ព័ត៌មាន

ខេត្តបន្ទាយមានជ័យ និងខេត្តវិញឡុងវៀតណាម សន្យាពង្រឹងកិច្ចសហប្រតិបត្តិការផ្នែកសេដ្ឋកិច្ច ពាណិជ្ជកម្ម កសិកម្ម និងបច្ចេកទេស

បន្ទាយមានជ័យ៖ កិច្ចសហប្រតិបត្តការផ្នែកសេដ្ឋកិច្ច ពាណិជ្ជកម្ម កសិកម្ម និងបច្ចេកទេស រវាងខេត្តវិញឡុងវៀតណាម និងខេត្តបន្ទាយមានជ័យកម្ពុជា ត្រូវពង្រឹងបន្ថែមទៀត ក្នុងជំជួបសម្តែងការគួរសមជាមួយគណៈកម្មាធិការប្រជាជនខេត្តវិញឡុង ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ នៅសាលប្រជុំសាលាខេត្តបន្ទាយមានជ័យ កាលពីរសៀលថ្ងៃទី ១៩ មីនា ឆ្នាំ២០២៥។

ក្នុងជំនួបពិភាក្សានាពេលនោះដែរក៏មានការអញ្ជើញចូលរួមពីឯកឧត្ដម ប្លែក វ៉ារី ប្រធានក្រុមប្រឹក្សាខេត្ត ឯកឧត្ដម អ៊ុ រាត្រី អភិបាល នៃគណៈអភិបាលខេត្តបន្ទាយមានជ៏យ លោក ង្វៀន មិញយុង អនុប្រធានប្រចាំការក្រុមប្រឹក្សាខេត្តវិញឡុង និងជាប្រធានប្រតិភូ លោក ង្វៀន ថាញ់វ៉ាន់ អគ្គកុងស៊ុល នៃស្ថានកុងស៊ុលវៀតណាមប្រចាំខេត្តបាត់ដំបង និងមន្ទីអង្គភាពវិស័យឯកជនចូលរួមជួបសម្តែងការគួរសមជាមួយគណៈកម្មាធិការប្រជាជនខេត្តវិញឡុង ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរនេះជាច្រើនរូបផងដែរ។

ជាមួយគ្នានោះដែរឯកឧត្ដម អ៊ុំ រាត្រី អភិបាលខេត្តបន្ទាយមានជ័យបានបង្ហាញពីសក្ដានុពលរបស់ខេត្ត ដែលមានវិសាលភាពផ្ទៃដីកសិកម្មធំធេងមានជីវជាតិសម្រាប់ធ្វើស្រែចំការ ច្រកទ្វារអន្ដរជាតិធំៗចំនួនពីរគឺច្រកទ្វារអន្តជាតិប៉ោយប៉ែត សម្រាប់ទទួលភ្ញៀវទេសចរណ៍ និងច្រកទ្វារអន្តជាតិស្ទឹងបត់ សម្រាប់សំរួលការដឹកជញ្ជូនទំនិញចេញចូល ក្រៅពីនេះ ក៏ផ្លូវដែក១ខ្សែ និងផ្លូវជាតិ ដែលកំពុងស្ថាបនាជិតរួចរាល់ងាយស្រួលដឹកជញ្ជួនផលិផលក្នុងស្រុកចេញទៅក្រៅប្រទេសផងដែរ។

ឯកឧត្ដម អភិបាលខេត្ត ក៏បានថ្លែងអំណរគុណ និងរំលឹកឡើងវិញពីកិច្ចសហប្រត្តិបត្តការខេត្តវិញឡុងវៀតណាម ជួយប្រជាជនចេញពីរបបប៉ុលពត និងបន្តជួយ លើវិស័យផ្សេងៗរបស់ខេត្តបន្ទាយមានជ័យរហូកមកដល់បច្ចប្បន្ន។

ទន្ទឹមគ្នានោះដែរលោក ង្វៀន មិញយុង អនុប្រធានប្រចាំការក្រុមប្រឹក្សាខេត្តវិញឡុង និងជាប្រធានប្រតិភូ លោក ង្វៀន ថាញ់វ៉ាន់ អគ្គកុងស៊ុល នៃស្ថានកុងស៊ុលវៀតណាមប្រចាំខេត្តបាត់ដំបង ថ្លែងអំណរគុណដល់កិច្ចសហប្រតិបត្តការល្អរវាងខេត្តទាំងពីរបន្ទាយមានជ័យ-វិញឡុង និងការសម្រួលដល់ក្រុមការងាររុករកអដ្ឋិធាតុ ស្របតាមអនុសារណៈយោគយល់ដែលបានចុះហត្ថលេខាកន្លងមក។

លោកអនុប្រធានប្រចាំការក្រុមប្រឹក្សាខេត្តវិញឡុង និងជាប្រធានប្រតិភូ សន្យាពង្រឹងកិច្ចសហប្រតិបត្តការផ្នែកសេដ្ឋកិច្ច ពាណិជ្ជកម្ម កសិកម្ម និងបច្ចេកទេស បន្តជួយខេត្តបន្ទាយមានជ័យ បញ្ចៀសចេញវិបត្តិសេដ្ឋកិច្ចពិភពលោក ស្របតាមសក្ដានុពលរបស់ខេត្តនេះ៕ឃិនសារិទ្ធ