ពលរដ្ឋរងគ្រោះដោយជំនន់ទឹកភ្លៀង៤០០គ្រួសារទៀតនៅខេត្តរតនគិរីទទួលអំណោយសង្រ្គោះពីកាកបាទក្រហមកម្ពុជា‌

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់មន្រ្តី សហការជាមួយសាខាខេត្ត ចុះសួរសុខទុក្ខ និង ចែកអំណោយមនុស្សធម៌ ជូនប្រជាពលរដ្ឋរងគ្រោះ ដោយសារទឹកជំនន់រហ័សនៅខេត្តរតនគិរីចំនួន 400 គ្រួសារទៀត ដើម្បីបង្គ្រប់ចំនួន 900 គ្រួសារស្ថិតក្នុក្នុងសាលាបឋមសិក្សាកូនមុំតូច។

ថ្ងៃទីពីរបន្ទាប់ពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន កាកបាទក្រហមកម្ពុជា បានសម្រេចផ្តល់អំណោយមនុស្សធម៌ ជូនប្រជាពលរដ្ឋរងគ្រោះដោយសារទឹកជំនន់រហ័សចំនួន ១៨៥០ គ្រួសារ ដែលកំពុងស្នាក់នៅបណ្តោះអាសន្ននៅទួលសុវត្ថិភាព ក្នុងនោះមានចំនួន៩៥០គ្រួសារ រស់នៅខេត្តមណ្ឌលគិរី និង៩០០គ្រួសារ រស់នៅខេត្តរតនគិរី។ ជាក់ស្តែងនៅព្រឹកថ្ងៃទី២៨ ខែកញ្ញា ឆ្នាំ២០២៥នេះ កាកបាទក្រហមកម្ពុជា ដែលមានហ្លួងម៉ែ នរោត្តម មុនិនាថ សីហនុ ជាព្រះប្រធានកិត្តិយស និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានចាត់មន្ត្រីទីស្នាក់ការកណ្តាល សហការជាមួយសាខាខេត្តចុះសួរសុខទុក្ខ និងផ្តល់អំណោយមនុស្សធម៌ជួយសម្រាលការលំបាកដល់ ប្រជាពលរដ្ឋរងគ្រោះដោយសារជំនន់ទឹកភ្លៀងរហ័សចំនួន៤០០គ្រួសារទៀត មកពីឃុំសិរីមង្គល នៃស្រុកកូនមុំ ខេត្តរតនគិរី ដែលកំពុងស្នាក់នៅបណ្តោះអាសន្ន លើទីទួលសុវត្ថិភាព។