សម្ដេចតេជោ ហ៊ុន សែន ៖ ក្រុមហ៊ុនអាល្លឺម៉ង់ មានបំណងវិនិយោគបង្កើតរោងចក្រផលិតរថយន្ត នៅកម្ពុជា

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា ក្រុមហ៊ុនអាល្លឺម៉ង់ ដែលបានជួបពិភាក្សាជាមួយសម្ដេច កាលពីពេលថ្មីៗនេះ បានលើកឡើងអំពីគោលបំណងវិនិយោគបង្កើតរោងចក្រផលិតរថយន្ត នៅក្នុងប្រទេសកម្ពុជា។

ការឲ្យដឹងនេះ គ្រាដែលសម្ដេចតេជោ ហ៊ុន សែន បានអញ្ជើញជាអធិបតីក្នុងពិធីប្រគល់សញ្ញាបត្រដល់និស្សិត បច្ចេកវិទ្យា និងគរុនិស្សិតបច្ចេកទេសជ័យលាភី នៃវិទ្យាស្ថានជាតិបណ្តុះបណ្តាល​បច្ចេក​ទេស (NTTI) នាព្រឹកថ្ងៃទី ២៧ ខែកុម្ភៈ ឆ្នាំ ២០២៣នេះ។

សម្ដេចតេជោ ហ៊ុន សែន ថ្លែងបែបនេះថា «ហើយថ្ងៃមុននោះ បណ្ដាក្រុមហ៊ុនធំៗ ដែលធ្វើដំណើរជាមួយប្រធានាធិបតី អាល្លឺម៉ង់មក គាត់និយាយអំពីគោលបំណងនៃការយករថយន្ត គេហៅថា ក្រុមហ៊ុនរថយន្ត ផលិតរថយន្ដ មកដំឡើងនៅ ប្រទេសកម្ពុជា ខ្ញុំស្វាគមន៍អំពីបញ្ហាហ្នឹង»។

សម្ដេចតេជោ ហ៊ុន សែន លើកឡើងថា ប្រសិនបើក្រុមហ៊ុនអាល្លឺម៉ង់ ពិតជាបង្កើតរោងចក្រផលិតរថយន្តនៅកម្ពុជាមែន គឺកម្ពុជា ត្រូវដោះស្រាយនូវធនធានមនុស្សជំនាញ និងកម្មករបច្ចេកទេសឲ្យទៅក្រុមហ៊ុននោះ។

គួររំលឹកថា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីថ្ងៃទី ១៥ ខែកុម្ភៈ ឆ្នាំ ២០២៣កន្លងទៅនេះ បានទទួលជួបពិភាក្សាការងារជាមួយប្រតិភូធុរកិច្ចអាល្លឺម៉ង់ ដឹកនាំដោយលោក Frank-Walter Steinmeier ប្រធានា​ធិបតីអាល្លឺម៉ង់។

នៅក្នុងជំនួបនោះ ប្រតិភូធុរកិច្ចអាល្លឺម៉ង់ បានសម្ដែងនៅចំណាប់អារម្មណ៍ ក្នុងការវិនិយោគលើវិស័យរោងចក្រផលិត រថយន្ត គ្រឿងចក្រ សំណង់ សម្ភារៈសំណង់ ប្រព័ន្ធប្រព្រឹត្តិកម្មទឹកកខ្វក់ បច្ចេកវិទ្យា ថាមពលកកើតឡើងវិញ ហើយក៏ បានសម្ដែងនូវការពេញចិត្ត ចំពោះបរិយាកាសវិនិយោគនៅកម្ពុជា ដែលជាបរិយាកាសបើកចំហ និងអនុគ្រោះជាទីបំផុត។

សម្ដេចតេជោ ហ៊ុន សែន បានថ្លែងអំណរគុណចំពោះប្រតិភូធុរកិច្ចអាល្លឺម៉ង់ ចំពោះចំណាប់អារម្មណ៍ក្នុងការវិនិយោគ នៅកម្ពុជា។សម្ដេចតេជោ ហ៊ុន សែន បានជម្រាបជូនប្រតិភូធុរកិច្ចទាំងមូលថា កម្ពុជាអនុញ្ញាតឲ្យជនបរទេសធ្វើជាម្ចាស់ ក្រុមហ៊ុន ១០០ភាគរយ ដោយពុំចាំបាច់មានអ្នកមានសញ្ជាតិខ្មែរជាម្ចាស់ភាគហ៊ុនឡើយ៕

អត្ថបទពី៖ KPT