លោកជំទាវ ពុំ ចន្ទីនី អំពាវនាវឲ្យមានការចូលរួម​កាន់តែខ្លាំង ដើម្បី​លើក​កម្ពស់​សីលធម៌​សង្គម​តម្លៃ​ស្ត្រី កាត់បន្ថយអំពើហិង្សាក្នុងគ្រួសារ ការរំលោភបំពានគ្រប់រូបភាពលើស្ត្រី និងកុមារី

លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា អនុប្រធាន​ក្រុម​ការ​ងារ​រាជ​រដ្ឋាភិបាល​ចុះ​មូលដ្ឋានស្រុកលើកដែកតំណាងដ៏ខ្ពង់ខ្ពស់ឯកឧត្តម ហេង រតនា ប្រតិភូ​រាជ​រដ្ឋាភិបាល​ទទួលបន្ទុកជាអគ្គនាយកនៃមជ្ឍមណ្ឌលសកម្មភាពកំចាត់មីនកម្ពុជា និងជាប្រធានក្រុមការងាររាជរដ្ឋាភិ បាលចុះមូលដ្ឋានស្រុកលើកដែក ខេត្តកណ្តាល​បានអំពាវនាវឲ្យមានការចូលរួមកាន់តែខ្លាំងដើម្បីលើកកម្ពស់សីលធម៌សង្គមតម្លៃស្ត្រី និងគ្រួសារខ្មែរ ពិសេសយកចិត្តទុកដាក់ផ្សព្វផ្សាយច្បាប់នានា ដែលពាក់ព័ន្ធផលប្រយោជន៍ស្ត្រី កុមារ និង យុវវ័យ ដើម្បីកាត់បន្ថយអំពើហិង្សាក្នុងគ្រួសារ និងការរំលោភបំពានគ្រប់រូបភាពលើស្ត្រី កុមារនិង យុវវ័យ ព្រមទាំងអន្តរាគមន៍ជួយជនរងគ្រោះឲ្យទាន់ពេលវេលា ហើយផ្តន្ទាទោសជន ល្មើសតាមច្បាប់ ។

លោកជំទាវ ពុំ ចន្ទីនី ក្នុងនាមជាប្រធានក្រុមចលនាស្ត្រី នៃក្រុមការងារគណបក្សចុះ មូលដ្ឋានស្រុកលើកដែក​ផងដែរនោះ បានអំពាវនាវបែបនេះ​ក្នុងពិធីអបអរសាទរខួបអនុស្សាវរីយ៍លើកទី១១៤ ទិវានារីអន្តរជាតិ ៨ មីនា ក្រោមប្រធានបទ “សិទ្ធិ សមភាព និងភាពអង់អាចចំពោះស្ត្រី និងក្មេងស្រី នៅសា លាស្រុកលើកដែក នាថ្ងៃទី២០ ខែមីនា ឆ្នាំ២០២៥នេះ ។

