ថ្ងៃនេះជាថ្ងៃទី១០៦ដែលវីរកងទ័ពកម្ពុជា១៨រូបត្រូវបានចាប់ខ្លួន និងក្រោមការឃុំគ្រងរបស់យោធាថៃ

ថ្ងៃទី១២ ខែវិច្ឆិកា ឆ្នាំ២០២៥នេះ ជាថ្ងៃទី១០៦ ហើយដែលវីរកងទ័ពកម្ពុជាចំនួន ១៨រូប​ត្រូវ​បាន​ចាប់​ខ្លួន​ និងដាក់ឱ្យស្ថិតក្រោមការឃុំគ្រងរបស់យោធាថៃ ក្រោយភាគីថៃបាន​រំលោភ​កិច្ច​ព្រម​ព្រៀង​​ឈ​ប់បាញ់កាលពីថ្ងៃទី២៩ ខែកក្កដា ឆ្នាំ២០២៥ កន្លងទៅ។

ក្រសួង​ការពារជាតិកម្ពុជា នៅថ្ងៃទី១២ ខែវិច្ឆិកានេះ បានបន្តអំពាវនាវឱ្យភាគីថៃ ដោះ​លែង​វីរ​កង​ទ័ព​កម្ពុជាចំនួន ១៨រូប ត្រឡប់មកវិញឱ្យបានឆាប់រហ័សជាទីបំផុត ដើម្បីឱ្យពួកគាត់​អាច​វិល​ត្រឡប់​មក​ជួបជុំក្រុមគ្រួសាររបស់ពួកគាត់ និងប្រកបដោយសុខសុវត្ថិភាព ស្របតាម​ច្បាប់​មនុស្ស​ធម៌​អន្តរ​ជាតិ។

សូមគូសបញ្ជាក់ថា រាជរដ្ឋាភិបាលកម្ពុជា បាននឹងកំពុងធ្វើការយ៉ាងសស្រាក់សស្រាំឥតឈប់ឈរ នូវ​គ្រប់យន្តការដោះស្រាយទាំងអស់លើករណីនេះ ដើម្បីឱ្យភាគីថៃ ដោះ​លែង​កង​កម្លាំង​របស់​យើង​ទាំង​១៨នា​ក់នោះ វិលត្រលប់មកវិញឱ្យបានឆាប់រហ័សជាទីបំផុត និងដោយសុខសុវត្ថិភាព។ រាជរដ្ឋាភិបាលកម្ពុជា ក្រសួងការពារជាតិ និងកងយោធពលខេមរភូមិន្ទ មិនដែល​បោះប​ង់​កង​កម្លាំ​ង​របស់​យើងណាម្នាក់ចោលនោះឡើយ ទោះក្នុងកាលៈទេសៈណាក៏ដោយ។

សូមរម្លឹកថាកាលពីថ្ងៃទី២៨ ខែកក្កដា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយក​រដ្ឋ​មន្រ្តី​នៃកម្ពុជា និងអតីតនាយករដ្ឋមន្រ្តីស្តីទីថៃ លោក Phumtham Wechayachai បាន​ឯក​ភាព​គ្នា​ទទួល​យកបទឈប់បាញ់ តាមរយៈការចុះកិច្ចព្រមព្រៀងឈប់បាញ់ជាមួយគ្នា នៅ​ទី​ក្រុង​កូឡា​ឡាំពួ​រ ប្រទេសម៉ាឡេស៊ី។ លទ្ធផលនេះកើតឡើងក្រោមការសម្របសម្រួលរបស់នាយករដ្ឋមន្រ្តីម៉ាឡេស៊ី ឯកឧត្តម Anwar Ibrahim និងមានការសហការជំរុញដោយឯកឧត្តម ដូណាល់ ត្រាំ ប្រធានាធិបតីអាមេរិក និង​មាន​ការចូលរួមពីតំណាងប្រទេសចិន។

បន្ទាប់​ពី​ទទួលបានបទឈប់បាញ់, រហូតដល់ថ្ងៃទី២៦ ខែតុលា ឆ្នាំ២០២៥ ភាគីទាំងពីរ​បាន​ឯកភាព​គ្នា​ចុះកិច្ចព្រមព្រៀងសន្តិភាពកម្ពុជា-ថៃមួយទៀត ចុះហត្ថលេខាដោយសម្តេចធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា និងលោក អនុទីន ចាន់វីរៈកុល នាយករដ្ឋមន្រ្តីថៃ ក្រោម​អធិបតី​ភាពសាក្សីពីឯកឧត្តម ដូណាល់ ត្រាំ ប្រធានាធិបតីអាមេរិក និងឯកឧត្តម នាយក​រដ្ឋ​មន្រ្តី​ម៉ាឡេស៊ី ដែលជាប្រធានអាស៊ាន នៅអំឡុងកិច្ចប្រជុំកំពូលអាស៊ាន។ តាមរយៈ​កិច្ច​ព្រម​ព្រៀង​នេះ​ក៏​បាន​បញ្ជា​ក់​ពីការ​ដោះលែង​ជា​បន្ទាន់​នូវ​វីរកង​ទ័ព​កម្ពុជា​ទាំង​១៨​រូប​ស្របតា​ម​ច្បាប់​មនុស្ស​ធម៌​អន្តរជាតិ​ផង​ដែរ៕