ព័ត៌មាន

បុណ្យភ្ជុំបិណ្ឌរយៈពេល៣ថ្ងៃ ខេត្តពោធិ៍សាត់ ទទួលបានភ្ញៀវទេសចរ ជាង៦ម៉ឺននាក់

ក្នុងអំឡុងពេលនៃពិធីបុណ្យភ្ជុំបិណ្ឌ រយៈពេល៣ថ្ងៃ គឺចាប់ពីថ្ងៃទី២១-២៣ ខែកញ្ញា ឆ្នាំ២០២៥ ខេត្តពោធិ៍សាត់ ទទួលបានភ្ញៀវទេសចរចំនួន ៦៦,៥៥៦នាក់ កើនឡើង ប្រមាណ២,៣៥% បើប្រៀបធៀបនឹងឆ្នាំ២០២៤ នេះបើតាមរបាយការណ៍របស់មន្ទីរទេសចរណ៍ខេត្តពោធិ៍សាត់។

សម្រាប់ថ្ងៃទី២៣ ខែកញ្ញា ឆ្នាំ២០២៥ នៅវត្តកែវសុវណ្ណ ក្នុងក្រុងពោធិ៍សាត់ ជាប់មាត់ស្ទឹងពោធិ៍សាត់ក៏មានរៀបចំពិធីប្រណាំងទូកផងដែរ ហើយនៅតាមរមណីយដ្ឋាន និងតំបន់ទេសចរណ៍ ក្នុងខេត្តពោធិ៍សាត់ ទាំង២៨មូលដ្ឋាន ភ្ញៀវទេសចរ មានចំនួន៤០,២៧៧នាក់ ហើយសេវាស្នាក់នៅ សណ្ឋាគារ បឹងកាឡូ ០៨មូលដ្ឋាន និងផ្ទះសំណាក់ ៨៦មូលដ្ឋាន មានភ្ញៀវស្នាក់នៅសរុប ១,៥៣០នាក់ ។ ជាមួយគ្នានោះក្រុមការងារមន្ទីរទេសចរណ៍ខេត្តបានចុះសហការ និងធ្វើការទំនាក់ទំនងជាមួយមន្ទីរ អង្គភាព អាជ្ញាធរពាក់ព័ន្ធ និងសហគមន៍ទេសចរណ៍ ក្នុងការពង្រឹងគុណភាពផលិតផល រក្សាតម្លៃផលិតផល និងសេវាកម្មទេសចរណ៍ ព្រមទាំងថែរក្សាអនាម័យ សុវត្ថិភាព ចំណីអាហារ និងបរិស្ថាន រាល់តម្លៃសេវាកម្មស្នាក់នៅ ម្ហូបអាហារ និងសេវាផ្សេងៗ ត្រូវបានដាក់បញ្ជាក់ច្បាស់ៗក្នុងតារាងបញ្ជីតម្លៃ និងបានដាក់ភាសាខ្មែរនៅខាងលើ ភាសាបរទេសនៅខាងក្រោម។

ចំពោះទីតាំងភ្ញៀវទេសចរនិយមទៅកម្សាន្តក្នុងក្នុងអំឡុងពេលនៃពិធីបុណ្យភ្ជុំបិណ្ឌ មានដូចជា តំបន់ភ្នំ១៥០០ តំបន់អូរសោម ស្ពានខ្ពស់ជាងគេ ទឹកធ្លាក់ដាតូច ទឹកធ្លាក់ធម្មជាតិច្រកល្អៀង ទឹកធ្លាក់អូរដា និងទំនប់ឈើតោក ជាដើម៕