កីឡា
AFC Challenge League៖ គ្រូព្រះខ័នរាជ ចង់រក្សាជ័យជម្នះក្រៅដី ខណៈគ្រូ Madura រំពឹងវាយបកតាមស្មើ
ក្រុមព្រះខ័នរាជស្វាយរៀង របស់កម្ពុជា បានយកឈ្នះក្រុមខ្លាំងឥណ្ឌូនេស៊ី Madura United ដោយលទ្ធផល ៣-០ នៅក្នុងវគ្គពាក់កណ្ដាលផ្ដាច់ព្រ័ត្រ(ជើងទី១) នៃព្រឹត្តិការណ៍បាល់ទាត់ជើងឯកក្លិបកម្រិតទី៣ ទ្វីបអាស៊ី AFC Challenge League 2024/2025 កាលពីរាត្រីថ្ងៃទី១០ ខែមេសាកន្លងទៅ នៅពហុកីឡដ្ឋានជាតិមរតកតេជោ រាជធានីភ្នំពេញ។

ក្រោយជ័យជម្នះនេះ បានធ្វើឲ្យគ្រូបង្វឹកលោក Pep Munoz សម្ដែងសេចក្ដីរីករាយជាខ្លាំង ហើយប្ដេជ្ញារៀបចំផែនការ និងត្រៀមឲ្យបានកាន់តែប្រសើរ ដើម្បីរក្សាជ័យជម្នះជាថ្មី នៅជើងទី២ គ្រាដែលគ្រូបង្វឹកក្រុម Madura United លោក Angel Afredo Vera សង្ឃឹមការប្រកួតលើទឹកដីរបស់ខ្លួន កូនក្រុមនឹងធ្វើបានល្អ យ៉ាងហោចវាយបកតាមស្មើគ្រាប់វិញ ដើម្បីមានឱកាសប្រជែងកៅអីវគ្គផ្ដាច់ព្រ័ត្រ។

សម្រាប់ជំនួបដ៏ជក់ចិត្តលើទឹកដីកម្ពុជា ក្នុងជើងទី១ នៃវគ្គពាក់កណ្ដាលផ្ដាច់ព្រ័ត្រពានរង្វាន់លំដាប់ទី២ ទ្វីបអាស៊ីនេះ ត្រឹមរយៈពេល ៦នាទី ព្រះខ័នរាជស្វាយរៀង បានស៊ុនបំប៉ោងសំណាញ់ទីក្រុមភ្ញៀវ ២គ្រាប់ ដោយកីឡាករ Breninho នៅនាទីទី៣ និងកីឡាករ Bounphachan Bounkong នៅនាទីទី៦ ហើយលទ្ធផលនេះ ក៏បានរក្សារហូតដល់ចុងម៉ោង ទើបកីឡាករ មិន រតនៈ បន្ថែមគ្រាប់ទី៣ នៅនាទី៩០ មុនអាជ្ញាកណ្ដាលផ្លុំកញ្ចែបញ្ចប់ការប្រកួត។
លោក Pep Munoz គ្រូបង្វឹកក្រុមព្រះខ័នរាជស្វាយរៀង បានលើកឡើងថា ការប្រកួតនេះ កូនក្រុមខ្លួនពិតជាធ្វើបានយ៉ាងល្អ ទាំងកីឡាករខ្មែរ និងបរទេស ស្របតាមផែនការរៀបចំរបស់ក្រុម ។ នេះគឺជាផលចំណេញ សម្រាប់ការប្រកួតជើងទី២ ដ្បិតលោកទទួលស្គាល់ការប្រកួតនៅឥណ្ឌូនេស៊ី គឺមិនងាយស្រួលនោះទេ តែលោកនឹងព្យាយាម ដើម្បីរក្សាជ័យជម្នះជាថ្មី។

