អង្គការ​ស្បៀង​អាហារ​ពិភព​លោក សន្យាបន្តចូលរួមលើកកម្ពស់ស្បៀង និងអាហារូបត្ថម្ភនៅកម្ពុជា

ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និង​ជនបទ និងជាប្រធានគណៈកម្មាធិការជាតិជំរុញចលនាភូមិ១ផលិតផល១ នៅ​ថ្ងៃ​ទី​២១ ខែ​តុលា​​ ​ឆ្នាំ២០២៥ បានទទួលជួបសម្តែងការគួរសម និងពិភាក្សាកាងារជាមួយលោកស្រី Kyung-nan Park តំណាងអង្គការកម្មវិធីស្បៀងអាហារពិភពលោកប្រចាំប្រទេសកម្ពុជា។

ក្នុង​ជំនួបនេះ លោកស្រី Kyung-nan Park បាន​កោត​សសើរ​ពី​វឌ្ឍនភាព​របស់​កម្ពុជា​ជា​ពិសេស​លើវិស័យ​ស្បៀង និងអាហារូបត្ថម្ភ ដែលសមិទ្ធផលនេះកើតចេញពីការដឹកនាំ និងសម្រប​សម្រួល​របស់​ក្រុម​ប្រឹក្សា​ស្តារអភិវឌ្ឍន៍វិស័យកសិកម្ម និងជនបទ ផ្ទាល់។ លោក​ស្រី​បាន​កត់​សម្គាល់​ឃើញ​ថា​ក្នុង​រយៈពេលពីរ​ឆ្នាំ​កន្លង​មក ក្រោមការដឹកនាំរបស់ឯកឧត្តមបណ្ឌិតសភាចារ្យ ជាមួយ​នឹង​ការ​ចូលរួម​គាំទ្រ​ពីអង្គការ WFP ទទួលបានសមិទ្ធផលសំខាន់គួរឱ្យកត់សំគាល់ ដូចជាបាន​ធ្វើ​ការ​សិក្សា​ស្រាវ​ជ្រាវ​ស្តីពី​ការបំពេញចន្លោះនៃសារធាតុចិញ្ចឹម បានរៀបចំ​យុទ្ធសាស្ត្រ​ជាតិ​ស្តីពី​សន្តិសុខ​ស្បៀង ​និងអាហារូបត្ថម្ភ លើកទី៣ ឆ្នាំ២០២៤-២០២៨ បានរៀបចំ​ផែនទី​បង្ហាញ​ផ្លូវ​ស្តី​ពី​ប្រព័ន្ធ​ស្បៀង​​សម្រាប់​ការអភិវឌ្ឍន៍ប្រកបដោយចីរភាពនៅកម្ពុជាឆ្នាំ២០៣០ និងការ​ដាក់​បញ្ជូល​ការងារ​ប្រព័ន្ធ​ស្បៀង​ទៅក្នុង NDC 3.0 ។

លើសពីនេះ លោកស្រីក៏បានជម្រាប​ជូន​ឯកឧត្តម​បណ្ឌិត​សភា​ចារ្យ​អំពី​សកម្មភាព​កាងារ​មួយ​ចំនួនរបស់អង្គការស្បៀងអាហារពិភពលោកប្រចាំប្រទេសកម្ពុជា និងបន្តចូលរួមគាំទ្រ កម្ម​វិធី​ផ្តល់​អាហារ ​និងបរិស្ថានស្បៀងតាមសាលារៀនជាដើម។

ជាកិច្ចឆ្លើយ​តប ឯកឧត្តមបណ្ឌិតសភាចារ្យទេសរដ្ឋមន្ត្រី បានថ្លែងអំណរគុណ ចំពោះលោកស្រី Kyung-nan Park សម្រាប់ការប្តេជ្ញាចិត្ត ហើយបានបង្ហាញពីទំនុកចិត្តលើការបន្តដឹកនាំរបស់ WFP ក្នុងការជំរុញសន្តិសុខស្បៀង អាហារូបត្ថម្ភ និងភាពធន់នឹងអាកាសធាតុរបស់កម្ពុជា។

