ក្រសួងការពារជាតិ៖ កងកម្លាំងរបស់កម្ពុជាមិនបានបង្កហេតុ ឬធ្វើសកម្មភាពណាមួយ ដែល​រំលោភ​បំពា​នលើកិច្ចព្រម​ព្រៀងបទឈប់បាញ់ដូចការលើកឡើងរបស់ភាគីថៃឡើយ

លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ នៃ​ព្រះរាជា​ណា​ចក្រ​កម្ពុជា បានឲ្យដឹងថា នៅព្រឹកថ្ងៃទី២៥ ខែកញ្ញា ឆ្នាំ២០២៥ មានផេកផ្លូវការ​របស់​កង​ទ័ព​ជើង​គោក​ថៃ និងសារព័ត៌មានរបស់ថៃមួយចំនួនបានចុះផ្សាយថា “កម្ពុជាបង្ក​ហេតុ​ពេញ​មួយ​យប់​នៅ​តំបន់​យោធ​ភូមិភាគទី២” ដោយឮសម្លេងកាំភ្លើង, សំឡេង​ផ្ទុះគ្រាប់បែក, រកឃើញ​ការ​ចូល​ជិត​លួស​​បន្លា​​ហើយការបាញ់ ដើម្បីពិនិត្យមើលរយៈចម្ងាយ។

ក្រសួងការពារជាតិ នៃព្រះរាជាណាចក្រកម្ពុជាស្រាយបំភ្លឺថា កង​កម្លាំង​របស់​កម្ពុជា​មិន​បាន​បង្ក​ហេតុ​ ឬ​ធ្វើ​សកម្មភាព​ណា​មួយ​ដែលរំលោភបំពានលើកិច្ចព្រមព្រៀងបទ​ឈប់បាញ់ ដូច​ការ​លើក​ឡើង​របស់​ភាគីថៃឡើយ។

បើយោងតាមការបញ្ជាក់ពីកងកម្លាំងរបស់កម្ពុជាដែលឈរជើងនៅជួរមុខបានឱ្យដឹងថា នៅរំលងអធ្រាត្រ ថ្ងៃទី២៥ ខែកញ្ញា ឆ្នាំ២០២៥

• នៅវេលាម៉ោង ២:៥៧នាទីព្រឹក មានផ្ទុះការបាញ់កាំភ្លើងនៅខាងភាគីថៃ ចំនួនមួយគ្រាប់

• នៅវេលាម៉ោង ៥:០០នាទីព្រឹក មានផ្ទុះការបាញ់កាំភ្លើងនៅខាងភាគីថៃ ចំនួនមួយគ្រាប់

• នៅវេលាម៉ោង ៦:០០នាទីព្រឹក មានផ្ទុះការបាញ់កាំភ្លើងនៅខាងភាគីថៃ ចំនួនមួយគ្រាប់

• នៅវេលាម៉ោង ៧:០០នាទីព្រឹក មានផ្ទុះការបាញ់កាំភ្លើងនៅខាងភាគីថៃ ចំនួនមួយគ្រាប់

កង​កម្លាំង​របស់​កម្ពុជា សូមបញ្ជាក់សាជាថ្មីនូវការប្តេជ្ញាចិត្តយ៉ាងពេញលេញ ចំពោះការគោរព និង​អនុវត្ត​នូវ​កិច្ច​ព្រមព្រៀងនៃបទឈប់បាញ់រវាងយោធាកម្ពុជា និងយោធាថៃ បានយ៉ាងម៉ឺងម៉ាត់ និង​ខ្ជាប់​ខ្ជួន​បំផុត ជាមួយនឹងស្មារតីនៃការប្តេជ្ញាចិត្តក្នុងការសហការគ្នានៅគ្រប់កម្រិត កម្ពុជា​តែង​តែ​រក្សា​នូវ​កិច្ចសហការល្អជាមួយគ្នា។ ក្នុងនោះផងដែរ ក្រុមទំនាក់ទំនងរវាងកម្ពុជា-ថៃ នៅជួរមុខ គឺ​បានធ្វើការជាមួយគ្នាជាប់ជាប្រចាំ តាមរយៈការផ្តល់ព័ត៌មាន ឬការបញ្ជាក់គ្នាទៅវិញទៅមក ដើម្បី​​ចៀស​វាង​ការភាន់ច្រឡំ ឬការបង្កភាពតានតឹងណាមួយដែលមិនចាំបាច់។