សម្ដេចធិបតី អនុញ្ញាតជូនប្រធានធនាគារអភិវឌ្ឍន៍អាស៊ី ចូលជួបសម្តែងការគួរសម និងពិភាក្សាការងារ

នៅរសៀលថ្ងៃព្រហស្បតិ៍ ទី២០ ខែមីនា ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា បានអនុញ្ញាតជូន ឯកឧត្តម ម៉ាសាតូ កាន់ដា (MASATO KANDA) ប្រធានធនាគារអភិវឌ្ឍន៍អាស៊ី (ADB) ចូលសម្តែងការគួរសម និងពិភាក្សាការងារ នៅវិមានសន្តិភាព។

សូមជម្រាបថា ធនាគារអភិវឌ្ឍន៍អាស៊ី (ADB) គឺជាប្រភពជំនួយអភិវឌ្ឍន៍ផ្លូវការដ៏ធំបំផុតមួយរបស់កម្ពុជាដោយផ្តល់ប្រាក់កម្ចីប្រចាំឆ្នាំជាមធ្យមចំនួន ៣២៩,៨ លានដុល្លារពីឆ្នាំ២០១៦ ដល់ឆ្នាំ២០២១។ ការគាំទ្ររបស់ ADB គឺស្របតាមផែនការយុទ្ធសាស្រ្តអភិវឌ្ឍន៍ជាតិ ២០១៩-២០២៣ របស់កម្ពុជា។

កន្លងតៅ ADB បានជួយរដ្ឋាភិបាលកម្ពុជាក្នុងការឆ្លើយតបជាបន្ទាន់ទៅនឹងជំងឺរាតត្បាត កូវីដ-១៩ តាមរយៈកម្មវិធីពង្រឹងប្រព័ន្ធគាំពារសុខភាពរបស់ប្រទេស បង្កើនជំនួយសង្គមដល់ជនក្រីក្រ និងជនងាយរងគ្រោះ និងផ្តល់កម្លាំងជំរុញសេដ្ឋកិច្ចដល់អាជីវកម្ម រួមទាំង សហគ្រាសធុនតូច និងមធ្យម។

នៅក្រោមគម្រោងបម្រុងរបស់ ADB សម្រាប់ឆ្នាំ ២០២២-២០២៤ ធនាគារបានជួយរដ្ឋាភិបាលកម្ពុជា ក្នុងការអភិវឌ្ឍធនធានមនុស្សប្រកបដោយគុណភាពខ្ពស់ជាមួយនឹងជំនាញ កម្រិតខ្ពស់លើបច្ចេកវិទ្យា និងលើកកម្ពស់ការចូលរួមរបស់វិស័យឯកជន។ ច្រើនជាងមួយភាគបួននៃហិរញ្ញប្បទានដែលបានគ្រោងទុក នឹងត្រូវវិនិយោគក្នុងគម្រោងអប់រំ និងអភិវឌ្ឍន៍ជំនាញ។

ADB បានប្តេជ្ញាចិត្តក្នុងការសម្រេចឱ្យបាននូវភាពរីកចម្រើន បរិយាបន្ន ភាពធន់ និងនិរន្តរភាព នៃអាស៊ី និងប៉ាស៊ីហ្វិក ខណៈពេលដែលរក្សានិរន្តរភាពកិច្ចខិតខំប្រឹងប្រែងរបស់ខ្លួនក្នុងការលុបបំបាត់ភាពក្រីក្រខ្លាំង។ ADB បង្កើនឥទ្ធិពលនៃការអភិវឌ្ឍជំនួយដល់ប្រទេសសមាជិកកំពុងអភិវឌ្ឍរបស់ខ្លួន ដោយផ្តល់នូវហិរញ្ញប្បទាន និងដំណោះស្រាយ ចំណេះដឹងដែលសមស្របតាមរយៈកិច្ចពិភាក្សាគោលនយោបាយ និងសេវាកម្មប្រឹក្សាយោបល់ក្នុងចំណោមសេវាកម្មផ្សេងៗទៀត។ ធនាគារកៀរគរធនធានហិរញ្ញវត្ថុតាមរយៈសហហិរញ្ញប្បទានពីប្រភពឥណទានផ្លូវការ ពាណិជ្ជកម្ម និងនាំចេញ។