កងពលតូចដឹកជញ្ជូនលេខ៩៩ ត្រៀមរថយន្តធំៗ​ជិត​៦០​គ្រឿង​សម្រាប់​ដឹក​យុវជន និង​អីវ៉ាន់​រៀប​ចំព្រឹត្តិការណ៍អង្គរសង្រ្កាន្ត

កងពលតូចដឹកជញ្ជូនលេខ៩៩ បានត្រៀមរថយន្តរួចជាសម្រេចដើម្បីទុកដឹកមន្រ្តី យុវជន យុវនារី ស.ស.យ.ក និងអីវ៉ាន់សម្រាប់រៀបចំព្រឹត្តិការណ៍អង្គរសង្រ្កាន្តនៅខេត្តសៀមរាប ខណៈ​រាជ​រដ្ឋាភិបាល​ប្រកាសថា នឹងរៀបចំអង្គរសង្រ្កាន្ត នៅឆ្នាំ២០២៥នេះ ឲ្យមានលក្ខណៈទ្រង់ទ្រាយធំ និង​ប្រព្រឹត្តិទៅក្រោមប្រធានបទ «ស្នាមញញឹមសាទរសង្ក្រាន្តឆ្នាំថ្មី»។

លោកឧត្តមសេនីយ៍ត្រី ហ៊ុល វណ្ឌី មេបញ្ជាការរង និងជានាយសេនាធិការកងពលតូចដឹកជញ្ជូន លេខ​៩៩ បានថ្លែងប្រាប់ទូរទស្សន៍ប៊ីធីវី ក្រោយ​ដឹក​នាំ​កិច្ច​ប្រជុំ​ក្រុម​ការងារ​សហភា​ព​សហព័ន្ធ​យុវជន​កម្ពុជា​ (សសយក)នាព្រឹកថ្ងៃទី១២ ខែមីនា ឆ្នាំ២០២៥នេះថា កងពលតូចដឹក​ជញ្ជូន​លេ​ខ​៩៩ បានត្រៀមរថយន្តខ្នាតធំរួចជាស្រេច ដោយក្នុងនោះ​មាន​រថយន្តប្រ​ភេទ​ទេសចរណ៍​(៤៦​កៅអី​) និងរថយន្តឌួងហ្វេង ដឹកអីវ៉ានចំនួន៥៩គ្រឿង ទុកដឹកជញ្ជូនមន្រ្តី យុវជន​នៅ​ក្នុង​ព្រឹត្តិការណ៍​អ​ង្គរសង្ក្រាន្តឆ្នាំ២០២៥នេះ។

សូមបញ្ជាក់ថាការរៀបចំព្រឹត្តិការណ៍អង្គរសង្ក្រាន្ត ឆ្នាំ២០២៥នេះ ក្រោមប្រធាន​បទ​«ញញឹម​សាទរ​សង្ក្រាន្ត​ឆ្នាំថ្មី» ឆ្នាំ២០២៥នេះថា «ព្រឹត្តិការណ៍អង្គរសង្ក្រាន្តឆ្នាំ២០២៥នេះ នឹង​ធ្វើ​ឡើង​ចំនួន​៦​ទីតាំង គឺនៅបរិវេណប្រាសាទអង្គរវត្ត, សួនច្បារព្រះរាជដំណាក់, ដងស្ទឹងសៀមរាប, King’s Road, Pub street និងអង្គរឃ្យុងយូជាដើម។

ព្រឹត្តិការណ៍អង្គរសង្រ្កាន្តនេះ គឺជាព្រឹត្តិការណ៍ដ៏ធំ ដោយ​នឹង​មាន​កម្ម​វិធី​កម្សាន្ត​សប្បាយ​ជា​ច្រើន​មាន​ដូចជា ការសម្តែងទស្សនីយភាពចង្វាក់បេះដូងអង្គរ, កម្មវិធីភូមិខ្ញុំ, កម្មវិធីការ​ប្រកួត​អុក​ចត្រង្គ​, ​កម្មវិធីក្បួនដង្ហែអង្គរសង្រ្កាន្ត, កម្មវិធីយុទ្ធគុនចម្រុះបុរាណខ្មែរ, កម្មវិធីរបាំបុរាណ ប្រពៃណី និង​ប្រជាប្រិយ, កម្មវិធីសួនញញឹមអង្គរ, កម្មវិធីតោះៗលេងទឹក, កម្មវិធីសួនមុនីហឫទ័យ, កម្មវិ​ធី​ផ្សារ​ស្ទឹង​សៀមរាប, កម្មវិធីប្រណាំងរទេះគោ ក្របី និងពិធីស្រង់ព្រះជាដើម។

បើតាមឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា(សសយក) បានឲ្យដឹង កាល​ពី​កន្លងទៅថា នៅក្នុងព្រឹត្តិការណ៍អង្គរសង្ក្រាន្ត ឆ្នាំ២០២៥នេះ គឺព្រះករុណា​ព្រះបាទ​សម្ដេច​ព្រះ​បរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នឹងយាង​ជា​ព្រះរាជា​ធិបតី​ភាព​ដ៏ខ្ពស់ខ្ពស់បំផុត ព្រះរាជពិធីបួងសួងចម្រើនសេចក្តីសុខ ជូនព្រះរាជាណាចក្រកម្ពុជា នៅ​ថ្ងៃទី១២ ខែមេសា ឆ្នាំ២០២៥ ដែលត្រូវបានរៀបចំដោយក្រសួងព្រះបរមរាជវាំង និង​គណៈ​កម្មាធិការ​ជាតិ​រៀបចំបុណ្យជាតិ-អន្តរជាតិផងដែរ៕ អត្ថបទ៖ បាន ចក់