ទេសចរអន្តរជាតិនឹងកើនឡើង ខណៈឆ្នាំនេះ កម្ពុជារៀបចំព្រឹត្តិការណ៍អង្គរសង្ក្រាន្តធំនៅខេត្តសៀមរាប

ភ្នំពេញ ៖ បើតាមប្រធានសមាគមទីភ្នាក់ងារទេសចរណ៍កម្ពុជា ហៅកាត់ថា CATA បានឲ្យដឹងថា ក្នុងអំឡុងពេលនេះ បណ្តាការីទេសចរណ៍នៅកម្ពុជា និងការីទេសចរណ៍ជាដៃគូនៅក្រៅប្រទេស បាននិងកំពុងខំប្រឹងរួមគ្នាផ្សព្វផ្សាយ លក់កញ្ចប់ទេសចរណ៍ទស្សនាអង្គរសង្ក្រាន្តនៅខេត្តសៀមរាប ហើយរំពឹងថា ព្រឹត្តិការណ៍បុណ្យចូលឆ្នាំថ្មីប្រៃណីខ្មែរឆ្នាំ២០២៥ នឹងមានភ្ញៀវទេសចរអន្តរជាតិកាន់តែច្រើនមកទស្សនាកម្ពុជា។

​លោកស្រី ឆាយ សៀវលីន ប្រធានសមាគមទីភ្នាក់ទេសចរណ៍កម្ពុជា CATA និងក្រុមហ៊ុន ការីទេសចរណ៍ផ្សេងៗទៀត បានថ្លែងប្រាប់BTV នៅថ្ងៃទី១១ ខែមីនានេះថា ក្រោយទទួលបានសេចក្តីសម្រេចពីរាជរដ្ឋាភិបាល ប្រកាសថា នៅឆ្នាំ២០២៥នេះ នឹងរៀបចំព្រឹត្តិការណ៍អង្គរសង្ក្រាន្តដ៏ធំនៅខេត្តសៀមរាបមក សមាគម និងបណ្តាការីទេសចរណ៍បានសហការរៀបចំកែច្នៃកញ្ចប់ទេសចរណ៍ដោយមានបង្កើននូវការផ្តល់សេវាច្រើនជាងកញ្ចប់ទេសចរណ៍ទស្សនាកម្ពុជាថ្ងៃធម្មតា សំដៅឲ្យភ្ញៀវអន្តរជាតិ មកទស្សនាព្រឹត្តិការណ៍អង្គរសង្ក្រាន្ត ទទួលបានឱកាសដើរកម្សាន្តបានទូលំទូលាយជាមុន និងធ្វើឲ្យភ្ញៀវស្គាល់អស់នូវតម្លៃលក្ខណៈសម្បត្តិវប្បធម៌សិល្បៈខ្មែរ អំឡុងពេលបុណ្យចូលឆ្នាំថ្មី ប្រពៃណីខ្មែរ។

ប្រធាន CATA រំពឹងថា តាមរយៈកិច្ចខិតខំប្រឹងប្រែងរួមគ្នាផ្សព្វផ្សាយលក់កញ្ចប់ទេសចរណ៍ទស្សនាអង្គរសង្ក្រាន្តនៅតាមបណ្តាប្រទេសនានានេះ រំពឹងថា ថ្ងៃបុណ្យចូលឆ្នាំថ្មី ប្រពៃណីខ្មែរ ឆ្នាំ២០២៥នេះ នឹងមានភ្ញៀវទេសចរអន្តរជាតិអញ្ជើញមកទស្សនាកម្ពុជាច្រើនជាងបណ្តាឆ្នាំកន្លងទៅ។

បើតាមឯកឧត្តម សុខ សប្បាយណា ប្រធានក្រុមការងារប្រតិបត្តិរៀបចំព្រឹត្តិការណ៍អង្គរសង្ក្រាន្តបានឲ្យដឹងថា ព្រឹត្តិការណ៍អង្គរសង្ក្រាន្តនៅខេត្តសៀមរាប ដែលប្រារព្វចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥នេះ ប្រារព្វក្រោមប្រធានបទ <<ញញឹមសាទរសង្ក្រាន្តឆ្នាំថ្មី >> ហើយនៅក្នុងព្រឹត្តិការណ៍អង្គរសង្ក្រាន្តនេះ មានក្រុមយុវជន៣៤ក្រុម រួមគ្នាបង្ហាញ ទម្រង់ល្បែង រំបាំ សិល្បៈវប្បធម៌ កីឡាគុនខ្មែរ តាំងពិព័រណ៌ពាណិជ្ជកម្ម ប្រមាណជិត៤០កម្មវិធី ក្នុងនោះមានការរៀបចំកម្មវិធីធំពិសេសជាងឆ្នាំកន្លងទៅ គឺកម្មវិធីចង្វាក់បេះដូងអង្គរ (Ankor Comes to life) និងយុវជនស្ម័គ្រចិត្តចូលរួមសហការរៀបចំប្រមាណជាង៥០០០នាក់ ។

អត្ថបទ ស៊ុម សុខ