំណរគុណនិងអំណរសាទរ ចំពោះសមិទ្ធផលដ៏វិសេសវិសាលនៃស្នាដៃស្ថាបត្យកម្មដ៏ល្អវិចិត្រនៃវិមានរដ្ឋធម្មនុញ្ញ ទាំងផ្នែកគុណតម្លៃធម្មនុញ្ញ និងទាំងផ្នែកគុណតម្លៃស្ថាបត្យកម្ម។

ឯកឧត្តម អ៉ឹម ឈុនលឹម មានប្រសាសន៍ថា ក្នុងនាមក្រុមប្រឹក្សាធម្មនុញ្ញពិតជាមានមោទនភាពក្រៃលែងដែលបានរួមធ្វើការជាមួយក្រុមការងារ ដែលស្ថិតក្រោមការដឹកនាំរបស់ឯកឧត្តមបណ្ឌិត លី រស្មី ជាក្រុមការងារដែលមានគ្រប់សមាសភាព ប្រកបដោយចំណេះជំនាញក្បួនខ្នាតពិតប្រាកដ មានការទទួលខុសត្រូវ និងឆន្ទៈខ្ពស់ក្នុងការបំពេញតួនាទី ដោយចេះបូករួមទេពកោសល្យ បញ្ញាញាណ និងពេលវេលារៀងខ្លួន ទើបអាចធ្វើឲ្យសម្រេចបាននូវស្នាដៃស្ថាបត្យកម្មនៅលើ វិមានរដ្ឋធម្មនុញ្ញដ៏ល្អវិចិត្រ សម្រាប់ខេមរជនជំនាន់នេះ និងជាមរតកគំនិតដ៏ថ្លៃថ្លាសម្រាប់ជំនាន់ទៅមុខ។

ឯកឧត្តម អ៉ឹម ឈុនលឹម មានប្រសាសន៍ទៀតថា ការជួបជុំគ្នានាពេលនេះ ដើម្បីអបអរសាទរនូវការសម្រេច បាននូវស្នាដៃស្ថាបត្យកម្មមួយដ៏ល្អវិចិត្រក្នុងពេលនេះ យើងក៏ជួបជុំគ្នាដើម្បីឧទ្ទិសស្មារតីនៃគុណតម្លៃររដ្ឋធម្មនុញ្ញ ដែលសណ្ឋិតនៅលេីសិលាលោហប្រាសាទ វិមានរដ្ឋធម្មនុញ្ញ ជានីតិបូជនិយដ្ឋានដ៏ពិសិដ្ឋ ដែលមានតេជានុភាពលេីកកម្ពស់មនសិការឯកភាពជាតិ និងស្នេហាជាតិរបស់ខេមរជន។

ជាមួយគ្នានេះ ឯកឧត្តម អ៉ឹម ឈុនលឹម បញ្ជាក់ថា ការដែលអាចសម្រេចបានយ៉ាងត្រចះត្រចង់នូវទិដ្ឋភាពអដ្ឋប្បដិរូបកម្មនាំយកទស្សនាទានអរូបិយនៃរដ្ឋធម្មនុញ្ញ មកមូលសង្ខេបនៅលើសំណង់ស្ថាបត្យកម្មធ្វើឲ្យវិមានរដ្ឋធម្មនុញ្ញ មិនត្រឹមតែជារចនាសម្ព័ន្ធរូបវន្ត ជាផ្ទាំងសិលាលោហៈប៉ុណ្ណោះទេ តែគ្រប់ផ្នែកគ្រប់ទម្រង់នៃវិមានសុទ្ធតែបង្កប់នូវគំនិត នូវប្រវត្តិមានអត្ថន័យជានិមិត្តរូបរស់នៃឧត្ដមគតិ ព្រមទាំងជាពលិកម្មរបស់ឥស្សរជនស្នេហាជាតិជំនាន់នេះ ដែលជាស្ថាបនិកនិងជាប្រតិបត្តិករនៃរដ្ឋធម្មនុញ្ញ សម្រាប់ឲ្យខេមរជនជំនាន់នេះនិងជំនាន់តទៅមុខទៀតបានដឹង។

ឯកឧត្តមកិត្តិនីតិកោសលបណ្ឌិត អ៉ឹម ឈុនលឹម បន្ថែមថា វិមានរដ្ឋធម្មនុញ្ញ គឺជាស្មារតីភ្ញាក់រលឹក ក្រោកឈរឡើងជាមួយឆន្ទៈមោះមុត ប្តូរផ្តាច់ រួបរួមគ្នា ពង្រឹងឯកភាពជាតិ រក្សាការពារ ទឹកដីកម្ពុជា អធិបតេយ្យភាពថ្លៃថ្លា និងអារ្យធម៌អង្គរដ៏បវរ ហើយថែមទាំងកសាងប្រទេសជាតិឲ្យទៅជា “កោះសន្តិភាព” ឡើងវិញ ផ្អែកលើប្រព័ន្ធប្រជាធិបតេយ្យសេរីពហុបក្ស ធានាសិទ្ធិមនុស្ស គោរពច្បាប់ ទទួលខុសត្រូវខ្ពស់ចំពោះវាសនាអនាគតជាតិឲ្យបានឈានឡើងរីកចម្រើន លូតលាស់ សម្បូររុងរឿងជានិច្ចនិរន្តរ៍។