រដ្ឋមន្ត្រីសុខាភិបាល ជួបពិភាក្សាជាមួយ ប៊ូយ៉ុង ខ្មែរ លើការបណ្តុះបណ្តាលគិលានុបដ្ឋាក កម្រិតបរិញ្ញាបត្រ នៅកម្ពុជា

នាព្រឹកថ្ងៃទី១៨ ខែមេសា ឆ្នាំ២០២៥ នៅទីស្តីការក្រសួងសុខាភិបាល ឯកឧត្ដមសាស្រ្ដាចារ្យ ឈាង រ៉ា រដ្ឋមន្រ្ដីក្រសួងសុខាភិបាល បានអនុញ្ញាតជូនលោកបណ្ឌិត LEE JOONG KEUN ប្រធានក្រុមប្រឹក្សាភិបាលនៃក្រុមហ៊ុនប៊ូយ៉ុង ខ្មែរ II ខូ អិលធីឌី និងក្រុមការងារ ចូលជួបសំដែងការគួរសម និងពិភាក្សាការងារ។

ក្នុងជំនួបពិភាក្សាការងាររវាងឯកឧត្ដមសាស្រ្ដាចារ្យ ឈាង រ៉ា និងលោកបណ្ឌិត LEE JOONG KEUN ក្នុងគោលបំណងពិភាក្សាលើការសហការ និងការគាំទ្រដល់កិច្ចដំណើរការបណ្តុះបណ្តាលថ្នាក់បរិញ្ញាបត្រគិលានុបដ្ឋាក នៃមហាវិទ្យាល័យគិលានុបដ្ឋាក វ៉ូជុង កម្ពុជា។

តំណាងក្រុមហ៊ុនប៊ូយ៉ុង ខ្មែរ II ខូអិលធីឌី បានថ្លែងអំណរគុណដល់ ឯកឧត្តមសាស្ត្រាចារ្យរដ្ឋមន្ត្រី ដែលបានគាំទ្រ និងអនុញ្ញាតឲ្យមហាវិទ្យាល័យគិលានុបដ្ឋាក វ៉ូជុង កម្ពុជា អាចធ្វើការបណ្តុះបណ្តាលថ្នាក់បរិញ្ញាបត្រគិលានុបដ្ឋាកដោយប្រើប្រាស់កម្មវិធីសិក្សាជាតិ និងកម្មវិធីសិក្សាកូរ៉េ រួមបញ្ចូលគ្នា។

ឯកឧត្តមសាស្រ្តាចារ្យរដ្ឋមន្រ្តី បានកោតសរសើរដល់ការខិតខំប្រឹងប្រែង របស់ក្រុមហ៊ុនប៊ូយ៉ុង ខ្មែរII ខូអិលធីឌី តាមរយៈ មហាវិទ្យាល័យគិលានុបដ្ឋាក វ៉ូជុង កម្ពុជា ដែលបានបំពេញតាមនិយាមតម្រូវ ក្នុងការបើកដំណើរការ បណ្តុះបណ្តាលក្នុងវិស័យសុខាភិបាល ដើម្បីរួមចំណេកផលិតធនធានមនុស្សផ្នែកគិលានុបដ្ឋាក។ មហាវិទ្យាល័យ នឹងត្រូវធ្វើការបណ្តុះបណ្តាលយ៉ាងណា ឱ្យនិសិ្សតដែលបញ្ចប់ការសិក្សាមានសមត្ថភាពខ្ពស់ អាចប្រឡងចេញថ្នាក់ជាតិជាប់ក្នុងអត្រាខ្ពស់ រួមទាំងអាចប្រឡងយកអាជ្ញាបណ្ណប្រកបវិជ្ជាជីវៈ នៅប្រទេសកូរ៉េបាន។ និស្សិតដែលបញ្ចប់ការសិក្សា នៅមហាវិទ្យាល័យគិលានុបដ្ឋាក វ៉ូជុងកម្ពុជា នឹងមានឱកាសបន្តការសិក្សាកម្រិត បរិញ្ញាបត្រជាន់ខ្ពស់ និងបណ្ឌិត តទៅទៀតបាននៅប្រទេសកូរ៉េផងដែរ។

ជំនួបពិភាក្សាការងារនេះមានការចូលរួមពីឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយកបច្ចេកទេស លោកស្រីប្រធាននាយកដ្ឋានអភិវឌ្ឍន៍ធនធានមនុស្ស និងលោកស្រីប្រធាននាយកដ្ឋានទំនាក់ទំនងអន្តរជាតិ ផងដែរ៕ អត្ថបទ រដ្ឋា