តំណាងឲ្យឯកឧត្តម ហេង រតនា ប្រធានក្រុមការងាររាជ រដ្ឋាភិបាលចុះមូលដ្ឋានស្រុកលើកដែក លោកជំទាវពុំចន្ទីនី បានថ្លែងថា រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិតនិងភាពប៉ិនប្រសប់របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបន្តកំណត់ការលើកកម្ពស់សមភាពយេនឌ័រ និងការបង្កើនភាពអង់អាចរបស់ស្ត្រី និងក្មេងស្រីនៅគ្រប់វិស័យជាអាទិ ភាពនៅក្នុងរបៀបវារៈគោលនយោបាយ និងយុទ្ធសាស្ត្របញ្ចកោណដំណាក់កាលទី១ តាមរយៈការពង្រឹងភាពជាពលរដ្ឋ នៅក្នុងសង្គមដែលមានអារ្យធម៌ខ្ពស់ ប្រកបដោយសីលធម៌ សមធម៌ និងបរិយាបន្ន ដែលក្នុងនោះ “ស្ត្រី គឺស្នូល។ រាជរដ្ឋាភិបាលនិងបន្តលើកកម្ពស់មភាពយេនឌ័រ តាមរយៈការបង្កើនវិនិយោគលើសមភាពយេនឌ័រ និងបង្កើនភាពអង់អាចដល់ស្ត្រីនិងក្មេង ស្រីក្នុងវិស័យសេដ្ឋកិច្ច អប់រំ សុខភាព និងការដឹកនាំសា ធារណៈដើម្បីទាញយកអត្ថប្រយោជន៍ពីភាគលាភយេនឌ័រ បង្កលក្ខណៈអំណោយ ផលដល់ស្ត្រីក្នុងការប្រើប្រាស់សិទ្ធិលើការសម្រេចចិត្តអំពីផែនការគ្រួសារកាត់បន្ថយភាពងាយរងគ្រោះដោយអំពើហិង្សាទាក់ទងនិងយេនឌ័រលើស្ត្រីនិងកុមារ និងការលើក កម្ពស់អន្តរជំនាន់។ លោកជំទាវបន្តថា ជាមួយគ្នានេះរាជ រដ្ឋាភិបាលនិងបន្តទប់ស្កាត់រាល់ទម្រង់នៃអំពើហិង្សាទាក់ ទងនិងយេនឌ័រ និងពង្រឹងភាពអង់អាចដល់ស្ត្រីនិងក្មេងស្រីតាមរយៈកម្មវិធី និងយុទ្ធសាស្ត្រអាទិភាពដូចជា លើក កម្ពស់សីលធម៌សង្គម តម្លៃស្ត្រី និងទប់ស្កាត់អំពើហិង្សាទាក់ទងនឹងយេនឌ័រ អនុវត្តរបៀបវារៈនិងផែនការសកម្ម ភាពជាតិស្តីពីស្ត្រី សន្តិភាព និងសន្តិសុខលើកកម្ពស់កិច្ចគាំពារសង្គមដែលឆ្លើយតបនឹងយេនឌ័រ ការងារសមរម្យនិងកន្លែងដែលមានមេត្រីភាពសម្រាប់ស្ត្រី និងការថែទាំសុខភាពឆ្ពោះទៅកម្មវិធីគ្របដណ្តប់ជាសកលសំដៅធានាឱ្យប្រជាពលរដ្ឋគ្រប់រូបទទួលបានដោយសមធម៌។ពង្រឹងភាពអង់អាចដល់ស្ត្រីក្នុងសេដ្ឋកិច្ចឌីជីថល សហគ្រិនភាព ការអភិវឌ្ឍន៍ជំនាញ សេដ្ឋកិច្ចគិតគូរពីសុខុមាលភាព អភិវឌ្ឍន៍បៃតង ការប្រែប្រួលអាកាសធាតុ ព្រមទាំងភាពជាអ្នកដឹកនាំ និង អភិបាលកិច្ចប្រកបដោយបរិយាបន្ន។

លោកជំទាវបញ្ជាក់ថា កិច្ចការទាំងនេះ ចាំបាច់ត្រូវការការ ចូលរួមកិច្ចសហការ និងភាពជាដៃគូពីគ្រប់តួអង្គ និង ដៃគូពាក់ព័ន្ធ ក្រសួង ស្ថាប័ន ដៃគូអភិវឌ្ឍន៍ វិស័យឯកជន អង្គការសង្គមស៊ីវិលជាពិសេសពីគ្រួសារនីមួយៗ ក្នុងការ ចូលរួមពន្លឿនវឌ្ឍនភាព និងដាក់ចេញនូវវិធានការនានា ដើម្បីឈានដល់ការសម្រេចបាន ដូចការកំណត់នៅក្នុងក្របខ័ណ្ឌគោលនយោបាយជាតិ និងស្របតាមសេចក្តី ថ្លែងការណ៍ទីក្រុងប៉េកាំង របស់អង្គការសហប្រជា ជាតិ។ ការប្រារព្ធយុទ្ធនាការអន្តរជាតិ ៨មីនា ក្នុងឆ្នាំនេះ គឺជាយុទ្ធនាការជាតិដើម្បីអបអរសាទរនូវវឌ្ឍនភាពនិង សមិទ្ធ ផលរបស់ស្ត្រី ឆ្លុះបញ្ចាំងលើមេរៀនបទពិសោធន៍ បញ្ហាប្រឈមកាលានុវត្តភាព និងលើកឡើងនូវទិសដៅអាទិភាព ដើម្បីឱ្យប្រសើរឡើងនូវសកម្មភាពជាក់លាក់ និងវិធានការជាវិជ្ជមាននានា ដើម្បីឆ្ពោះទៅធ្វើឱ្យសង្គមដែលមានបរិយាបន្ន និងសមភាពសម្រាប់ទាំងអស់គ្នា៕ អត្ថបទ៖ ភារម្យ