ឯកឧត្តមកិត្តិសេដ្ឋាបណ្ឌិត ជាម យៀប បាន​អនុញ្ញាត​ឱ្យ​សមាគម​និស្សិតសិ​ស្ស​ខេត្តព្រៃវែង​ចូលជួប​សម្តែង​ការ​គួរសម និងផ្តល់អនុសាសន៍

ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា នៅព្រឹកថ្ងៃទី១ ខែតុលា ឆ្នាំ២០២៥ បាន​អញ្ជើញជាអធិបតី ក្នុងពិធីសំណេះសំណាលជាមួយលោក នីន តារារតន៍ ប្រធានសមាគមនិស្សិត សិស្ស​ខេត្តព្រៃវែង​ ។

ក្រោយ​ពី​ស្តាប់របាយការណ៍របស់លោក នីន តារារតន៍ ប្រធានសមាគមនិស្សិត សិស្សខេត្ត​ព្រៃវែង​រួច​មក​ ឯកឧត្តមកិត្តិសេដ្ឋាបណ្ឌិត មានប្រសាសន៍ថា ឯកឧត្តម បានយល់អំពីប្រវត្តិនិងគោលបំណង ទស្សន​វិស័យ បេសកកម្ម សកម្មភាពចំបងៗ និងសមិទ្ធិផលការងារ ក៏ដូចជា​ទិសដៅ​ការ​ងារ​របស់​សមាគមនេះពិតជាបានចូលរួមចំណែកក្នុងការអភិវឌ្ឍសេដ្ឋកិច្ច សង្គមនៅកម្ពុជា ជាពិសេស​ស្រប​តាម​យុទ្ធ​សាស្ត្រ​បញ្ចកោណ ដំណាក់កាលទី១ របស់រាជរដ្ឋាភិបាល ក្រោមការដឹកនាំ​ពោរ​ពេញ​ដោយ​ថា​មពល និងប្រកបដោយឆន្ទៈមុតស្រួច ចក្ខុវិស័យវែងឆ្ងាយ និងក្លៀវក្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ឯកឧត្តម បានបង្ហាញការគាំទ្រចំពោះទស្សនវិស័យ និងបេសកកម្មរបស់សមាគមនិស្សិត សិស្ស​ខេត្ត​ព្រៃវែង​ ដែលបានជួយសម្រួលការលំបាកដល់សិស្ស និស្សិត ដែលជួបការខ្វះខ្វាតក្នុងការសិក្សា ការ​ស្នាក់​នៅ និងដើម្បីរឹតចំណងមិត្តភាព សាមគ្គីភាព រវាងអតីតនិស្សិត និស្សិត យុវជនជំនាន់មុន និង​សិស្ស និស្សិតជំនាន់ ក្រោយ នៅតាមបណ្តាសាលានានា ជាពិសេសការជួយផ្សព្វផ្សាយ និងអប់រំ​ដល់​សិស្ស ​និស្សិត ពីគុណតម្លៃស្នូលរបស់គណបក្សប្រជាជនកម្ពុជា។ ក្នុងគោលដៅជំរុញឧត្តមភាពសិក្សា សេដ្ឋ​កិច្ច ការកសាងមូលធនមនុស្ស និងការអភិវឌ្ឍភាពជាអ្នកដឹកនាំរបស់យុវជនកម្ពុជា សមាគម​គួរ​បន្ត​ជួយ​ជំរុញការអភិវឌ្ឍវិស័យអប់រំ និងជំនាញវិជ្ជាជីវៈសម្រាប់សិស្ស និស្សិតកម្ពុជា ដើម្បីឲ្យមា​ន​ជំនាញ ​និងចំណេះដឹងពិតប្រាកដក្នុងការចូលរួមចំណែកអភិវឌ្ឍសង្គមសេដ្ឋកិច្ចកម្ពុជា ស្របតាម​វិស័យ​អាទិភាពទាំង៥ គឺ មនុស្ស ផ្លូវ ភ្លើង ទឹក និង បច្ចេកវិទ្យា ដូចមានចែងនៅក្នុង​យុទ្ធសាស្រ្ត​បញ្ច​កោណ​ដំណាក់​កាលទី១ ដែលដឹកនាំប្រកបដោយថាមវន្តនៃ សមេ្តច មហាបវរធិបតី ហ៊ុន ម៉ាណែត នាយករដ្ឋមន្ត្រី៕