ក្រសួងសង្គមកិច្ចប្រមូលធាតុចូលបន្ថែម ដើម្បីបង្កើតក្ដាវាយអក្សរសំឡេងភាសាខ្មែរលើកុំព្យូទ័រ និងកម្មវិធី(សូហ្វៀ)​ ទូរស័ព្ទ

ភ្នំពេញ៖ ក្រសួងសង្គមកិច្ច អតីតយុទ្ធជន និងយុវនីតិសម្បទា បានបើកកិច្ចប្រជុំ​ជាមួយ​ភាគី​ពាក់​ព័ន្ធ ជាពិសេសបងប្អូនជនមានពិការភាពភ្នែក ដើម្បីប្រមូលធាតុចូល ឬសំណើ​បន្ថែម​ដាក់​ទៅ​ក្រសួង​ប្រៃសណីយ៍ និងទូរគមនាគមន៍ ក្នុងការបង្កើតនូ​វ​ក្ដា​វាយ​អក្សរ​ជា​សំឡេង​ភាសា​ខ្មែរ​លើ​កុំព្យូ​ទ័រ​ ឬលើអេក្រងទូរស័ព្ទ ដើម្បីឲ្យជនមានពិការភាពភ្នែកងាយស្រួលសិក្សា ។

នៅក្នុង​កិច្ចប្រជុំប្រមូលធាតុចូល នៅថ្ងៃទី២០ ខែមីនា ឆ្នាំ២០២៥ ឯកឧត្តម សែម សុខា រដ្ឋ​លេខា​ធិការ​ក្រសួង​សង្គមកិច្ច អតីតយុទ្ធជន និងយុវនីតិសម្បទា និងជាប្រធាន​ក្រុម​ការងារ​សម្រប​សម្រួល​បច្ចេក​វិទ្យាលើប្រព័ន្ធកុំព្យូទ័រ និងទូរស័ព្ទឆ្លាតវៃសំឡេង​ជាភាសាខ្មែរ សម្រាប់​អប់រំ​ជន​មាន​ពិការ​ភាព​ភ្នែក មានប្រសាសន៍ថា ការប្រមូលធាតុចូលនេះ ដើម្បីធ្វើយ៉ាង​ណា​ឲ្យ​ការ​បង្កើត​នូវ​កម្ម​វិធី​ក្ដា​វាយ​លើកុំព្យូទ័រ និងទូរស័ព្ទ បានឆ្លើយតបគ្រប់គ្រាន់ និងតាមតម្រូវ​ការ​របស់​បង​ប្អូន​ជន​មាន​ពិការភាព។

ឯកឧត្តមបានបន្តថា សម្រាប់កិច្ចប្រជុំនេះដែរ គឺជាលើកទី៥ហើយ ហើយលើកនេះ ក៏ជាលើក​ចុង​ក្រោយ​ សម្រាប់ការប្រមូលនូវធាតុចូលនានា ដើម្បីឈានទៅដាក់សំណើទៅក្រសួងប្រៃសណីយ៍ និង​ទូរគមនាគមន៍ បង្កើតនូវកម្មវិធីនេះ ។

ឯកឧត្តម ចាប តូ អនុរដ្ឋលេខាធិការក្រសួងសង្គមកិច្ច និងជាអនុប្រធានក្រុមការងារ មាន​ប្រសាសន៍​ថា កម្មវិធីនេះ ពិតជាមានសារសំខាន់ខ្លាំងណាស់ សម្រាប់ជនមានពិការភាពភ្នែក ដើម្បី​បាន​សិក្សានូវជំនាញកុំព្យូទ័រ ឬកម្មវីធីទូរស័ព្ទ ព្រោះបច្ចុប្បន្ន​ពួក​គាត់​មាន​ការ​ពិបាក​យ៉ាង​ខ្លាំង​ក្នុង​ការ​សិក្សា ប្រើប្រាស់កុំព្យូទ័រ និងទូរស័ព្ទដៃ ដោយអត់មានសំឡេងជាភាសាខ្មែរ។

ឯកឧត្តម​បានបន្តថា សម្រាប់កិច្ចប្រជុំនេះ គឺធ្វើយ៉ាងណាប្រមូលនូវធាតុចូលនានា ដែលជាត​ម្រូវ​ការ​ចាំបាច់​ដូចគ្នា របស់បងប្អូនជនមានពិការភាពភ្នែក និងចំគោលដៅដែលចង់បាន ហើយ​នៅ​ពេល​ខាង​មុខ នឹងលើកយកសំណើ ឬធាតុចូលទាំងអស់នោះដាក់ជូនក្រសួងប្រៃសណីយ៍ ក៏ដូច​ជា​ស្ដាប់​នូវបទបង្ហាញពីអ្នកជំនាញពីកម្មវិធីនេះ មុនឈានដល់ការបង្កើត ។

បងប្អូន​ជនមានពិការភាពភ្នែក បានសម្ដែងនូវការសាទរ និងគាំទ្រយ៉ាងខ្លាំង នៅពេល​ដែល​ក្រសួង​សង្គម​កិច្ច និងក្រសួងស្ថាប័នពាក់ព័ន្ធ បានគិតគូរ និងគ្រោង​បង្កើត​នូវ​ក្ដា​វាយ​អក្សរ​ជា​សំឡេង​ភាសា​ខ្មែរ​លើកុំព្យូទ័រ និងអេក្រងទូរស័ព្ទ ព្រោះនឹងជួយឲ្យពួកគេ កាន់តែងាយ​ស្រួលលើ​កា​រ​សិក្សា​ស្រាវ​ជ្រាវ និងកិច្ចការងារផ្សេងៗ ពាក់ព័ន្ធកម្មវិធីកុំព្យូទ័រ និងទូរស័ព្ទដៃ ។

គួរបញ្ជាក់ថា គម្រោងនេះ ពិតវាបានឆ្លើយតបចំគោលដៅរបស់រាជរដ្ឋាភិបាល នីតិកាលទី៥ ដែ​ល​បាន​ដាក់​ចេញនូវយុទ្ធសាស្ត្របញ្ចកោណ ដំណាក់កាលទី១ ដែលក្នុងនោះកម្មវិធីនេះ គឺត្រូវ​នឹង​ចំណុច​ការ​អភិវឌ្ឍវិស័យឌីជីថលនៅកម្ពុជា ៕ អត្ថបទ៖ បាន សុខរិទ្ធិ