ដោយឡែកលោក Angel Afredo Vera បានគូសបញ្ជាក់ថា នេះគឺជាការប្រកួតជាមួយក្រុមដ៏ល្អ តែសោកស្ដាយ ដែលក្រុមខ្លួនរបូត ២គ្រាប់លឿនពេក ។ ជារួមក្រុម Madura ធ្វើមិនបានល្អតាមផែនការនោះទេ ។ យ៉ាងណាលោកសង្ឃឹមថា ជើងទី២ ក្រុមរបស់ខ្លួន នឹងលេងបានល្អជាមួយអ្នកគាំទ្ររបស់ខ្លួន នៅឥណ្ឌូនេស៊ី ដោយលោករំពឹងនឹងអាចវាយបកតាមស្មើព្រះខ័នរាជស្វាយរៀងវិញទៀតផង។

គួរដឹងថា ក្រោយយកឈ្នះក្រុមភ្ញៀវ ៣-០ ចំពោះមុខអ្នកគាំទ្រជាង ១ម៉ឺននាក់ ក្រុមព្រះខ័នរាជស្វាយរៀង នឹងត្រូវធ្វើដំណើរទៅប្រកួតនៅឥណ្ឌូនេស៊ីវិញម្ដង ដោយត្រូវជួបក្រុមម្ចាស់ផ្ទះ Madura United នាថ្ងៃទី១៧ ខែមេសា ឆ្នាំ២០២៥ ខាងមុខ ដើម្បីកាត់សេចក្ដីរកក្រុមឡើងទៅវគ្គផ្ដាច់ព្រ័ត្រ នៃពានរង្វាន់កម្រិតទី៣ ប្រចាំទ្វីបអាស៊ីនេះ៕ អត្ថបទ លី ឈុនឡា









-
ព័ត៌មាន6 days agoកិច្ចព្រមព្រៀងសន្តិភាពកម្ពុជា-ថៃ នឹងត្រូវចុះហត្ថលេខានៅចុងខែនេះ ដោយមានប្រធានាធិបតីអាម៉េរិកជាសាក្សី
-
ព័ត៌មាន7 days agoក្រោយស្ងប់ស្ងាត់៣យប់ ថៃ បន្តចាក់សំឡេងរំខានអ្នកភូមិជោគជ័យ ដែលមានកម្រិតរលកសំឡេងខ្ពស់បំផុត
-
ព័ត៌មាន5 days agoតំណាងរាស្រ្តមណ្ឌលខេត្តបន្ទាយមានជ័យ អញ្ជើញចុះសួរសុខទុក្ខកងកម្លាំងជួរមុខ និងប្រជាពលរដ្ឋរស់នៅភូមិព្រៃចាន់
-
ព័ត៌មាន7 days agoប្រធាន AmCham៖ ទំនិញអាម៉េរិកនឹងហូរចូលកម្ពុជាកាន់តែច្រើនជំរុញកំណើនពាណិជ្ជកម្មប្រទេសទាំងពីរ
-
ព័ត៌មាន1 week agoសម្ដេចតេជោ បដិសេធ ព័ត៌មានមួលបង្កាច់ របស់ អ្នកនាំពាក្យក្រសួងការពារជាតិថៃ
-
ព័ត៌មាន14 hours agoកំណាត់ផ្លូវជាតិលេខ២៣ (ផ្លូវកាត់ពីកោះធំទៅលើកដែក) ប្រវែង១៩,៨ គីឡូម៉ែត្រ ស្ថាបនារួចរាល់ហើយ!
-
ព័ត៌មាន6 days agoទាហានកម្ពុជា ១៨ នាក់ដែលថៃចាប់ទៅ នឹងត្រូវដោះលែងក្នុងពេលឆាប់ៗនេះ
-
ព័ត៌មាន6 days agoសាច់បង្កកលួចនាំចូលពីថៃ ជិត ១តោន បានដុតកម្ទេចចោល មុនេះ ខណៈឃាត់ខ្លួនបានមនុស្ស ៣នាក់