ក្រសួងពាណិជ្ជកម្ម បានបន្តរៀបចំសិក្ខាសាលាពិគ្រោះយោបល់ស្តីពី “ការប្រមូលធាតុចូល ដើម្បីរៀបចំសេចក្តីព្រាងគោលនយោបាយម្រេចកម្ពុជា”

នាព្រឹកថ្ងៃអង្គារ ទី១៦ ខែកញ្ញា ឆ្នាំ២០២៥ ឯកឧត្តម សំរិទ្ធ សាកុរា អនុរដ្ឋលេខាធិការក្រសួងពាណិជ្ជកម្ម និងជាអនុប្រធានក្រុមការងារបច្ចេកទេសដើម្បីសិក្សា ស្រាវជ្រាវ និងរៀបចំ សេចក្តីព្រាងគោលនយោបាយម្រេចកម្ពុជា និងតំណាង ក្រសួងកសិកម្ម រុក្ខាប្រមាញ់ និងនេសាទ និងអភិបាល នៃគណៈអភិបាលខេត្ដក្រចេះ បានអញ្ជើញចូលរួមជាគណៈអធិបតីក្នុងសិក្ខាសាលាពិគ្រោះយោបល់ថ្នាក់តំបន់ ស្តីពី “ការប្រមូលធាតុចូល ដើម្បីរៀបចំសេចក្តីព្រាងគោលនយោបាយម្រេចកម្ពុជា” ដោយមានកិច្ចសហការជាមួយរដ្ឋបាលខេត្តក្រចេះ មន្ទីរពាណិជ្ជកម្មខេត្ត និងគម្រោង EU-German GATE និង EU-German CAPSAFE។

សិក្ខាសាលានេះ ក៏មានការអញ្ជើញចូលរួមពីតំណាង ធនាគារអភិវឌ្ឍន៍ជនបទ និងកសិកម្ម មន្ទីរក្រោមឱវាទរបស់ខេត្ត សមាគមសហព័ន្ធម្រេចនិងគ្រឿងទេសកម្ពុជា អ្នកដាំដុះ ពាណិជ្ជករ និងក្រុមហ៊ុនកែច្នៃម្រេច ក្នុងខេត្តទាំង៦ រួមមាន ក្រចេះ ស្ទឹងត្រែង មណ្ឌលគិរី រតនគិរី កំពង់ចាម និងត្បូងឃ្មុំ ជាច្រើនរូប។

សិក្ខាសាលានេះ មានគោលបំណងចម្បងចំនួន ២ គឺទី១. ប្រមូលធាតុចូលនិងបញ្ហាប្រឈមបន្ថែមពីភាគីពាក់ព័ន្ធលើវិស័យម្រេច និងទី២. បន្តផ្សព្វផ្សាយដល់ថ្នាក់ក្រោមជាតិពីដំណើរការចាប់ផ្តើមរៀបចំសេចក្តីព្រាងគោលនយោបាយនេះ។

គួរបញ្ជាក់ថា គោលនយោបាយម្រេចកម្ពុជានេះ នឹងក្លាយទៅជាផែនទីបង្ហាញផ្លូវដ៏សំខាន់ក្នុងការកំណត់ទិសដៅឱ្យបានច្បាស់លាស់សម្រាប់កម្ពុជា ដើម្បីអភិវឌ្ឍ និងទាញយកអត្ថប្រយោជន៍ពីផលិតកម្មម្រេច តាមរយៈការបង្កើតតម្លៃបន្ថែមនៅក្នុងខ្សែច្រវាក់តម្លៃ និងជួយបង្កើនប្រាក់ចំណូលកសិករនៅតាមទីជនបទ ជាពិសេស សំដៅជំរុញការនាំចេញម្រេចកម្ពុជាទៅកាន់ទីផ្សារក្នុងតំបន់ និងអន្តរជាតិ៕