ភ្ញៀវទេសចរជិត ៣ម៉ឺននាក់បានមកលេងខេត្តក្រចេះ ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ ឆ្នាំ២០២៥

ភ្ញៀវទេសចរជាតិ និងអន្តរជាតិ មកលេងកម្សាន្ត​តាមរមណីដ្ឋាននានាក្នុងខេត្តក្រចេះ កើន​ឡើង​ជាង​២​ម៉ឺន បើ​ធៀបទៅនិងឆ្នាំ២០២៤។ យោងតាមរបាយការណ៍របស់មន្ទីរ​ទេសចរណ៍ខេត្ត បាន​ឲ្យ​ដឹង​ ក្នុងរយៈពេល៦ថ្ងៃ គិតចាប់ពីថ្ងៃទី១៩ ដល់ថ្ងៃទី២៣ ខែកញ្ញា ឆ្នាំ២០២៥ មាន​ភ្ញៀវ​ទេសចរ​ជាតិ​ និងភ្ញៀវទេសចរ​អន្តរជាតិប្រមាណជា ២៧.៥៧៦នាក់ បាន​មក​លេង​កម្សាន្ត​នៅ​ខេត្ត​ក្រចេះ ពោល គឺមាមកើនឡើង ប្រមាណជា ២២.៣៨២នាក់ បើធៀបទៅនិងឆ្នាំ២០២៤ គឺ​មាន​ត្រឹម​តែ ៥.១៩៤នាក់ប៉ុណ្ណោះ។

រមណីយដ្ឋានដែលអ្នកទេសចរបានទៅលេងកម្សាន្ត​ក្នុងអំឡុងពិធីបុណ្យកាន់បុណ្ឌ និងភ្ជុំបិណ្ឌ នា​ឆ្នាំ​២០២៥​នេះ ​មានរមណីយ​ដ្ឋានប្រ​វត្តិសាស្ត្រ ចំនួន ៧កន្លែង៖ ដូចជា វត្តវិហារសសរ១០០ ស្រុក​សំបូរ វត្តភ្នំសំបុក , ស្រុកចិត្របុរី វិហារបុរាណវត្តរកាកណ្តាលក្រុងក្រចេះ , ភ្នំសុពណ៌កាឡី ស្រុក​ព្រែក​ប្រសព្វ ប្រាសាទប្រាំ, វិមានរណសិរ្ស២ធ្នូ ស្រុកស្នួល និងព្រៃគគីរ ភ្នំព្រះ ស្រុកឆ្លួង ដោ​យ​ឡែក​ចំពោះរមណីយ​ដ្ឋានកែច្នៃ មានចំនួន ១កន្លែង គឺឆ្នេរខ្សាច់សុពណ៌គិរី និងរមណីយ​ដ្ឋាន​ធម្មជាតិ​មាន​ចំនួន ១កន្លែង គឺ អន្លង់ផ្សោតកាំពី។

ដោយឡែក ស្ថានភាពសន្តិសុខសណ្ដាប់ធ្នាប់នៅទូទាំង ក្រចេះ រយៈពេល១៥ថ្ងៃ នៃ​ពិធី​បុណ្យ​ភ្ជុំ​បិណ្ឌ ​និងកាន់បិណ្ឌ មានភាពល្អប្រសើរ ពុំមានបញ្ហាគ្រោះ​ថ្នាក់​ចរាចរណ៍​ណា​មួយ​កើត​ឡើង​គួរ​ឱ្យ​កក់​សម្គាល់​ ឬប៉ះពាល់ដល់អាយុជីវិតរបស់បងប្អូនប្រជាពលរដ្ឋឡើយ។

អ្នកនាំពាក្យនៃស្នងការដ្ឋាននគរបាលខេត្តក្រចេះ បានឱ្យដឹងថា​ សន្តិសុខ​សណ្ដាប់​ធ្នាប់​ទូទៅ​នៅ​ក្នុង​ខេត្ត​​ មានភាពល្អប្រសើរ ទាំងករណីគ្រោះថ្នាក់ចរាចរណ៍ និង​ ក្មេងទំនើង នេះ​គឺ​ដោយ​សារ​មាន​ការ​យក​ចិត្ត​ទុក​ដាក់ពីថ្នាក់ដឹកនាំ និងមានការណែនាំពី​លោក​ឧត្តម​សេនីយ៍​ទោ​ស្នង​ការ​នគរបា​ល​ខេត្ត​ក្រចេះ​ឲ្យចុះល្បាតចាប់ជាប្រចាំ៕ ដោយ សេង ម័រ