កីឡារាំកម្ពុជា ឈ្នះមេដាយ ៥គ្រឿងបណ្ដោះអាសន្ន នៃជើងឯកអាស៊ី និងជើងឯកអាស៊ីអាគ្នេយ៍ នៅវៀតណាម

ក្រុមកីឡារាំជម្រើសជាតិកម្ពុជា បានឈ្នះមេដាយចំនួន ៥គ្រឿងបណ្ដោះអាសន្ន ក្នុងបេសកកម្មចូលរួមការប្រកួតជើងឯកអាស៊ី និងអាស៊ីអាគ្នេយ៍ ឆ្នាំ២០២៥ (WDSF Asian-South East Asian Championship 2025) នៅក្រុងហូជីមិញ ប្រទេសវៀតណាម ដែលប្រព្រឹត្តទៅពីថ្ងៃទី៨ ដល់ថ្ងៃទី១៣ ខែកក្កដាចុសងប្ដាហ៍នេះ។

គិតត្រឹមល្ងាចថ្ងៃទី១០ ខែកក្កដាកន្លងទៅ ពោលគឺក្រោយចាប់ផ្ដើមការប្រកួតផ្លូវការបាន ២ថ្ងៃ ក្រុមកីឡារាំកម្ពុជា ដណ្ដើមបានមេដាយ ៥គ្រឿងជូនជាតិ ក្នុងនោះមានមេដាយប្រាក់ ១ និងមេដាយសំរឹទ្ធ ៤ ។ សម្រាប់មេដាយប្រាក់ ដណ្ដើមបានដោយកីឡាការិនី ឱ រចនី លើវិញ្ញាសារាំចង្វាក់ Jive ហើយកញ្ញា ក៏ឈ្នះមេដាយសំរឹទ្ធ ១ លើវិញ្ញាសារាំចង្វាក់ Paso Doble ផងដែរ។

រីឯមេដាយសំរឹទ្ធ ៣គ្រឿងទៀត ទទួលបានដោយកីឡាករ ជុំ លីហៀង និងកីឡាការិនី ឱ រក្សា លើវិញ្ញាសារាំចង្វាក់ Samba ១គ្រឿង និងវិញ្ញាសារាំចង្វាក់ Cha Cha Cha ១គ្រឿង ព្រមទាំងកីឡាករ សេង សុគីម និងកីឡាការិនី ម៉ូវ ដានីតា ទទួលបានលើវិញ្ញាសារាំចង្វាក់ Paso Doble។

គួរដឹងថា ព្រឹត្តិការណ៍ WDSF Asian-South East Asian Championship 2025 នេះ មានអត្តពលិកចូលរួមសរុបជាង ៣ពាន់នាក់ មកពី ៣៧ប្រទេសក្នុងទ្វីបអាស៊ី ក្នុងនោះសហព័ន្ធកីឡារាំកម្ពុជា បានបញ្ជូនអត្ដពលិករបស់ខ្លួន ១៨នាក់ចូលរួមការប្រកួតប្រចាំឆ្នាំនេះផងដែរ៕

អត្ថបទ លី ឈុនឡា, រូបភាពពាក់ព័ន្ធ៕