រដ្ឋមន្ត្រីក្រសួងការងារ ប្រកាសផ្ដល់អាហារូបករណ៍ដល់​សិស្សានុសិស្ស​ដែលទើប​ប្រឡង​បាក់ឌុប​ក្នុង​ស្រុក​កំពង់សៀម​ឱ្យ​សិក្សានៅតាមគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ

ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និង​ជា​ប្រធាន​ក្រុម​ការងារ​រាជ​រដ្ឋាភិបាលចុះមូលដ្ឋានស្រុកកំពង់សៀម បានប្រកាស​ផ្ដល់​អាហារូបករណ៍​ដល់​សិស្សា​នុសិស្ស​ទាំង​អស់​ក្នុង​ស្រុក​កំពង់សៀមដែលទើបបានប្រឡងមធ្យមសិក្សាទុតិយភូមិឆ្នាំសិក្សា ២០២៤–២០២៥ ឱ្យសិក្សានៅក្នុងគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈ។

ការប្រកាសនេះធ្វើឡើងនាព្រឹកថ្ងៃទី១ ខែតុលា ឆ្នាំ២០២៥ នៅខណៈពេលដែល ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បាន​អញ្ជើញ​ចូល​រួម​ជា​សហ​អធិបតី​ជា​មួយ​ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម នៅក្នុង​ពិធី​សំណេះ​សំណាល​ជា​មួយ​សិស្សានុសិស្សក្នុងស្រុកកំពង់សៀម ដែលបានប្រឡងមធ្យមសិក្សាទុតិយភូមិ ឆ្នាំសិក្សា​២០២៤​-២០២៥ ។ ពិធីសំណេះសំណាលនេះត្រូវបានរៀបចំឡើងនៅសាលប្រជុំរដ្ឋបាលខេត្តកំពង់ចាម ដោយ​មាន​ការ​អញ្ជើញ​ចូលរួមពីមន្ត្រីការិយាល័យអប់រំស្រុក, នាយក នាយិកាសាលា និងលោកគ្រូ អ្នកគ្រូ សរុប​ជិត ១ ០០០នាក់។

ថ្លែងទៅកាន់អង្គពិធី ឯកឧត្ដម ហេង សួរ បានចូលរួមអបអរសាទរដល់ជ័យលាភីទាំងអស់ ហើយ​បាន​បញ្ជាក់ថា លទ្ធផលប្រឡងបាក់ឌុបនៅក្នុងស្រុកកំពង់សៀម ខេត្តកំពង់ចាម វិវត្តកាន់​តែ​ប្រសើរ​ជា​បន្ដ​បន្ទាប់ ដោយកើនឡើងពី ៦៥ ភាគរយ ក្នុងឆ្នាំ២០២១ ដល់ ៨១ ភាគរយ ក្នុង​ឆ្នាំ​២០២​៥ ដែលនេះមានន័យថា ក្នុងរយៈពេល៥ឆ្នាំ ការប្រឡង​បាក់​ឌុប​ទទួល​បាន​លទ្ធ​ផល​ល្អ​កើន​ឡើង​ ១៦ភាគរយ។

ឯកឧត្ដមរដ្ឋមន្ត្រី ក៏បានជម្រាបផងដែរថា នៅក្នុងឆ្នាំ ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា រួមទាំងសាកលវិទ្យាល័យ និងគ្រឹះស្ថាន​សិក្សា​នានា​បាន​ផ្ដល់​អាហា​រូបករណ៍​ជា​ច្រើន​ពាន់​កន្លែង​សម្រាប់​សិស្សានុ​សិស្ស​ដែល​ទើប​ប្រឡង​ជាប់​បាក់​ឌុប​នៅ​ក្នុងឆ្នាំ២០២៥នេះ។

ជាមួយគ្នានេះ ឯកឧត្តមរដ្ឋមន្ដ្រី បានប្រកាសថា ចំពោះសិស្សានុសិស្សក្នុងស្រុកកំពង់សៀម ដែល​មិន​ទទួល​បានអាហារូបករណ៍ទាំងនោះ ឯកឧត្តមនឹងផ្ដល់អាហារូបករណ៍ជូនពួកគេគ្រប់ៗគ្នា ដើម្បី​បន្ត​ការសិក្សានៅក្នុងគ្រឹះស្ថានបណ្ដុះបណ្ដាលបច្ចេកទេស និងវិជ្ជាជីវៈ ដែលស្ថិត​ក្រោម​ឱវាទ​របស់​ក្រសួង ទោះបីជាពួកគេប្រឡងជាប់ ឬធ្លាក់ក៏ដោយ។

សូមបញ្ជាក់ថា នៅស្រុកកំពង់សៀម មានសិស្សានុសិស្សប្រឡងជាប់មធ្យមសិក្សាទុតិយភូមិ ឆ្នាំ​សិក្សា​២០២៤-២០២៥ ចំនួន ៤៨៥នាក់ ដែលស្មើនឹង៨០.៩៧ភាគរយ នៃចំនួន​សិស្សា​នុ​សិស្ស​មា​នឈ្មោះ​ប្រឡងនៅក្នុងស្រុកកំពង់សៀមទាំងអស់។ ក្នុងនោះ សិស្សានុសិស្ស​ប្រឡង​បាន​និទ្ទេស ​A ចំនួន ៩នាក់ និទ្ទេស B ចំនួន ៥០នាក់, និទ្ទេស C ចំនួន ១១៣នាក់, និទ្ទេស D ចំនួន ១៨១​នាក់ និងនិទ្ទេស E ចំនួន ១៣២នាក់៕