ធនធានសមុទ្រនៅតំបន់សហគមន៍នេសាទភូមិថ្មីសំបូរជាងមុន បន្ទាប់ពីមានការគំាទ្រពីគម្រោង SCMF

កែប៖ ធនធានសមុទ្រនៅសហគមន៍នេសាទភូមិថ្មី ស្ថិតនៅខេត្តកែប សំបូរជាងមុន បន្ទាប់ពីមានការគាំទ្រពីគម្រោងជលផលសមុទ្រ និងតំបន់ឆ្នេរប្រកបដោយចីរភាព (SCMF)។

លោក ណុះ យ៉េប ប្រធានស្តីទីសហគមន៍នេសាទភូមិថ្មី ស្ថិតនៅក្រុងកែប ខេត្តកែប បានឱ្យដឹងថា តាមរយៈគម្រោងជលផលសមុទ្រ និងតំបន់ឆ្នេរប្រកបដោយចីរភាព ​បានគាំទ្រ​ដល់សហគមន៍​ដូចជា៖ ដាក់​ពង្រាយជម្រក​សិប្បនិម្មិត​,ការបង្កើតកន្លែងភ្ញាស់ក្ដាម ចិញឹមក្ដាមសេះ និងការអភិវឌ្ឍអេកូទេសចរណ៍ជាដើម។

ការលើកឡើងពីប្រធានស្តីពីសហគមន៍នេសាទភូមិថ្មី បានធ្វើឡើងក្នុងពេល លោក Masato Kanda ប្រធានធនាគារអភិវឌ្ឍន៍អាស៊ី (ADB) បានដឹកនាំក្រុមគណៈប្រតិភូធនាគារADB ចុះទស្សនកិច្ច​នៅសហគមន៍នេសាទភូមិថ្មី ដោយមានការទទួលស្វាគមន៍ពីឯកឧត្តម ទិត ឌីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១៩ ខែមីនា ឆ្នាំ២០២៥។

លោក ណុះ យ៉េប ប្រធានស្តីទីសហគមន៍នេសាទភូមិថ្មី ​បានបន្តថា បច្ចុប្បន្នសមាជិក​នៅក្នុង​សហគមន៍មានជីវភាពល្អជាងមុន​ និងម្យ៉ាងវិញទៀត ​ធនធានសមុទ្រនៅតំបន់សហគមន៍ ក៏​សំបូរជាងមុនផងដែរ បន្ទាប់ពីមានការគំាទ្រពីគម្រោងជលផលសមុទ្រ និងតំបន់ឆ្នេរប្រកបដោយ​ចីរភាព។

លោក Masato Kanda ប្រធានធនាគារអភិវឌ្ឍន៍អាស៊ី ​បានមានប្រសាសន៍ថា គម្រោង​ជលផលសមុទ្រ និងតំបន់ឆ្នេរប្រកបដោយចីរភាពរបស់ADB មានសារៈសំខាន់ណាស់​ក្នុងការ​បង្កើនបរិមាណស្តុកជលផលនៅក្បែរឆ្នេរសមុទ្រ ពង្រឹងជីវភាពរស់របស់ប្រជាជននៅតាមឆ្នេរ និងលើកកម្ពស់ការចូលរួមរបស់សហគមន៍ក្នុងការគ្រប់គ្រងធនធានសមុទ្រសំខាន់ៗ។

គួរបញ្ជាក់ដែរថា ​គម្រោងជលផលសមុទ្រ ​និងតំបន់ឆ្នេរប្រកបដោយចីរភាព (SCMF) មានថវិកា​សរុបចំនួន១០៤លានដុល្លារ​ ក្នុងនោះ​ថវិការបស់ធនាគារADB ចំនួន៦៣លានដុល្លា ចែកជាកម្ចី​ចំនួន៤១លានដុល្លា និងជាឥទានឥតសំណងចំនួន២២លានដុល្លារ ​ពីមូលនិធិអភិវឌ្ឍន៍​អាស៊ី(ADF), សហហិរញ្ញវប្បទាន១០​លានដុល្លារ ពីមូលនិធិហេដ្ឋារចនា​សម្ព័ន្ធ​អាស៊ាន,២០លានដុល្លារ​ពី​ទីភ្នាក់ងារអភិវឌ្ឍន៍​បារាំង(AFD) និង១១លានដុល្លាពីរាជរដ្ឋាភិបាលកម្ពុជា។ ​គម្រោងនេះ អនុវត្តនៅខេត្តជាប់សមុទ្រមានដូចជា៖ ​ខេត្តកែប កំពត កោះកុង និងព្រះសីហនុ ដោយ​ចាប់ផ្តើមអនុវត្តពីថ្ងៃទី២១ ខែមីនា ឆ្នាំ២០២៣ រហូតដល់ថ្ងៃទី២៨ខែកុម្ភៈ ឆ្នាំ២០៣០៕ អត្ថបទ៖ទូច សោភ័ណ