សម្ដេចតេជោ ហ៊ុន សែន ស្វាគមន៍អ្នកសង្កេតការណ៍អន្តរជាតិជាង ៣០០នាក់ ដែលមកសង្កេតការណ៍បោះឆ្នោតនៅកម្ពុជា

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសស្វាគមន៍ចំពោះអ្នកសង្កេតការណ៍អន្តរជាតិជាង ៣០០ នាក់ ដែលអញ្ជើញមកចូលរួមសង្កេតការណ៍បោះឆ្នោតនៅកម្ពុជា។​

តាមរយៈបណ្ដាញសង្គមតេលេក្រាម នៅព្រឹកថ្ងៃទី ២០ ខែកក្កដា ឆ្នាំ ២០២៣នេះ សម្ដេចតេជោ ហ៊ុន សែន បាន​សរសេរថា ក្នុងនាមរាជរដ្ឋាភិបាល សម្ដេចសូមស្វាគមន៍យ៉ាងកក់ក្តៅចំពោះលោក-លោកស្រីចំនួន ៣៣៣នាក់ មកពី ៦៥ប្រទេស និងស្ថាបន័អន្តរជាតិ ដែលបាននិងកំពុងអញ្ជើញមកកាន់ព្រះរាជាណាចក្រកម្ពុជា ដើម្បីចូលរួមសង្កេតការណ៍សម្រាប់ការបោះឆ្នោតសកល ជ្រើសតាំងតំណាងរាស្ត្រ នីតិកាលទី ៧ នាថ្ងៃអាទិត្យ ទី ២៣ ខែកក្កដា ឆ្នាំ ២០២៣ខាងមុខនេះ។

សម្ដេចតេជោ ហ៊ុន សែ​ន ក៏បានថ្លែងថ្លែងអំណរគុណចំពោះប្រធានសភាប្រទេសម៉ាឡេស៊ី និងលោក នាយករដ្ឋមន្ត្រី នៃសាធារណរដ្ឋហ្គីណេប៊ីស្សូ ដែលអញ្ជើញមកដើម្បីសង្កេតការណ៍ដោយផ្ទាល់។ ក្នុងនោះដែរ សម្ដេចតេជោ ហ៊ុន សែន ក៏បានថ្លែងអំណរគុណអតីតប្រមុខរដ្ឋ ប្រមុខរដ្ឋាភិបាល អតីតប្រធាន អនុប្រធានរដ្ឋសភាទាំង ១១រូប ដែលបានចំណាយពេលវេលាធ្វើដំណើរមកកាន់កម្ពុជា ដើម្បីធ្វើជាសាក្សី នៃដំណើរការប្រជាធិបតេយ្យនៅកម្ពុជា។

សម្ដេចតេជោ ហ៊ុន សែន លើកឡើងថា «យើងធ្លាប់បានបោះឆ្នោតសកលជ្រើសរើស តំណាងរាស្ត្រ ៦លើករួចមកហើយ និងលើកទី ៧ ឆ្នាំ ២០២៣នេះ មានអ្នកសង្កេតការណ៍មកពីក្រៅប្រទេសច្រើនបំផុត និងមានឥស្សរជនជាន់ខ្ពស់ច្រើនបំផុតមកចូលរួមសង្កេតការណ៍»៕

អត្ថបទពី៖ KPT