ឯកឧត្តម​ បាន​បន្ត​ថា​ អង្គការស្បៀងអាហារពិភពលោក តែងតែគាំទ្រ និង​សហការ​យ៉ាង​ល្អ​ជា​មួយ​ក្រុម​ប្រឹក្សា​ស្តារអភិវឌ្ឍន៍វិស័យកសិកម្ម និងជនបទ លើវិស័យសន្តិស្បៀង និងអាហា​រូបត្ថម្ភ​នៅ​កម្ពុជា។

ឯកឧត្តម​បណ្ឌិត​សភាចារ្យ បានបញ្ជាក់សារជាថ្មីអំពីការត្រៀមខ្លួនរបស់ CARD ក្នុ​ង​ការ​ធ្វើ​ការ​យ៉ាង​​ជិតស្និទ្ធជាមួយ WFP ដើម្បី​សម្រេច​បាន​នូវ​ចក្ខុ​វិស័យ​រួមគ្នា​នៃ​ការ​ធានា​របប​អាហារ​ដែល​មាន​សុខ​ភាពល្អ និងគ្មានកង្វះអាហារូបត្ថម្ភសម្រាប់ប្រជាជនកម្ពុជាទាំងអស់។

ឯកឧត្តម​បណ្ឌិតសភាចារ្យទេសរដ្ឋមន្ត្រី អ៊ុក រ៉ាប៊ុន បានឆ្លៀត​ឱកាស​លើក​ឡើង​ពី​ស្ថាន​ភា​ព​ព្រំដែន​កម្ពុជា-ថៃ ដោយកត់សម្គាល់ពីផលប៉ះពាល់អវិជ្ជមានរបស់សង្គ្រាមទៅលើសន្តិសុខស្បៀង និង​អាហារូបត្ថម្ភក្នុងចំណោមសហគមន៍ព្រំដែនដែលរងផលប៉ះពាល់​។

ឯកឧត្តម​​បានរំឭកពីប្រវត្តិជម្លោះដ៏ឈឺចាប់របស់ប្រទេសកម្ពុជា ហើយបានបញ្ជាក់ជាថ្មីថា «សង្គ្រាម​មិន​អាចបញ្ចប់សង្គ្រាមបានឡើយ»។ កម្ពុជានៅតែប្តេជ្ញា​ចិត្ត​ក្នុង​ការ​ដោះ​ស្រាយ​ជម្លោះ​ដោយ​សន្តិ​វិធី ស្របតាមច្បាប់អន្តរជាតិ និងធម្មនុញ្ញអង្គការសហប្រជាជាតិ រក្សាអធិបតេយ្យភាព បូរណ​ភាពទឹកដី និងឯករាជ្យភាពនយោបាយ។

ជាមួយ​នេះ​ ឯកឧត្តម​ទេស​រដ្ឋ​មន្ត្រី បានថ្លែងអំណរ​គុណ​ចំពោះ​ជំនួយ​មនុស្សធម៌​ដ៏​ឆាប់​រហ័ស​របស់ ​WFP រួមទាំងការប្រគល់អង្ករចំនួន 220តោន ដល់គ្រួសារដែលផ្លាស់ទីលំ ក្នុង​ខេត្ត​ឧត្តរមាន​ជ័យ​ និងបានលើកទឹក​ចិត្ត​បន្ត​កិច្ច​សហការ​ក្នុង​ការ​ផ្តល់​ជំនួយ​ទាន់​ពេល​វេលា​ដល់​ប្រជាព​លរដ្ឋ​ដែល​រង​ផលប៉ះពាល់។

ជាចុងបញ្ចប់ ឯកឧត្តមបណ្ឌិតសភាចារ្យ បានស្នើសុំ​អង្គការ​ស្បៀង​អាហារ​ពិភពលោក​បន្ត​គាំទ្រ​ដល់​ដំណើរ​ការតាក់តែង អនុវត្ត និងវាយតម្លៃនៃយុទ្ធសាស្រ្តជាតិលើកទី៣ស្តីពីសន្តិសុខស្បៀង និង​អាហារូបត្ថម្ភដើម្បីរួម​ចំណែក​សម្រេច​ឱ្យ​បាន​ជោគ​ជ័យ​នូវ​យុទ្ធ​សាស្ត្រ​បញ្ចកោណ​ដំណាក់​កាល​ទី១​ របស់រាជរដ្ឋាភិបាល៕ អត្ថបទ៖ ​បាន​ សុខរិទ្ធិ